'கர்தினால் ஆண்டகை ஈஸ்டர் தாக்குதலை விற்றுப் பிழைக்கவில்லை!'

அருவருக்கத்தக்க முயற்சிகளை ஆயர் பேரவை வன்மையாகக் கண்டிக்கிறது.

75 வயது பூர்த்தியடைந்தவுடன், மெல்கம் கர்தினால் ரஞ்சித் ஆண்டகை தனது ஓய்வுக் கடிதத்தை வத்திக்கானுக்கு அனுப்பி வைத்துள்ளார்.

பதவியிலிருந்து விலகும் திகதியைத் தீர்மானிக்கும் முழுமையான அதிகாரம் பரிசுத்த பாப்பரசருக்கு மட்டுமே உண்டு என்பதை நினைவூட்டுகிறது.

மெல்கம் கர்தினால் ரஞ்சித் ஆண்டகை தனது பதவிக்காலத்தை நீடித்துக் கொள்வதற்காக ஈஸ்டர் ஞாயிறு குண்டுவெடிப்புச் சம்பவத்தைப் பயன்படுத்துவதாக சில தரப்பினர் சுமத்தும் குற்றச்சாட்டுகளை இலங்கை கத்தோலிக்க ஆயர் பேரவை (CBCSL) உத்தியோகபூர்வ அறிக்கை ஒன்றின் மூலம் வன்மையாக நிராகரித்துள்ளது.

கத்தோலிக்க திருச்சபையின் நிர்வாகக் கட்டமைப்பு மற்றும் திருச்சபை சட்டம் (Canon Law) குறித்து முறையான புரிதல் இல்லாமல், பொதுமக்களை திசைதிருப்புவதற்காக முன்னெடுக்கப்படும் அரசியல் அல்லது திட்டமிட்ட பிரச்சாரங்கள் குறித்து ஆயர் பேரவை தனது கடுமையான அதிருப்தியை வெளிப்படுத்தியுள்ளது.

திருச்சபை சட்டமும் ஓய்வுக் கடிதமும்

கத்தோலிக்க திருச்சபையின் பாரம்பரிய விதிகளின்படி, எந்தவொரு ஆயரும் தமக்கு 75 வயது பூர்த்தியடைந்தவுடன், பரிசுத்த பாப்பரசரிடம் (Pope) தனது உத்தியோகபூர்வ ஓய்வுக் கடிதத்தை சமர்ப்பிப்பது கட்டாயமாகும்.

• கடிதம் ஏற்கனவே அனுப்பப்பட்டுள்ளது: மெல்கம் கர்தினால் ரஞ்சித் ஆண்டகைக்கு 75 வயது பூர்த்தியடைந்தவுடன், உரிய திருச்சபை விதிகளின்படி ஓய்வுபெறும் கடிதத்தை வத்திக்கானுக்கு அனுப்பியுள்ளதாக ஆயர் பேரவை உறுதிப்படுத்தியுள்ளது.

• வத்திக்கானின் முழு அதிகாரம்: ஓர் ஆயரின் ஓய்வு உத்தியோகபூர்வமாக நடைமுறைக்கு வரும் திகதியைத் தீர்மானிக்கும் அல்லது அவரது சேவைக் காலத்தை மேலும் நீடிப்பதா இல்லையா என்பதைத் தீர்மானிக்கும் முழுமையான அதிகாரம் உரோமையிலுள்ள அதிஉன்னத பரிசுத்த பாப்பரசருக்கு மட்டுமே உண்டு.

திருச்சபைக் கடப்பாடும் அதன் நிலைப்பாடும்

ஓய்வுக் கடிதத்தைச் சமர்ப்பித்த பின்னரும் கூட, வத்திக்கானின் பரிசுத்த பாப்பரசரிடமிருந்து உத்தியோகபூர்வ அங்கீகாரம் அல்லது மேலதிக உத்தரவுகள் கிடைக்கும் வரை, கத்தோலிக்க சட்டத்தின்படி கர்தினால் ஆண்டகை அந்தப் பதவியின் பொறுப்புகளையும் பணிகளையும் தொடர்ந்து முன்னெடுக்கக் கடமைப்பட்டுள்ளார்.

எனவே, வத்திக்கான் சட்டங்களின்படி இடம்பெறும் இந்தச் செயல்முறையை, ஈஸ்டர் தாக்குதலுக்கு நீதி பெற்றுக்கொள்வதற்கான கர்தினால் ஆண்டகையின் தலையீடுகளுடன் குழப்பிக்கொண்டு, அவரது தனிப்பட்ட பிம்பத்திற்குப் கங்கம் விளைவிக்க முயற்சிப்பது முற்றிலும் அடிப்படையற்றது என கத்தோலிக்க ஆயர் பேரவை வலியுறுத்துகிறது.

தொடர்புடைய அறிக்கை கீழே இணைக்கப்பட்டுள்ளது.

உத்தியோகபூர்வ ஆவணத்தின் தமிழாக்கம் 

இலங்கை கத்தோலிக்க ஆயர் பேரவை லங்காராம, 19, பால்கம்பே பிளேஸ், கொழும்பு - 08, இலங்கை.

எனவே, கர்தினால் ஆண்டகை தமது பதவிக்காலத்தை நீடிப்பதற்காக ஈஸ்டர் ஞாயிறு தாக்குதலைப் பயன்படுத்துகிறார் என்ற பிரச்சாரம் முற்றிலும் உண்மைக்குப் புறம்பானது என்பதோடு, உண்மையைத் திரித்து மக்களை திசைதிருப்ப முயலும் அருவருக்கத்தக்க ஒரு முயற்சியாகும்.

கத்தோலிக்க திருச்சபையின் விதமுறைகளை நடைமுறைப்படுத்தும் செயல்பாடுகளை, அரசியல் உலகில் நிலவும் அதிகாரப் போட்டிகளுடன் எவ்விதத்திலும் ஒப்பிட முடியாது. சாதாரண சிவில் சட்டத்தின் அதிகாரம் எப்போதும் அரசாங்கத்துடன் பிணைக்கப்பட்டிருக்கும் வேளையில், கத்தோலிக்க திருச்சபையின் அதிகாரம் 'இறைப்பணி' (Divine Service) என்பதனுள்ளேயே அடங்கியுள்ளது.

அதிஉன்னத மெல்கம் கர்தினால் ரஞ்சித் ஆண்டகை அகில உலக கத்தோலிக்க திருச்சபைக்கும், உள்ளூர் கத்தோலிக்க திருச்சபைக்கும் மகத்தான சேவையாற்றியுள்ளார். அத்துடன் ஈஸ்டர் ஞாயிறு தாக்குதலால் பாதிக்கப்பட்டவர்களுக்கு உண்மையும் நீதியும் பெற்றுக்கொடுப்பதற்காக அவர் நேர்மையான எண்ணத்துடன் தொடர்ந்து குரல் கொடுத்து வருகிறார்.

கர்தினால் ஆண்டகையின் இந்த முயற்சியை இலங்கை கத்தோலிக்க ஆயர் பேரவையும், ஒட்டுமொத்த இலங்கை கத்தோலிக்க மக்களும் பாராட்டுவதுடன், நாம் அனைவரும் அவருக்கு எமது முழுமையான ஒத்துழைப்பை வழங்குகிறோம் என்பதையும் இவ்விடத்தில் வலியுறுத்துகிறோம்.

(ஒப்பம்)

அதிஉன்னத ஹெரால்ட் அன்தனி பெரேரா ஆண்டகை

குருநாகல் கத்தோலிக்க ஆயர்

தலைவர், இலங்கை கத்தோலிக்க ஆயர் பேரவை

(ஒப்பம்)

அதிஉன்னத அன்டன் ரஞ்சித் ஆண்டகை

மட்டக்களப்பு திருத்தூதரக பரிபாலகர் / கொழும்பு துணை ஆயர்

பொதுச்செயலாளர், இலங்கை கத்தோலிக்க ஆயர் பேரவை

திகதி: 2026 ஜூலை 01 ஆம் நாள்