சட்டமூலம் மற்றும் நீதித்துறையில் நிலவும் தற்போதைய சூழ்நிலைகள் குறித்து கருத்துத் தெரிவித்துள்ள மக்கள் ஐக்கிய எதிர்க்கட்சியின் அமைப்பாளர் பேராசிரியர் ஜீ.எல். பீரிஸ், நீதித்துறையின் வெளிப்படைத்தன்மையையும் சுதந்திரத்தையும் பாதுகாப்பது நாட்டின் எதிர்காலத்திற்கு மிகவும் தீர்க்கமான காரணியாகும் என வலியுறுத்தியுள்ளார்.
கொழும்பு மல் வீதியில் அமைந்துள்ள அரசியல் அலுவலகத்தில் இன்று (09) நடைபெற்ற விசேட செய்தியாளர் சந்திப்பில் கலந்துகொண்டு கருத்துத் தெரிவித்த அவர், நீதி அமைச்சரின் கூற்றுகள், உயர் நீதிமன்றத்தின் நீதிபதிகள் குழாமின் கட்டமைப்பு மற்றும் சர்வதேச ரீதியில் இலங்கை எதிர்கொள்ளும் சவால்கள் குறித்து விரிவான சட்ட மற்றும் அரசியல் ஆய்வை முன்வைத்தார்.
சர்வதேச தொழில்முறை அமைப்புகளைச் அலட்சியப்படுத்துவதன் விளைவுகள்
பொதுநலவாய சட்டக் கழகத்தை (Commonwealth Lawyers Association - CLA) 'பணம் கொடுத்து உறுப்பினராகும் ஒரு தனியார் கழகம்' (Private Club) என நீதி அமைச்சர் பாராளுமன்றத்தில் தெரிவித்த கூற்றுக்கு பேராசிரியர் ஜீ.எல். பீரிஸ் தனது பலத்த கண்டனத்தைப் பதிவு செய்தார்.
ஐக்கிய நாடுகள் சபை (UN), உலக சுகாதார அமைப்பு (WHO), சர்வதேச தொழிலாளர் அமைப்பு (ILO), உணவு மற்றும் விவசாய அமைப்பு (FAO) மற்றும் யுனெஸ்கோ (UNESCO) போன்ற சர்வதேச அளவில் அங்கீகரிக்கப்பட்ட அனைத்து அமைப்புகளின் உறுப்பினர்களுக்காகவும் இலங்கை உத்தியோகபூர்வ உறுப்பினர் கட்டணங்களைச் செலுத்துகிறது என்பதைச் சுட்டிக்காட்டிய அவர், கட்டணம் செலுத்துவதை அடிப்படையாகக் கொண்டு இத்தகைய உலகளாவிய அமைப்புகளை நிராகரிப்பது ராஜதந்திர மற்றும் பொருளாதார ரீதியில் நாட்டைத் தனிமைப்படுத்தும் ஒரு சோகமான மனப்பான்மை எனக் குறிப்பிட்டார். இத்தகைய பொறுப்பற்ற கூற்றுகளால் பாதிப்பு ஏற்படுவது சம்பந்தப்பட்ட அமைப்புகளுக்கு அல்ல, மாறாக முழு நாட்டிற்கும் பொதுமக்களுக்குமே ஆகும் என அவர் வலியுறுத்தினார்.
'நீதியை நிலைநாட்டுவதைப் பொதுமக்களிடமிருந்து மறைக்க முடியாது'
"Justice is not a cloistered virtue" (நீதியானது அடைத்து வைக்கப்பட்ட ஒரு நற்பண்பு அல்ல) என்ற சர்வதேச சட்டக் கோட்பாட்டை நினைவுகூர்ந்த பேராசிரியர், நீதித்துறை நடைமுறையானது பொதுமக்களின் அவதானிப்பிற்கும் முழுமையான வெளிப்படைத்தன்மைக்கும் திறந்திருக்க வேண்டும் என்றார்.
22வது திருத்தத்திற்கு எதிராக சாதனையாக 67 மனுக்கள் தாக்கல் செய்யப்பட்டுள்ள பின்னணியில், இது குறித்து தீர்மானிப்பதற்காக உயர் நீதிமன்றத்தின் அனைத்து நீதிபதிகளையும் உள்ளடக்கிய முழுமையான நீதிபதிகள் குழாமை (Full Bench) அழைக்குமாறு கோரியது அந்த வெளிப்படைத்தன்மைக்காகவே என அவர் சுட்டிக்காட்டினார்.
மேலும், பல வரலாற்று முன்னுதாரணங்களையும் பேராசிரியர் ஜீ.எல். பீரிஸ் இங்கு சுட்டிக்காட்டினார்:
-
1983 ஆம் ஆண்டு: 6வது அரசியலமைப்புத் திருத்தத்தை விசாரிப்பதற்காக அன்றைய பிரதம நீதியரசர் நெவில் சமரகோன் உயர் நீதிமன்றத்தின் ஒன்பது நீதிபதிகளையும் பங்கேற்கச் செய்தமை.
-
1987 ஆம் ஆண்டு: 13வது அரசியலமைப்புத் திருத்தம் மற்றும் மாகாண சபைகள் சட்டமூலத்தைப் பரிசீலிக்கும் போது பிரதம நீதியரசர் எஸ். சர்வாநந்தா முழுமையான உயர் நீதிமன்றத்திற்கு வழக்கை அனுப்பியமை.
-
2018 மற்றும் 2023: 2018 இல் பாராளுமன்றத்தைக் கலைத்தல் மற்றும் 2023 இல் உயிர்த்த ஞாயிறு தாக்குதல் தொடர்பான வழக்கு விசாரணைகளின் போது ஏழு நீதிபதிகள் கொண்ட அமர்வுகள் நியமிக்கப்பட்டமை.
இத்தகைய முன்னுதாரணங்கள் இருக்கும் போது, எவ்வித காரணமும் தெரிவிக்காமல் முழுமையான நீதிபதிகள் குழாம் கோரிக்கையை நிராகரித்து, ஐவர் கொண்ட நீதிபதிகள் குழாமை நியமித்தமையும், அதில் சிரேஷ்டத்துவத்தைக் கவனத்தில் கொள்ளாமையும் குறித்து வழக்கு விசாரணையைக் கண்காணித்த பொதுநலவாய சட்டக் கழகத்தின் தலைவர் ஸ்டீபன் திருவின் உத்தியோகபூர்வ அறிக்கையிலும் கவலை தெரிவிக்கப்பட்டுள்ளதாக அவர் குறிப்பிட்டார். சேவையிலுள்ள 13 நீதிபதிகளில் 62 சதவீதத்திற்கும் அதிகமானோரின் கருத்து இதனால் பிரதிநிதித்துவப்படுத்தப்படாமை கேள்விக்குரியது என்பது பேராசிரியரின் கருத்தாகும்.
ஜெனீவா மனித உரிமைகள் அமர்வும் நாட்டின் பாதுகாப்புக் கேடயமும்
ஜெனீவாவில் நடைபெற்று வரும் மனித உரிமைகள் பேரவையின் 63வது அமர்வில் ஐக்கிய நாடுகள் மனித உரிமைகள் உயர்ஸ்தானிகர் வோல்கர் டர்க் சமர்ப்பித்த அறிக்கை குறித்தும் பேராசிரியர் ஜீ.எல். பீரிஸ் இங்கு அவதானம் செலுத்தினார்.
வெளிநாட்டு நீதிமன்றங்கள் அல்லது பொறிமுறைகளுக்கு முன்பாக இலங்கையின் இறையாண்மை மற்றும் ஆயுதப்படைகளுக்காக இதுவரை பாதுகாப்புக் கேடயமாகப் பயன்படுத்தப்பட்டது இங்குள்ள நீதித்துறை அமைப்பின் சுதந்திரமும் நம்பகத்தன்மையுமே ஆகும் எனச் சுட்டிக்காட்டிய பேராசிரியர், அரசாங்கத்தின் இத்தகைய நடவடிக்கைகளால் அந்த நம்பிக்கை சிதைந்து சர்வதேச அளவில் நாட்டின் நிலைப்பாடு கடுமையான சிரமத்திற்குள்ளாகும் அபாயம் இருப்பதாக எச்சரித்தார்.
எதிர்க்கட்சியின் ஏனைய பிரதிநிதிகளின் கருத்துகள்
இச்செய்தியாளர் சந்திப்பில் கருத்துத் தெரிவித்த முன்னாள் பாராளுமன்ற உறுப்பினர் டிலான் பெரேரா, முன்னாள் மாகாண சபை உறுப்பினர் நிஷாந்த ஸ்ரீ வர்ணசிங்க மற்றும் சட்டத்தரணி பியல் தர்சன குருஃகே ஆகியோர், மகாநாயக்க தேரர்கள், ஆயர் பேரவை மற்றும் சட்டத்தரணிகள் சங்கம் உள்ளிட்ட பல தரப்பினரின் இணக்கப்பாடின்றி அரசியலமைப்புத் திருத்தங்களைக் கொண்டுவருவது பொருத்தமற்றது எனச் சுட்டிக்காட்டினர். மேலும், தற்போதைய வாழ்க்கைச் செலவு, பணவீக்கம் மற்றும் வறட்சி போன்ற பொருளாதார மற்றும் சமூக நெருக்கடிகளுக்கு மத்தியில் மக்களின் முன்னுரிமைகளை அடையாளம் கண்டு செயல்படுவதன் முக்கியத்துவத்தையும் அவர்கள் வலியுறுத்தினர்.