உலகின் முதற்தர சுற்றுலாத்தலமாக இலங்கைக்கு சர்வதேச அங்கீகாரம்!

மிகச்சிறந்த தீவு சுற்றுலாத்தலமாக இலங்கை தெரிவு செய்யப்பட்டுள்ளது.

சர்வதேச சுற்றுலா ஊடகமான 'Big 7 Travel' அமைப்பினால் மேற்கொள்ளப்பட்ட புதிய தரப்படுத்தலுக்கு அமைய, சுற்றுலா செல்வதற்கு உகந்த உலகின் சிறந்த 50 தீவுகளுள் முதலிடத்தைப் பெற்றுக்கொள்ள இலங்கை சமர்த்தாகியுள்ளதாக வெளிநாட்டு ஊடகங்கள் செய்தி வெளியிட்டுள்ளன.

833 மைல் நீளமுள்ள கடற்கரை, கண்கவர் மத்திய மலைநாடு, உலகப் புகழ்பெற்ற தேயிலைத் தோட்டங்கள், வளமான கலாச்சார பாரம்பரியம் மற்றும் தனித்துவமான பல்லுயிர் பெருக்கம் ஆகியன இந்தத் தரவரிசையில் இலங்கை முன்னிலைக்கு வருவதற்கு முதன்மைக் காரணங்களாகக் குறிப்பிடப்பட்டுள்ளன.

அத்துடன், யால தேசிய பூங்கா மற்றும் யுனெஸ்கோ (UNESCO) உலக பாரம்பரியப் பட்டியலில் சேர்க்கப்பட்டுள்ள சிகிரியா உள்ளிட்ட முக்கிய சுற்றுலாத் தலங்களும் இந்த வெற்றியைப் பெற்றுக்கொள்வதற்குப் பங்களித்துள்ளதாக அந்த அறிக்கையில் தெரிவிக்கப்பட்டுள்ளது.

இதேவேளை, உலகின் சிறந்த 50 கடற்கரைகளின் பட்டியலில் இலங்கையின் உனவடுன (Unawatuna) கடற்கரை 26 ஆவது இடத்தைப் பிடித்துள்ளதாகவும் தெரிவிக்கப்படுகிறது.