பரிசோதனை அறிக்கைகளின் துல்லியம் குறித்து சந்தேகம்: நோயாளிகளின் உயிருக்கும் ஆபத்தா?

• பரிசோதனை விலைக்கட்டுப்பாடு மற்றும் இரசாயனப் பொருட்களின் தரம் குறித்து மருத்துவச் சங்கத்திற்கும் NMRA இற்கும் இடையே கருத்து முரண்பாடு

• நோயாளிகளின் பாதுகாப்பிற்காக மருந்துகள் மற்றும் ஆய்வகங்களைக் முறைப்படுத்துவதற்கு முன்வைக்கப்பட்ட விசேட யோசனைகள்

உயர்தர இரசாயனப் பொருட்களைப் (reagents) பயன்படுத்தி நோயறிதல் பரிசோதனைகளை நடத்துவதற்குத் தனியார் வைத்தியசாலைகளுக்கு நிலவும் தடைகள் காரணமாக, வெளியிடப்படும் ஆய்வக அறிக்கைகளின் துல்லியம் குறித்தும் நோயாளிகளின் பாதுகாப்பு தொடர்பாகவும் பாரிய சிக்கல் நிலை உருவாகியுள்ளதாக மருத்துவ மற்றும் சிவில் உரிமைகளுக்கான வைத்தியர்களின் தொழிற்சங்கக் கூட்டமைப்பு (MCPA) தெரிவித்துள்ளது.

தற்போது அமலிலுள்ள சில விலைக் கட்டுப்பாடுகள் மற்றும் தடைகள் காரணமாகத் தனியார் வைத்தியசாலைகளுக்கு உயர்தர இரசாயனப் பொருட்களை இறக்குமதி செய்வதிலும் பயன்படுத்துவதிலும் தடைகள் ஏற்பட்டுள்ளதாக அச்சுங்கத்தின் தலைவர் மருத்துவர் சமல் சஞ்சீவ குறிப்பிட்டுள்ளார். இதன் விளைவாகச் சில நிறுவனங்களால் வெளியிடப்படும் ஆய்வக அறிக்கைகளின் தரம் குறைந்துள்ளதாகவும், தவறான ஆய்வக அறிக்கைகளின் அடிப்படையில் மேற்கொள்ளப்படும் நோயறிதல்களால் நோயாளிகளின் உயிருக்குக் கடுமையான ஆபத்து ஏற்படக்கூடும் என்றும் அவர் எச்சரிக்கிறார்.

மருந்துகள் மற்றும் பரிசோதனைகளை முறைப்படுத்த முன்வைக்கப்பட்ட யோசனைகள்

நாட்டின் மருந்து மற்றும் மருத்துவப் பரிசோதனை ஒழுங்குமுறை அமைப்பை வலுப்படுத்துவதற்குச் சில அவசர திருத்தங்களை மேற்கொள்ள வேண்டும் என மருத்துவர் சமல் சஞ்சீவ சுட்டிக்காட்டுகிறார்:

• டிஜிட்டல் கண்காணிப்பு முறைமை: மருந்துப் பதிவு மற்றும் அனுமதி வழங்கும் செயல்முறையைப் பொதுமக்கள் வெளிப்படைத்தன்மையுடன் கண்காணிக்கும் வகையில் மின்னணு முறைமையொன்றை உருவாக்குதல்.

• உடனடி அனுமதி நடைமுறை: உலக சுகாதார நிறுவனம் (WHO) மற்றும் அமெரிக்க உணவு மற்றும் மருந்து நிர்வாகம் (US FDA) போன்ற சர்வதேச அங்கீகாரம் பெற்ற நிறுவனங்களால் அங்கீகரிக்கப்பட்ட மருந்துகளுக்கு விரைவான அனுமதி வழங்கும் நடைமுறையை உருவாக்குதல்.

• தரக்கட்டுப்பாட்டு ஆய்வகங்களை நிறுவுதல்: நாட்டிற்கு இறக்குமதி செய்யப்படும் ஒவ்வொரு மருந்துத் தொகுதியையும் சந்தைக்கு விடுவிப்பதற்கு முன்னர் பரிசோதிப்பதற்காக உலக சுகாதார நிறுவனத்தின் தரத்திலான ஆய்வகமொன்றை (WHO-standard laboratory) நிறுவுதல்.

• சந்தைக் கண்காணிப்பு மற்றும் விலைச் சூத்திரம்: தரமற்ற மருந்துகள் சந்தைக்கு வருவதைத் தடுப்பதற்குத் தவறாமல் களப் பரிசோதனைகளை நடத்துதல் மற்றும் உலகளாவிய மருந்து விலைகள் மற்றும் டாலர் மாற்று விகிதத்தைக் கருத்திற் கொண்டு அறிவியல் ரீதியிலான விலைச் சூத்திரமொன்றை உருவாக்குதல்.

எழுந்த குற்றச்சாட்டுகளைத் தேசிய மருந்து ஒழுங்குமுறை அதிகாரசபை (NMRA) நிராகரிப்பு

இருப்பினும், மருத்துவ மற்றும் சிவில் உரிமைகளுக்கான வைத்தியர்களின் தொழிற்சங்கக் கூட்டமைப்பு சுமத்தும் இந்தக் குற்றச்சாட்டுகளைத் தேசிய மருந்து ஒழுங்குமுறை அதிகாரசபையின் (NMRA) தலைவரான நிபுணத்துவ மருத்துவர் ஆனந்த விஜேவிக்ரம திட்டவட்டமாக நிராகரித்துள்ளார்.

NMRA இன் விலைக் கட்டுப்பாடு காரணமாகத் தனியார் வைத்தியசாலைகளுக்கு உயர்தர இரசாயனப் பொருட்களைப் பயன்படுத்த முடியாமல் போயுள்ளதாகக் கூறப்படும் கூற்றுகள் உண்மையற்றவை எனக் குறிப்பிட்ட தலைவர், ஏதேனும் பரிசோதனைக்கு விலைக் கட்டுப்பாடு காணப்படுமாயின் அது சுகாதார அமைச்சினாலேயே மேற்கொள்ளப்பட்டுள்ளதே தவிரத் தேசிய மருந்து ஒழுங்குமுறை அதிகாரசபையினால் அல்ல என்றும் மேலும் விளக்கமளித்தார்.