தாக்குதலில் மூவர் உயிரிழந்துள்ளதாக ஈரானிய அரச ஊடகம் அறிவித்துள்ளது.
இத்தாக்குதலில் மேலும் பலர் காயமடைந்துள்ளதாகவும் அந்த ஊடகம் குறிப்பிட்டுள்ளது. ஈரானிய இராணுவத்தின் 90 முக்கிய மர்மஸ்தானங்களை (மூலோபாய இலக்குகளை) இலக்கு வைத்தே இந்த புதிய தாக்குதல்கள் நடத்தப்பட்டதாக அமெரிக்கா தெரிவித்துள்ளது.
ஈரானின் வான் பாதுகாப்பு அமைப்புகள், கடலோர கண்காணிப்பு மற்றும் அவதானிப்பு அமைப்புகள், ஏவுகணை மற்றும் தாக்குதல் ட்ரோன் களஞ்சியங்கள், கடற்படை வசதிகள் மற்றும் ஈரானிய கடற்பரப்பைச் சுற்றியுள்ள இராணுவ தளவாட உள்கட்டமைப்புகள் ஆகியவை இந்த இலக்குகளில் அடங்குவதாக தெரிவிக்கப்பட்டுள்ளது.
நேற்றைய தினம் (8) நடத்தப்பட்ட முதற்கட்ட தாக்குதல்களின் போது ஈரானின் 80 இலக்குகள் மீது தாக்குதல் நடத்தப்பட்டதாக அமெரிக்க மத்திய கட்டளைகம் (US Central Command) தெரிவித்துள்ளது.
துருக்கியில் நடைபெற்ற நேட்டோ (NATO) உச்சிமாநாட்டில் பங்கேற்றுவிட்டு தனது நாட்டிற்குத் திரும்பும் வழியில், மில்டன்ஹால் (Mildenhall) விமானப்படைத் தளத்தில் ஊடகவியலாளர்களைச் சந்தித்த ஜனாதிபதி டிரம்ப், "நாங்கள் அவர்களுக்கு பலத்த அடியைக் கொடுத்துள்ளோம்," என்று கூறினார்.
மேலும், "நாங்கள் அவர்களுக்கு ஒன்றுக்கு இருபது என்ற விகிதத்தில் பதிலடி கொடுத்துள்ளோம். அதாவது எங்களைத் தாக்கும் ஒவ்வொரு தடவைக்கும், நாங்கள் இருபது மடங்கு தாக்குவோம்.. நேற்று இரவும் நாங்கள் அதனையே செய்தோம்," என்றும் அவர் குறிப்பிட்டார்.
இதேவேளை, ஹோர்முஸ் நீரிணையானது (Strait of Hormuz) ஈரானின் திட்டங்களின்படியே திறக்கப்படுமே தவிர, அமெரிக்காவின் அச்சுறுத்தல்களுக்குப் பயந்து அல்ல என ஈரானிய நாடாளுமன்ற சபாநாயகர் மொஹமட் பக்கேர் கலிபாப் சமூக வலைத்தளப் பதிவொன்றில் தெரிவித்துள்ளார்.
"அச்சுறுத்தல்களையும் வாக்குறுதி மீறல்களையும் அமெரிக்கா இனிமேலும் சும்மா பார்த்துக்கொண்டிருக்காது என்பதை அவர்கள் இன்னும் புரிந்து கொள்ளவில்லை. நான் எளிமையாகக் கூறுகிறேன்: நீங்கள் எங்களைத் தாக்கினால், எங்களிடமிருந்தும் உங்களுக்குத் தாக்குதல் வரும்," என அவர் பாரசீக மொழியில் சமூக வலைத்தளத்தில் பதிவிட்டுள்ளார்.
அமெரிக்காவின் இந்தத் தாக்குதல்களுக்கு மத்தியில், குவைத் மற்றும் பஹ்ரைனில் உள்ள இலக்குகள் மீது இரவு முழுவதும் புதிய தாக்குதல்களை நடத்தியதாக ஈரானிய இஸ்லாமிய புரட்சிகர காவல்படை (IRGC) தெரிவித்துள்ளதுடன், எதிரித் தாக்குதல்கள் நிறுத்தப்படாவிட்டால் வளைகுடா பிராந்தியத்தின் ஏனைய இலக்குகள் மீதும் தாக்குதல் நடத்தப்படும் என எச்சரித்துள்ளது.
அமெரிக்காவின் புதிய தாக்குதல்கள் ஈரானின் தெற்கு கடற்கரையில், ஹோர்முஸ் பிராந்தியத்திலிருந்து ஓமான் முனை வரை முன்னெடுக்கப்பட்டு வருவதாக ஈரானிய அரச ஊடகங்கள் தெரிவித்துள்ளன.