புதிய விலங்கு நலன் மற்றும் விலங்குகள் திருத்தச் சட்டமூலங்கள் பாராளுமன்றில் சமர்ப்பிப்பு!

தண்டனைகள் மற்றும் விலங்குப் போக்குவரத்து உரிமங்களை ஒழுங்குபடுத்துதல்

119 ஆண்டுகள் பழமையான கட்டளைச் சட்டத்திற்குப் பதிலாகப் புதிய சட்டக் கட்டமைப்பு: அபராதங்கள் மற்றும் சிறைத்தண்டனைகள் அதிகரிப்பு

விலங்குகள் சட்டத் திருத்தம் மற்றும் போக்குவரத்து உரிம ஒழுங்குமுறை

1958ஆம் ஆண்டின் 29ஆம் இலக்க விலங்குகள் சட்டத்தை திருத்துவதற்கான சட்டமூலத்தை விவசாய அமைச்சு இன்று (06) பாராளுமன்றத்தில் சமர்ப்பிக்கவுள்ளது.

இதுவரை மாடுகள் மற்றும் எருமைகளைக் கொண்டு செல்வதற்கு மட்டுமே அமலிலிருந்த சட்ட விதிமுறைகள் மற்றும் அனுமதிப் பத்திரங்களைப் பெறுவதற்கான நடைமுறை, இந்தப் புதிய திருத்தத்தின் மூலம் பன்றிகள், செம்மறி ஆடுகள் மற்றும் வெள்ளாடுகளுக்கும் கட்டாயமாக்கப்படுகிறது.

நோயுற்ற விலங்குகளை வெவ்வேறு இடங்களுக்குக் கொண்டு செல்வதால் நோய்கள் பரவுவதைக் கட்டுப்படுத்துவதும், விலங்குகளிடமிருந்து மனிதர்களுக்குப் பரவும் நோய்களைக் குறைப்பதுமே இதன் முதன்மை நோக்கம் என விவசாய பிரதி அமைச்சர் நாமல் கருணாரத்ன தெரிவித்துள்ளார்.

விலங்கு நலன் சட்டமூலமும் தடை செய்யப்படும் செயல்களும்

119 ஆண்டுகள் பழமையான விலங்குகளைக் கொடூரமாக நடத்துவதைத் தடுக்கும் கட்டளைச் சட்டத்தை நீக்கி அறிமுகப்படுத்தப்படும் புதிய விலங்கு நலச் சட்டமூலத்தின் மூலம் பின்வருவன முற்றிலும் தடை செய்யப்பட்டுள்ளன:

• விலங்குகளைக் கொடூரமாக நடத்துதல், சித்திரவதை செய்தல், அதிக பாரம் சுமக்க வைத்தல் மற்றும் நகர முடியாதவாறு கூண்டுகளில் அடைத்து வைத்தல்.

• விலங்குகளுக்கு நஷம் அல்லது தீங்கு விளைவிக்கும் பொருட்களை வழங்குதல், குறுகிய சங்கிலிகளால் கட்டி வைத்தல், உணவு மற்றும் தண்ணீர் வழங்காதிருத்தல், பொறிகளை வைப்பது மற்றும் பறவைகளின் இறக்கைகளை வெட்டுவது அல்லது சிறைப்பிடித்தல்.

• மிருகவைத்தியர் அல்லது பதிவுசெய்யப்பட்ட ஆயுர்வேத மருத்துவரைத் தவிர வேறு ஒருவர் விலங்குகளுக்கு மருத்துவ சிகிச்சை, அறுவை சிகிச்சை அல்லது கருத்தடை செய்தல்.

• அழகுசாதனப் பரிசோதனைகளுக்கு (Cosmetics testing) விலங்குகளைப் பயன்படுத்துதல், விளையாட்டு மற்றும் பொழுதுபோக்கிற்காக விலங்குகளை வேட்டையாடுதல் அல்லது சண்டையிட வைத்தல்.

புதிய சட்டமூலத்தின் கீழான பிரதான தண்டனைகள்:

குற்றச்சாட்டுகள்	அபராதம் / சிறைத்தண்டனை
விலங்குகளைக் கொடூரமாக நடத்துதல்	ரூ. 250,000 வரை அபராதம் அல்லது 2 ஆண்டுகள் வரை சிறைத்தண்டனை (அல்லது இரண்டும்)
கொடூரமான முறையில் விலங்குகளைக் கொல்லுதல்	ரூ. 500,000 வரை அபராதம் அல்லது 3 ஆண்டுகள் வரை சிறைத்தண்டனை (அல்லது இரண்டும்)
சினைப்பட்ட (கர்ப்பிணி) விலங்குகளைக் கொல்லுதல் / விற்பனை செய்தல்	ரூ. 500,000 வரை அபராதம் அல்லது 4 ஆண்டுகள் வரை சிறைத்தண்டனை (அல்லது இரண்டும்)
விளையாட்டு / பொழுதுபோக்கிற்காக வேட்டையாடுதல்	ரூ. 250,000 வரை அபராதம் அல்லது 1 ஆண்டு வரை சிறைத்தண்டனை (அல்லது இரண்டும்)
போக்குவரத்து நிபந்தனைகளை மீறுதல்	ரூ. 300,000 வரை அபராதம் அல்லது 2 ஆண்டுகள் வரை சிறைத்தண்டனை (அல்லது இரண்டும்)

செல்லப்பிராணி விற்பனையகங்கள் மற்றும் சட்டக் காலக்கெடு

செல்லப்பிராணி விற்பனையகங்கள் அல்லது இனப்பெருக்க மையங்களை நடத்துவதற்கு உரிய உள்ளூராட்சி மன்றத்திடம் உரிமம் பெறுவது கட்டாயமாக்கப்பட்டுள்ளதுடன், வீதிகள் அல்லது பொது இடங்களில் விலங்குகளை விற்பனை செய்வதும் 16 வயதிற்குட்பட்டவர்களுக்கு விலங்குகளை விற்பனை செய்வதும் தடை செய்யப்படுகிறது.

ஆராய்ச்சி மற்றும் கல்வி நடவடிக்கைகளுக்கு விலங்குகளைப் பயன்படுத்தும்போது மாற்று வழிகள் மற்றும் கணினி மாதிரிகளைப் பயன்படுத்துவதில் கவனம் செலுத்த வேண்டும் எனச் சட்டமூலத்தில் குறிப்பிடப்பட்டுள்ளது.

இச்சட்டத்தின் கீழ் வரும் அனைத்துக் குற்றங்களும் பிடியாணை இன்றி கைது செய்யக்கூடிய குற்றங்களாகக் கருதப்படும் என்பதுடன், குற்றம் நடந்த திகதியிலிருந்து 12 மாத காலத்திற்குள் வழக்குத் தொடரப்பட வேண்டும்.