சுரேஷ் சலே கைதுக்கு எதிரான சத்தியாகிரகத்தில் நீதிமன்ற அவமதிப்பு: விசாரணை செய்ய மேன்முறையீட்டு நீதிமன்றிற்கு அறிக்கை சமர்ப்பிக்க உத்தரவு!

சிலருக்கு எதிராக மேன்முறையீட்டு நீதிமன்றில் தகவல்களைப் பதிவு செய்ய உத்தரவு

நீதிமன்ற நடவடிக்கைகளை விமர்சிக்கும் வகையில் கருத்துகளைத் தெரிவித்தமை தொடர்பாக குற்றப்புலனாய்வுத் திணைக்களம் (CID) விரிவான அறிக்கை தாக்கல்

மேன்முறையீட்டு நீதிமன்றத்திற்கு அறிக்கை சமர்ப்பிக்க உத்தரவு

பாஸ்கா (ஈஸ்டர்) தாக்குதல் தொடர் சம்பவங்கள் தொடர்பாகச் சந்தேகத்தின் பேரில் கைது செய்யப்பட்டுத் தடுப்புக் காவலில் விசாரிக்கப்பட்டு வரும் முன்னாள் தேசிய உளவுத்துறைத் தலைவர் துவான் சுரேஷ் சலேவை விடுவிக்குமாறு கோரி நடத்தப்பட்ட சத்தியாகிரகப் போராட்டத்தின் போது, நீதிமன்ற நடவடிக்கைகளை விமர்சிக்கும் வகையில் கருத்துகளைத் தெரிவித்தமை தொடர்பாக அரசியல் செயல்பாட்டாளர்கள் சிலருக்கு எதிராக நீதிமன்ற அவமதிப்புக் குற்றச்சாட்டுகளை மேன்முறையீட்டு நீதிமன்றத்தில் தாக்கல் செய்ய கோட்டை நீதவான் நீதிமன்றம் இன்று (05) உத்தரவிட்டுள்ளது.

இவ்வாறு மேன்முறையீட்டு நீதிமன்றத்தில் குற்றச்சாட்டுகளைப் பதிவு செய்வதற்குப் பெயர் குறிப்பிடப்பட்டுள்ளவர்கள்:

• முன்னாள் அமைச்சர்களான விமல் வீரவன்ச, உதய கம்மன்பில

• இலங்கை மக்கள் கட்சியின் தலைவர் அசங்க நவரத்ன

• சர்வசன பலய கட்சியின் தலைவரும் பாராளுமன்ற உறுப்பினருமான திலித் ஜயவீர

• முன்னாள் ஜனாதிபதியின் செயலாளர்களில் ஒருவரான சுகீஸ்வர பண்டார

• சிரேஷ்ட விரிவுரையாளர் மஹிந்த பத்திரண

குற்றப் புலனாய்வுத் திணைக்களத்தின் (CID) அறிக்கையும் சான்றுகளும்

குற்றப் புலனாய்வுத் திணைக்களம் (CID) இச்சம்பவம் தொடர்பாக மேற்கொண்ட விசாரணைகளின் முன்னேற்றம் மற்றும் விரிவான அறிக்கையைக் கோட்டை நீதவான் பசந்த அமரசேன முன்னிலையில் சமர்ப்பித்தது.

சுரேஷ் சலேவின் மருத்துவ நிலைமை குறித்து உத்தரவொன்றைப் பிறப்பிப்பதற்கு நீதிமன்றம் திகதியைத் தீர்மானித்திருந்த பின்னணியில், கோட்டை ரயில் நிலையத்திற்கு முன்பாக நடத்தப்பட்ட சத்தியாகிரகத்தின் போது உரையாற்றி, 2024ஆம் ஆண்டின் 08ஆம் இலக்க நீதிமன்ற அவமதிப்புச் சட்டத்தை மீறியுள்ளதாகக் குற்றப் புலனாய்வுத் திணைக்களம் நீதிமன்றத்தில் சுட்டிக்காட்டியுள்ளது.

இவ்விசாரணைகளுக்காக ITN, சிரச, சுவர்ணவாஹினி, தெரண உட்பட 10 இலத்திரனியல் ஊடக நிறுவனங்களின் திருத்தப்படாத (unedited) காணொளிகள், ஊடக மேலாளர்கள் மற்றும் ஊடகவியலாளர்களின் வாக்குமூலங்கள் மற்றும் சத்தியக் கடதாசிகள் சான்றுகளாக நீதிமன்றத்தில் ஒப்படைக்கப்பட்டுள்ளன.

நீதவானின் சட்ட ரீதியான தீர்மானம்

முன்வைக்கப்பட்ட  மற்றும் சான்றுகளைப் பரிசீலித்த கோட்டை நீதவான் பசந்த அமரசேன, குறித்த நபர்களால் வெளியிடப்பட்ட கருத்துகள் மூலம் நீதிமன்ற நடவடிக்கைகள் விமர்சனத்திற்கு உள்ளாகியுள்ளமை முதல் பார்வையில் (prima facie) தெளிவாகப் புலப்படுவதாகத் தெரிவித்துள்ளார்.

நீதிமன்றத்தின் சுயாதீனம் மற்றும் சட்டப்பூர்வ நடவடிக்கைகளுக்குப் பாதிப்பு ஏற்படுத்தும் வகையில் கருத்துகளைப் பரப்பியமை தொடர்பாக அடுத்தகட்ட சட்ட நடவடிக்கைகளை மேற்கொள்வதற்காக மேன்முறையீட்டு நீதிமன்றத்திற்கு (Court of Appeal) அறிக்கை சமர்ப்பிக்க நீதவான் தீர்மானித்துள்ளார்.