மிக மோசமான படுகொலைச் சம்பவத்தின் மத்தியில், அங்கு தடுப்புக்காவலில் வைக்கப்பட்டிருந்த இந்தியக் கைதிகளின் உயிர்களைப் பாதுகாப்பதற்காக கொழும்பிலுள்ள இந்திய உயர்ஸ்தானிகராலயம் அவசர அதிரடி தலையீட்டை மேற்கொண்டுள்ளது.
வடகடலில் வைத்து கடற்படையினரால் கைது செய்யப்பட்டு, நீர்கொழும்பு சிறைச்சாலையில் தடுத்து வைக்கப்பட்டிருந்த தமிழ்நாட்டின் பாம்பன் பகுதியைச் சேர்ந்த 12 மீனவர்களே, சிறையினுள் மோதல்கள் வெடித்ததையடுத்து இந்திய இராஜதந்திர அதிகாரிகளினால் பாதுகாப்பான வேறொரு இடத்திற்கு மாற்றப்பட்டுள்ளனர்.
ராமநாதபுரம் (ராமேஸ்வரம்) மீன்பிடித் திணைக்களத்தின் ஊடாக இத்தகவல்கள் தமக்குக் கிடைத்துள்ளதாக தமிழ்நாடு விசைப்படகு மீனவர் சங்கத்தின் பொதுச்செயலாளர் என். ஜே. போஸ் உறுதிப்படுத்தியுள்ளார்.
650 கைதிகளை மட்டுமே தடுத்து வைக்கக்கூடிய கொள்ளளவைக் கொண்ட நீர்கொழும்பு சிறைச்சாலையினுள், இச்சம்பவம் இடம்பெற்ற போது 2,400 இற்கும் அதிகமான கைதிகள் அடைக்கப்பட்டிருந்தனர் என்றும், இந்த அதீத நெருக்கடி நிலைமையே மோதலைக் கட்டுப்பாட்டிற்குள் கொண்டு வருவதற்குப் பெரும் தடையாக அமைந்தது என்றும் தெரிவிக்கப்படுகிறது.
பாதுகாப்பு காரணங்களுக்காக, உயிர் தப்பிய 12 இந்திய மீனவர்களும் தற்போது எந்த இடத்தில் தடுத்து வைக்கப்பட்டுள்ளார்கள் என்ற விபரத்தை பாதுகாப்புப் பிரிவினர் இதுவரை உத்தியோகபூர்வமாக வெளிப்படுத்தவில்லை.
சிறைச்சாலையினுள் ஏற்பட்ட அசாதாரண சூழ்நிலையையடுத்து, 734 கைதிகள் அடங்கிய குழுவொன்றை அவசர அவசரமாக நாட்டின் ஏனைய 4 சிறைச்சாலைகளுக்கு மாற்றுவதற்கு இலங்கை சிறைச்சாலைகள் திணைக்களம் நடவடிக்கை எடுத்துள்ளது.
இதேவேளை, தடுப்புக்காவலில் உள்ள அனைத்து இந்திய மீனவர்களையும் விடுவிப்பதற்கும், இவ்வாறானதொரு அச்சமூட்டும் சூழல்களிலிருந்து அவர்களை மீட்பதற்கும் டெல்லி (மத்திய) அரசாங்கம் உடனடியாக தலையிட வேண்டும் என தமிழ்நாடு மீனவர் சங்கங்கள் வலியுறுத்தியுள்ளன.