கொண்டு வருவதற்கு பாதுகாப்பு அதிகாரிகள் தற்போது நடவடிக்கை எடுத்துள்ளனர்.
அவ்விடத்தில் பாதுகாப்பிற்காக பொலிஸாரும் பொலிஸ் விசேட அதிரடிப்படையினரும் (STF) பெருமளவில் குவிக்கப்பட்டுள்ள அதேவேளை, பெண் கைதிகள் தொடர்ந்தும் போராட்டங்களில் ஈடுபட்டு வருவதாக சிறைச்சாலைகள் ஊடகப் பேச்சாளரும் சிறைச்சாலைகள் ஆணையாளருமான ஏ.சி. கஜநாயக்க தெரிவித்துள்ளார்.
நேற்று (06) இரவு நீர்கொழும்பு சிறைச்சாலையின் நிலைமைகளை நேரில் ஆராய்ந்த பின்னர் ஊடகங்களுக்கு கருத்து தெரிவிக்கும் போதே அவர் இதனை குறிப்பிட்டுள்ளார்.
இதேவேளை, நீர்கொழும்பு சிறைச்சாலைக்குள் ஏற்பட்ட மோதலில் படுகாயமடைந்த 20 பேர் மேலதிக சிகிச்சைகளுக்காக கொழும்பு தேசிய வைத்தியசாலையில் அனுமதிக்கப்பட்டுள்ளனர்.
அவர்களில் சிலரது நிலைமை கவலைக்கிடமாக உள்ளதாக வைத்தியசாலை வட்டாரங்கள் தெரிவிக்கின்றன. அத்துடன் மேலும் 58 பேர் நீர்கொழும்பு பொது வைத்தியசாலையில் சிகிச்சை பெற்று வருகின்றனர்.
கடந்த 5 ஆம் திகதி நீர்கொழும்பு சிறைச்சாலையில் போதைப்பொருள் கடத்தலுடன் தொடர்புடைய குழுவொன்றுக்கும், போதைப்பொருள் கடத்தலுக்கு எதிர்ப்புத் தெரிவிக்கும் குழுவொன்றுக்கும் இடையில் வன்முறை வெடித்திருந்தது.
இதன்போது இருதரப்பு கைதிகளும் காயமடைந்ததுடன், 2 கைதிகள் உயிரிழந்தும் 34 பேர் காயமடைந்தும் இருந்தனர்.
இதனைத் தொடர்ந்து நேற்று (06) முற்பகல் மீண்டும் நீர்கொழும்பு சிறைக் கைதிகளுக்கு இடையே மோதல் ஏற்பட்டது. இதன்போது சிறைச்சாலை அதிகாரிகள் நிலைமையைக் கட்டுப்படுத்த முயன்ற போது, கைதிகள் அவர்கள் மீது தாக்குதல் நடத்தியுள்ளனர்.
இம்மோதலில் சிறைச்சாலை அதிகாரிகள் மற்றும் கைதிகள் 100 க்கும் மேற்பட்டோர் காயமடைந்ததுடன், 7 சிறைச்சாலை அதிகாரிகளும் 17 கைதிகளும் உயிரிழந்துள்ளதாக அறிக்கை செய்யப்பட்டுள்ளது.
இதேவேளை, நீர்கொழும்பு சிறைச்சாலைக்குள் ஏற்பட்ட வன்முறைச் சம்பவங்கள் தொடர்பாக கொழும்பு குற்றத்தடுப்பு பிரிவினரும் (CCD) குற்றப்புலனாய்வு திணைக்களத்தினரும் (CID) விசாரணைகளை ஆரம்பித்துள்ளனர்.
நீர்கொழும்பு நீதவான் நீதிமன்றில் விபரங்களை அறிக்கை செய்த பின்னர், இச்சம்பவம் தொடர்பில் பொலிஸார் ஏற்கனவே விசாரணைகளை ஆரம்பித்துள்ளதாக பொலிஸ் ஊடகப் பிரிவு தெரிவித்துள்ளது.
பாதுகாப்பு காரணங்களுக்காக சிறைச்சாலையில் இருந்த சுமார் 700 கைதிகள் அங்குனகொலபெலஸ்ஸ, தும்பர, அனுராதபுரம், பொலன்னறுவை மற்றும் குருவிற்ற ஆகிய சிறைச்சாலைகளுக்கு மாற்றுவதற்கு நடவடிக்கை எடுக்கப்பட்டுள்ளதாக சிறைச்சாலைகள் திணைக்களம் குறிப்பிட்டுள்ளது.
இதேவேளை, நீர்கொழும்பு சிறைச்சாலையில் ஏற்பட்ட வன்முறைச் சம்பவம் தொடர்பாக முறையான மற்றும் விரிவான விசாரணைகளை நடத்தி அறிக்கை சமர்ப்பிப்பதற்கு அமைச்சரவையின் அனுமதி கிடைத்துள்ளது.
இதற்கமைய நேற்று கூடிய அமைச்சரவையினால், ஓய்வுபெற்ற உயர் நீதிமன்ற நீதியரசர் பிரியந்த பெர்னாண்டோ தலைமையில் இதற்கான குழு நியமிக்கப்பட்டுள்ளதாக அரசாங்க தகவல் திணைக்களம் தெரிவித்துள்ளது.
ஓய்வுபெற்ற மேலதிக சொலிசிட்டர் ஜெனரல் ஜனாதிபதி சட்டத்தரணி மிலிந்த குணதிலக்க மற்றும் ஜனாதிபதி சட்டத்தரணி மொஹான் வீரகோன் ஆகியோர் இக்குழுவின் ஏனைய உறுப்பினர்களாவர்.
இக்குழுவினால் இச்சம்பவம் குறித்த அனைத்து விபரங்களும் விரிவாக விசாரிக்கப்பட்டு, அதற்கான காரணங்கள், எடுக்கப்பட வேண்டிய நடவடிக்கைகள் மற்றும் இதுபோன்ற சம்பவங்கள் மீண்டும் ஏற்படுவதைத் தடுப்பதற்கான பரிந்துரைகள் உள்ளடங்கிய அறிக்கை அரசாங்கத்திடம் சமர்ப்பிக்கப்படவுள்ளது.
இதேவேளை, நீர்கொழும்பு சிறைச்சாலை மோதலில் உயிரிழந்தவர்களின் பிரேத பரிசோதனைகள் இன்று (07) நடத்தப்படவுள்ளன.
அத்துடன் உயிரிழந்த கைதிகளை அடையாளம் காண்பதற்கான சந்தர்ப்பம் உறவினர்களுக்கு வழங்கப்பட்டுள்ளது. உயிரிழந்தவர்களின் புகைப்படங்கள் வைத்தியசாலையில் காட்சிப்படுத்தப்பட்டுள்ளதுடன், அவற்றை அடையாளம் காண்பதற்கான வாய்ப்பு இன்றைய தினம் வழங்கப்பட்டுள்ளதாக நீர்கொழும்பு வைத்தியசாலை தெரிவித்துள்ளது.