போதைப்பொருள் குற்றங்களுக்கு மரண தண்டனை வழங்குவது குறித்து 'நாடே ஒன்றாக' தேசிய செயல்பாட்டுச் சபை கவனம்!

வழங்குவது குறித்து “நாடே ஒன்றாக” (රටම එකට) தேசிய செயல்பாட்டுச் சபைக் கூட்டத்தில் கவனம் செலுத்தப்பட்டுள்ளது.

ஜனாதிபதி செயலகத்தில் ஜனாதிபதி அநுர குமார திசாநாயக்க தலைமையில் இன்று (10) முற்பகல் இக்கூட்டம் நடைபெற்ற போதே இக்கருத்து ஆராயப்பட்டது.

நச்சுப் போதைப்பொருள் அச்சுறுத்தலானது வெறும் தனிநபர் தொடர்புகளையும் தாண்டி, நாட்டின் முழுப் பொருளாதாரம் மற்றும் சமூகக் கட்டமைப்பிற்கே பாரிய அச்சுறுத்தலாக மாறியுள்ளதையும், அது தொடர்ந்து அதிகரித்து வருவதையும் கருத்திற் கொண்டு இந்த முடிவு பரிசீலிக்கப்பட்டுள்ளது.

போதைப்பொருள் கடத்தல் மூலம் ஈட்டப்படும் அளவற்ற பணத்தைச் சுற்றி உருவாகியுள்ள குற்றவியல் சூழல், தேசிய பொருளாதாரம், சுற்றுலாத்துறை மற்றும் சமூக ஒழுக்கவியல் அமைப்புக்கு பெரும் அச்சுறுத்தலாக விளங்குகிறது. போதைப்பொருள் கடத்தல் மற்றும் குற்றங்களுக்குப் பயப்படும் ஒரு சமூகத்தை உருவாக்குவதற்குத் கடுமையான சட்டங்களை அமல்படுத்துவதன் அவசியம் குறித்து இக்கூட்டத்தில் விவாதிக்கப்பட்டதாக ஜனாதிபதி ஊடகப் பிரிவு தெரிவித்துள்ளது.

சமூக விழிப்புணர்வும் பங்களிப்பும்: நாட்டின் எதிர்கால சந்ததியை இரையாக்கி வரும் போதைப்பொருள் பேரழிவை வேரோடு பிடுங்கியெறிய நடைமுறைச் செயல்பாடுகளும், விரைவான கருத்தியல் மாற்றமும் அவசியம் எனக் குறிப்பிட்ட ஜனாதிபதி, இதற்கு மதத் தலைவர்கள், பெற்றோர்கள் மற்றும் சமூக அமைப்புகளின் தீவிரப் பங்களிப்பை அரசு எதிர்பார்ப்பதாகத் தெரிவித்தார்.

சட்டத் திருத்தங்கள்: போதைப்பொருள் கட்டுப்பாடு மற்றும் பிணை வழங்குதல் தொடர்பான சட்டத் திருத்தங்கள் ஏற்கனவே தயாரிப்பின் இறுதிப் கட்டத்தில் உள்ளன. அவை விரைவில் வர்த்தமானியில் வெளியிடப்பட்டு நாடாளுமன்றத்தில் சமர்ப்பிக்கப்படும்.

அரச பகுப்பாய்வாளர் அறிக்கைகள் விரைவுபடுத்தல்: போதைப்பொருள் வழக்குகள் தாமதமாகக் காரணமான அரச பகுப்பாய்வாளர் அறிக்கைகளை வழங்கும் நடைமுறை கணிசமாக விரைவுபடுத்தப்பட்டுள்ளது. கடந்த ஜூலை மாதத்தில் மட்டும் 6,414 அரச பகுப்பாய்வாளர் அறிக்கைகள் வழங்கப்பட்டுள்ளன.

கைது செய்யப்பட்ட அளவின் அடிப்படையில் வகைப்படுத்தல்: அரச பகுப்பாய்வாளர் அறிக்கைகள் தாமதமாவதால் சிறையிலுள்ளவர்களின் சட்ட நடவடிக்கைகளை விரைவுபடுத்த, கைப்பற்றப்பட்ட போதைப்பொருள் அளவின் அடிப்படையில் (5 கிராமிற்கு உட்பட்டது, 10 கிராமிற்கு உட்பட்டது என) தரவு வகைப்பாட்டைச் சமர்ப்பிக்குமாறு ஜனாதிபதி உத்தரவிட்டார்.

துறைகளுக்கிடையிலான ஒருங்கிணைப்பு: அரச பகுப்பாய்வாளர் திணைக்களம், பொலிஸ் மற்றும் சிறைச்சாலை அமைப்புகளுக்கு இடையே சிறந்த ஒருங்கிணைப்பை ஏற்படுத்தி, அறிக்கை கிடைத்தவுடன் சந்தேகநபர்களை நீதிமன்றத்தில் ஆஜர்படுத்த முறைமை ஒன்றை உருவாக்குமாறு அறிவுறுத்தப்பட்டது.

வசதிகள் மற்றும் கண்காணிப்பு: அரச பகுப்பாய்வாளர் திணைக்களத்தின் திறனை உயர்த்தும் நடவடிக்கைகள் குறித்து ஆராயப்பட்டதுடன், அறிக்கைகளைப் பெறும் பணிகளுக்குக் கடற்படையின் உதவியைப் பெற நடவடிக்கை எடுக்கப்பட்டுள்ளது. பாதுகாப்பு கேமரா அமைப்புகளை (CCTV) பொருத்த தேவையான நிதியை ஒதுக்குமாறும் ஜனாதிபதி உத்தரவிட்டுள்ளார்.