இந்தியாவின் ‘டிஜிட்டல் அடையாள அட்டை’ திட்டம் பெரும் நெருக்கடியில்; இருமடங்கு தொகை கோரும் நிறுவனங்கள்!

‘டிஜிட்டல் அடையாள அட்டை’ (SL-UDI) திட்டமானது, அதற்காக தகுதி பெற்றுள்ள இந்திய நிறுவனங்கள் கோரியுள்ள அதிகப்படியான தொகை காரணமாக பெரும் நெருக்கடி நிலையை நோக்கி நகர்ந்துள்ளது.

இத்திட்டத்தின் முதன்மை அமைப்பினை ஒருங்கிணைக்கும் (Master System Integrator - MSI) பணிகளுக்காக சமர்ப்பிக்கப்பட்ட நிதி ஏலக்கோரிக்கைகள் (Financial Proposals) திறக்கப்பட்ட போதே இந்த அதிதிர்ச்சியூட்டும் விபரங்கள் வெளியாகியுள்ளன. இதன் காரணமாக, இலங்கை அரச அதிகாரிகள் இந்தியத் தரப்புடன் அவசர கலந்துரையாடலொன்றிற்கு அழைப்பு விடுத்துள்ளனர்.

மதிப்பீட்டை விஞ்சிய இந்திய நிறுவனங்களின் ஏலத்தொகை: இந்த இருதரப்பு திட்டத்திற்காக இலங்கை அரசாங்கத்திற்கு 3 பில்லியன் இந்திய ரூபாய்களை (10.5 பில்லியன் இலங்கை ரூபாய்) மானியமாக வழங்க இந்திய அரசு உடன்பட்டிருந்தது.

• ஏலப்புள்ளி விபரம்: இத்திட்டத்தின் தொழில்நுட்ப மதிப்பீட்டு கட்டத்தில் டாடா (TCS), இன்போசிஸ் (Infosys), புரோட்டியன் ஈ-கோவ் (Protean e-Gov), ரெயில்டெல் (RailTel) மற்றும் பாரத் இலெக்ட்ரானிக்ஸ் (BEL) ஆகிய 5 பிரம்மாண்ட இந்திய நிறுவனங்கள் தகுதி பெற்றிருந்தன.

• நிதி இடைவெளி: சமர்ப்பிக்கப்பட்ட நிதித் திட்டங்களில், மிக உயர்ந்த தொழில்நுட்ப மற்றும் நிதிப் புள்ளிகளைப் பெற்று, மிகக் குறைந்த தொகையைக் கோரியிருந்த நிறுவனத்தின் ஏலத்தொகை மாத்திரம் 7 பில்லியன் இந்திய ரூபாய்களாக (24.6 பில்லியன் இலங்கை ரூபாய்) பதிவாகியுள்ளது. இது இந்திய அரசு வழங்க ஒப்புக்கொண்ட முழு மானியத் தொகையை விடவும் இருமடங்கிற்கும் அதிகமானதாகும்.

உயர்மட்ட இராஜதந்திர பேச்சுவார்த்தைகள்: ஏலத்தொகையானது எதிர்பார்க்கப்பட்டதை விட மிக அதிகமாக உள்ளதால், அடுத்தகட்ட நடவடிக்கைகள் குறித்து தீர்மானிப்பதற்காக இந்திய அரசாங்கத்திடம் அவசர பேச்சுவார்த்தை கோரப்பட்டுள்ளதாக டிஜிட்டல் தொழில்நுட்ப பிரதி அமைச்சர் எரங்க வீரரத்ன உறுதிப்படுத்தியுள்ளார். விலை அடிப்படையில் மட்டுமன்றி, தொழில்நுட்ப மற்றும் வர்த்தக அம்சங்களை உள்ளடக்கிய "சிறந்த முன்மொழிவை" மாத்திரமே அரசாங்கம் தெரிவு செய்யும் என்றும் அவர் குறிப்பிட்டுள்ளார்.

இரு நாடுகளுக்கும் இடையே கையெழுத்திடப்பட்டுள்ள புரிந்துணர்வு ஒப்பந்தத்தின்படி (MoU), ஏலத்தொகை மானியத் தொகையைத் தாண்டும் பட்சத்தில், இருதரப்பும் பேச்சுவார்த்தை மூலம் தீர்வை காண்பதற்கான ஏற்பாடுகள் காணப்படுவதாக டிஜிட்டல் பொருளாதாரம் குறித்த ஜனாதிபதியின் முதன்மை ஆலோசகர் கலாநிதி ஹான்ஸ் விஜயசூரிய தெரிவித்துள்ளார்.

தொழில்நுட்பப் பொறுப்புகளும் அடுத்தகட்ட நகர்வுகளும்: தெரிவு செய்யப்படும் இந்திய ‘MSI’ நிறுவனமானது முழுமையான டிஜிட்டல் அடையாள அட்டை கட்டமைப்பை ஆரம்பத்திலிருந்து உருவாக்க வேண்டும்.

• முதலாம் ஆண்டு (இந்திய நிறுவனத்தின் பொறுப்பு): இரண்டு பிரம்மாண்ட தரவு மையங்களுக்கான (Data centers) வன்பொருட்களை (Hardware) வழங்குதல், அடிப்படை மென்பொருளை (MOSIP) இலங்கைக்கு ஏற்றவாறு வடிவமைத்தல் மற்றும் கைரேகை, விழித்திரை ஸ்கேனர்கள் (Iris scanners) அடங்கிய 900 உயிரியளவியல் (Biometric) பதிவுப் பெட்டிகளை நாடு முழுவதும் நிறுவுதல் என்பன இவற்றுள் அடங்கும். இக்கட்டமைப்பு ஆரம்பிக்கப்பட்டு ஓராண்டிற்குள் அதன் அடிப்படைப் பொறுப்புகள் உள்நாட்டு நிறுவனத்திடம் ஒப்படைக்கப்பட வேண்டும்.

• இரண்டாம் ஆண்டு முதல் (உள்நாட்டு நிறுவனத்தின் பொறுப்பு): இதற்கென இலங்கை அரசாங்கத்தினால் உள்நாட்டு தகவல் தொழில்நுட்ப நிறுவனமொன்று (Managed Service Provider - MSP) டெண்டர் மூலம் தெரிவு செய்யப்படவுள்ளது. எனினும், இதற்கான உள்நாட்டு டெண்டர் இதுவரை கோரப்படவில்லை.

இவ்விடயம் குறித்து கொழும்பிலுள்ள இந்திய உயர்ஸ்தானிகராலயத்தின் ஊடகப் பேச்சாளர் வினவியபோது, ஏல மதிப்பீட்டுப் பணிகள் தற்போதும் முன்னெடுக்கப்பட்டு வருவதாகவும், இந்தியத் தரப்பிலிருந்து இதுவரை இறுதி முடிவுகள் எதுவும் எட்டப்படவில்லை என்றும் தெரிவித்துள்ளார்.