வங்கிசாரா நிதியியல்துறையில் வளர்ச்சி!

• சொத்து அடிப்படை 3.2 டிரில்லியன் ரூபாயாக உயர்ந்துள்ள அதேவேளையில் வைப்புகளை விடக் கடன்கள் 124% அதிகரிக்கும் போக்கு!
  
  
• செயலிழந்த கடன்களின் சதவீதம் 5.1%ஆகக் குறைவு: ஒருங்கிணைப்பு வேலைத்திட்டத்திற்கு மத்தியில் நிதி நிறுவனங்களின் ஸ்திரத்தன்மை உயர்வு!

நிதி நிறுவனங்களின் சொத்து வளர்ச்சியும் கடன் விரிவாக்கமும்

இலங்கையின் வங்கிசாரா நிதி நிறுவனங்கள் (NBFI) துறை, குறிப்பிடத்தக்க பின்னடைவுக்குப் பின்னர் விரைவான மீட்சிப் போக்கைக் காட்டி வருகிறது.

இலங்கை மத்திய வங்கியின் அண்மைய உத்தியோகபூர்வ தரவு அறிக்கைகள், 2026 ஜூன் மாதத்துடன் நிறைவடைந்த ஓராண்டு காலத்தில் பதிவு செய்யப்பட்ட நிதி நிறுவனங்களின் மொத்த சொத்து அடிப்படை 41% வளர்ச்சியடைந்து 3.2 டிரில்லியன் ரூபாயாக உயர்ந்துள்ளதை உறுதிப்படுத்துகின்றன.

மேலும், குறித்த காலப்பகுதியில் நிதி நிறுவனங்களால் வழங்கப்பட்ட மொத்த கடன்களின் அளவு 47.8% என்ற கணிசமான வளர்ச்சியைப் பதிவுசெய்து 2.6 டிரில்லியன் ரூபாயாகப் பதிவாகியுள்ளது.

ஏனைய முதலீடுகள் 19.7% அதிகரித்து 434 பில்லியன் ரூபாயாகவும், ஏனைய சொத்துக்கள் 25.9% அதிகரித்து 148.6 பில்லியன் ரூபாயாகவும் உறுதி செய்யப்பட்டுள்ளன.

வங்கிசாரா நிதியியல்துறையின் (NBFI) வளர்ச்சி:

விடயம்	தகவல்கள்
மொத்த சொத்து அடிப்படை	3.2 டிரில்லியன் ரூபாய் (ஆண்டுக்கு ஆண்டு வளர்ச்சி 41%)
வழங்கப்பட்ட மொத்த கடன்கள்	2.6 டிரில்லியன் ரூபாய் (வளர்ச்சி 47.8%)
வைப்பு அடிப்படை	1.43 டிரில்லியன் ரூபாய் (வளர்ச்சி 22.9%)
நிறுவனக் கடன்கள் (Borrowings)	1.05 டிரில்லியன் ரூபாய் (வளர்ச்சி 124%)
செயலிழந்த கடன் சதவீதம் (Gross NPL)	8.3% இல் இருந்து 5.1% ஆகக் குறைவு (Stage 3 NPL 3% ஆகக் குறைவு)
உரிமை மூலதனம் (Equity Capital)	578.2 பில்லியன் ரூபாய் (பதிவுசெய்த நிறுவனங்களின் எண்ணிக்கை 35-41 ஆக வரம்பிடப்பட்டுள்ளது)

வைப்பு அடிப்படையும் நிறுவனக் கடன்பெறும் போக்கும்

இருப்பினும், இந்த கடன் விரிவாக்கத்திற்கு எவ்வாறு நிதி திரட்டப்பட்டுள்ளது என்பது குறித்து நிதித் துறையின் கவனம் திரும்பியுள்ளது.

நிதி நிறுவனங்கள் மீதான பொதுமக்களின் நம்பிக்கை உறுதிப்பட்டு வருவதன் காரணமாக, அந்நிறுவனங்கள் பெற்ற வைப்புகளின் அளவு 22.9% அதிகரித்து 1.43 டிரில்லியன் ரூபாயாகப் பதிவாகியுள்ளது.

இருப்பினும், மீளக் கடன் வழங்குவதற்காக நிதி நிறுவனங்கள் மேற்கொண்ட நேரடி நிறுவன மற்றும் மொத்தக் கடன்கள் (Borrowings for on-lending) 124% அதிகரித்து 1.05 டிரில்லியன் ரூபாய் வரை உயர்ந்துள்ளது.

வைப்பு வளர்ச்சியை விடக் கடன் வழங்கள் வீதம் அதிகமாக இருப்பதால், நிறுவனங்கள் கூடுதல் கடன்களை அடிப்படையாகக் கொண்டு தமது வணிக நடவடிக்கைகளை விரிவாக்க முற்பட்டுள்ளமை தெளிவாகிறது.

வட்டி வீதங்கள் குறைந்த மட்டத்தில் இருக்கும்போது இத்தகைய கடன் மூலதனப் பயன்பாடு (Leverage) குறுகிய கால லாபத்தை அதிகரிக்க உதவினாலும், சந்தை பணப்புழக்க நிலைமைகள் மாறும்போது அது வட்டிச் செலவில் நேரடித் தாக்கத்தை ஏற்படுத்தக்கூடும்.

இலாபத்தன்மையும் செயலிழந்த கடன் நிர்வாகமும்

இத்துறையின் நிகர வட்டி வருமானம் 27.6% அதிகரித்து 72.7 பில்லியன் ரூபாயாக இருந்ததுடன், வரிக்கு முந்தைய இலாபம் 17.4% அதிகரித்து 39.9 பில்லியன் ரூபாயாகப் பதிவாகியுள்ளது.

அதேபோல், வரிக்குப் பிந்தைய இலாபம் 16.4% வளர்ச்சியுடன் 21 பில்லியன் ரூபாயாக மாறியுள்ளது. சொத்து அடிப்படை 41% அதிகரித்துள்ளமையுடன்ப்பிணைத்து நோக்குகையில் இலாபத்தன்மையின் வளர்ச்சி வேகம் மெதுவான மட்டத்தில் இருப்பது குறிப்பிடத்தக்க அம்சமாகும்.

இருப்பினும், சொத்துக்களின் தரத்தில் (Asset Quality) குறிப்பிடத்தக்க சாதகமான முன்னேற்றம் பதிவாகியுள்ளது.

கடந்த ஆண்டில் 8.3% ஆக இருந்த மொத்தச் செயலிழந்த கடன்களின் (Gross Non-Performing Loans) சதவீதம் 5.1% ஆகக் குறைந்துள்ளதுடன், 3 ஆம் கட்டச் (Stage 3) செயலிழந்த கடன்களின் அளவு 4.5% இல் இருந்து 3% ஆகக் குறைந்துள்ளது.

மத்திய வங்கியின் NBFI Consolidation Masterplan எனும் ஒருங்கிணைப்பு ஒழுங்குமுறை வேலைத்திட்டத்தின் கீழ், ஒழுங்கற்ற நிதி நிறுவனங்களை ஒருங்கிணைக்க அல்லது மூட நடவடிக்கை எடுக்கப்பட்டமையால், தற்போது இயங்கி வரும் பதிவுசெய்த நிறுவனங்களின் எண்ணிக்கை 35-41 ஆகக் கட்டுப்படுத்தப்பட்டுள்ளதுடன், உரிமை மூலதனம் 578.2 பில்லியன் ரூபாய் வரை பலப்படுத்தப்பட்டுள்ளமை இத்துறையின் ஸ்திரத்தன்மைக்குக் காரணமாக அமைந்துள்ளது.