பாதுகாப்புத் தரப்பு நடவடிக்கை எடுத்துள்ளது.
மறு அறிவித்தல் வரை குறித்த சர்வதேச கடல் வழிப்பாதை மூடப்பட்டிருக்கும் என ஈரானின் இஸ்லாமிய புரட்சிகர காவல்படை (IRGC) உத்தியோகபூர்வமாக அறிவித்துள்ளது.
சைப்ரஸ் நாட்டுக் கொடியுடனான வர்த்தகக் கப்பல் ஒன்று, அங்கீகரிக்கப்படாத கடல் பாதையினூடாக பயணித்த வேளையில் ஈரான் இராணுவத்தினரால் மேற்கொள்ளப்பட்ட துப்பாக்கிச் சூட்டுச் சம்பவத்தை அடுத்து பிராந்தியத்தில் கடுமையான பதற்ற நிலைமை ஏற்பட்டது. இதனைத் தொடர்ந்தே ஹோர்முஸ் ஜலசந்தியை முழுமையாக மூடுவதற்கு ஈரான் தீர்மானித்துள்ளதாகத் தெரிவிக்கப்படுகிறது.
அமெரிக்காவின் அடுத்தடுத்த தாக்குதல்கள்:
இதேவேளை, குறித்த கப்பல் மீதான தாக்குதலை அடுத்து, ஈரானுக்கு எதிராக அமெரிக்கப் படைகள் புதிய சுற்றுத் தாக்குதல்களை தற்போது ஆரம்பித்துள்ளதாக சர்வதேச ஊடகங்கள் செய்தி வெளியிட்டுள்ளன.
அமெரிக்காவின் இந்தத் தாக்குதல்களுக்கு கடுமையான பதிலடி கொடுத்துள்ள ஈரான் தரப்பு, அமெரிக்காவின் தாக்குதல்களுக்கு எதிராகத் தாம் பதில் தாக்குதல்களைத் தொடுக்கவுள்ளதுடன், இப்பிராந்தியத்தில் புதிதாக அமைக்கப்பட்டுள்ள அமெரிக்க இராணுவ முகாம்களையும் இலக்கு வைக்கவுள்ளதாக எச்சரித்துள்ளது.
மூன்று கப்பல்கள் மீது தாக்குதல்:
நடப்பு வாரத்தில் மாத்திரம், ஓமான் கடல் எல்லை ஊடாக அமெரிக்காவினால் பரிந்துரைக்கப்பட்ட பாதையில் பயணித்த மூன்று சிவிலியன் வர்த்தகக் கப்பல்கள் மீது ஈரான் தாக்குதல் நடத்தியுள்ளது. இச்சம்பவங்களைத் தொடர்ந்தே ஈரானுக்கு எதிராக அமெரிக்கா தனது மூன்றாவது சுற்றுத் தாக்குதலை முன்னெடுத்துள்ளதாக அமெரிக்க பாதுகாப்புத் தலைமையகமான பென்டகன் உறுதிப்படுத்தியுள்ளது.
குறித்த வர்த்தகக் கப்பல்கள் மீதான ஈரானின் தொடர்ச்சியான தாக்குதல்களை அடுத்தே, அமெரிக்கா ஈரானுக்கு எதிரான இந்த இராணுவ நடவடிக்கைகளைத் தீவிரப்படுத்தியுள்ளமை குறிப்பிடத்தக்கதாகும்.