"இலங்கையின் கனிம வளங்களை எடுக்க முதலீட்டுத் தடைகளை நீக்க ஜனாதிபதி நடவடிக்கை!"

• 2026 தேசிய கனிமக் கொள்கையின் கீழ் அனுமதிப்பத்திரங்களைப் பெறுவதில் ஏற்படும் தாமதங்கள் மற்றும் நிறுவன ரீதியான சிக்கல்களைத் தீர்ப்பதற்குப் பேச்சுவார்த்தை.

• கச்சாப் பொருட்களை வெளிநாடுகளுக்கு அனுப்புவதற்குப் பதிலாக, மதிப்பு கூட்டப்பட்ட (Value Addition) தயாரிப்புகள் மூலம் அந்நியச் செலாவணியை அதிகரிக்கும் திட்டங்கள்.

இலங்கையிலுள்ள பெறுமதிமிக்க கனிம வளங்களை முறைப்படி ஆராய்ந்து, நாட்டிற்கு அதிக அந்நியச் செலாவணியை ஈட்டித்தரக்கூடிய ஒரு துறையாக அதனை மாற்றுவதற்கான புதிய அணுகுமுறை குறித்து அரசாங்கத்தின் கவனம் திரும்பியுள்ளது. ஏற்றுமதியை இலக்காகக் கொண்ட '2026 தேசிய கனிமக் கொள்கையின்' கீழ் கனிம வளத் துறையை அபிவிருத்தி செய்வது தொடர்பான விசேட கலந்துரையாடலொன்று ஜனாதிபதி அநுர குமார திசாநாயக்க தலைமையில் ஜனாதிபதி செயலகத்தில் அண்மையில் நடைபெற்றது.

நாட்டில் அதிக கனிம வளம் இருந்தபோதிலும், முதலீட்டாளர்கள் எதிர்கொள்ளும் நிர்வாக மற்றும் அனுமதிப்பத்திரங்களைப் பெறுவதிலுள்ள தாமதங்கள் காரணமாக அந்த வளங்களை வணிக ரீதியாகப் பயன்படுத்துவது வரையறுக்கப்பட்டுள்ளதாக இக்கலந்துரையாடலில் பிரதானமாகக் சுட்டிக்காட்டப்பட்டது.

அனுமதிப்பத்திரம் வழங்குவதில் உள்ள தடைகளும் கொள்கை ரீதியான சவால்களும்

கனிம ஆய்வு என்பது அதிக நிதிச் செலவுமிக்க மற்றும் நீண்டகால அபாயங்களைக் கொண்ட ஒரு முதலீட்டுத் துறையாகும். ஒரு கனிமப் படிவின் வணிக ரீதியான சாத்தியக்கூறுகளை உறுதிப்படுத்துவதற்கு முன்பே முதலீட்டாளர்கள் கணிசமான தொகையைச் செலவிட வேண்டியுள்ளது. இவ்வாறான பின்னணியில், அனுமதிப்பத்திரங்களைப் பெறும் நடைமுறை வெளிப்படைத்தன்மையின்றி இருத்தல் அல்லது பல அரச நிறுவனங்கள் ஊடாக நடக்கும் தாமதங்கள் காரணமாக, சர்வதேச முதலீடுகளை ஈர்ப்பதில் இலங்கை பிராந்தியப் போட்டியிண்மையில் பின்தள்ளப்படும் அபாயம் காணப்படுகிறது.

குறிப்பாக, அகழ்வாராய்ச்சி மற்றும் ஆய்வுகளுக்கான அனுமதிப்பத்திரங்களைப் பெறும்போது பல அரச நிறுவனங்களுடன் கையாள வேண்டியிருப்பதால் முதலீட்டாளர்கள் பல்வேறு சிரமங்களை எதிர்கொள்கின்றனர் என இக்கலந்துரையாடலில் வலியுறுத்தப்பட்டது. தற்போதைய கொள்கை கட்டமைப்பிலுள்ள பலவீனங்களை அடையாளங்கண்டு, முதலீடுகளை ஈர்க்கும் நடைமுறையில் அதிகபட்ச வெளிப்படைத்தன்மையைப் பேணுவசியத்தின் அவசியத்தையும், சம்பந்தப்பட்ட அனைத்து அரச நிறுவனங்களுக்கும் இடையே நல்லிணக்கத்தை கட்டியெழுப்ப வேண்டியதன் அவசியத்தையும் ஜனாதிபதி இங்கு சுட்டிக்காட்டினார்.

கச்சாப் பொருள் ஏற்றுமதிக்கு அப்பால்: மதிப்பு கூட்டுவதன் முக்கியத்துவம்

இலங்கையின் கனிம மணல், காரீயம் (Graphite) மற்றும் ஏனைய கனிம வளங்களை வெறும் கச்சாப் பொருட்களாகவோ அல்லது குறைந்தபட்ச பதப்படுத்தலுடனோ ஏற்றுமதி செய்வதற்குப் பதிலாக, அவற்றுக்கு அதிக மதிப்பு கூட்டுவதன் (Value Addition) மூலம் நாட்டிற்கு அதிகபட்ச பொருளாதார நன்மைகளை அடைய முடியும் என்பது பொருளாதார ஆய்வாளர்களின் கருத்தாகும். கனிமங்களைப் பிரித்தெடுத்தல் மற்றும் சுத்திகரிப்பு செய்தலை உள்நாட்டிலேயே மேற்கொண்டு, தொழில்நுட்ப உற்பத்தித் தொழில்களை அபிவிருத்தி செய்வதன் மூலம் வேலைவாய்ப்புகளை உருவாக்குவதுடன் ஏற்றுமதி வருவாயையும் கணிசமாக உயர்த்த முடியும்.

இருப்பினும், இத்தகைய உயர் தொழில்நுட்ப பதப்படுத்தல் தொழிற்சாலைகளை நிறுவுவதற்குப் பாரிய மூலதன முதலீடு தேவையாகும். கச்சாப் பொருள் விநியோகம், சட்டப் பாதுகாப்பு, உள்கட்டமைப்பு மற்றும் ஒழுங்குமுறை சூழல் குறித்து நம்பிக்கை ஏற்பட்டால் மட்டுமே முதலீட்டாளர்கள் இத்தகைய வசதிகளை நிறுவ முன்வருவார்கள்.

ஒருங்கிணைந்த பொறிமுறையின் அவசியத்தன்மை

2026 தேசிய கனிமக் கொள்கையை ஒரு வெற்றிகரமான நடைமுறைத் திட்டமாக மாற்றுவதற்கு முதலீட்டாளர் நட்புறவு மற்றும் திறமையான சூழல் உருவாக்கப்பட வேண்டும் என்பது இத்துறை சார்ந்தவர்களின் கருத்தாகும்.

• விரைவான அனுமதி: அனுமதிப்பத்திரங்களை விரைவாக வழங்குவதற்கு ஒற்றைச் சாளரம் (Single-window) அல்லது மத்தியமைக்கப்பட்ட அமைப்பொன்றை அறிமுகப்படுத்துதல்.

• தெளிவான காலக்கெடு: ஒப்புதல் அளிப்பதற்கான காலக்கெடு மற்றும் சுற்றாடல் தாக்க மதிப்பீட்டு விதிகளை மேலும் தெளிவானதாகவும் காலத்திற்கு ஏற்றதாகவும் மாற்றுதல்.

• ஒழுங்குமுறை கட்டமைப்பு: ஆய்வு உரிமைகள் வெற்றிகரமாக முடிந்த பிறகு, அகழ்வாராய்ச்சி உரிமைகளுக்குச் செல்வதற்கான வெளிப்படைத்தன்மை கொண்ட ஒழுங்குமுறை கட்டமைப்பை உருவாக்குதல்.

• புவியியல் தரவுகள்: புவியியல் தரவுகளை (Geological Data) நம்பகமான முறையில் பெறக்கூடிய சூழலை உருவாக்குதல்.

கைத்தொழில் மற்றும் தொழில்முனைவோர் அபிவிருத்தி அமைச்சர் சுனில் ஹந்துன்னெத்தி, இலங்கை முதலீட்டுச் சபையின் தலைவர், புவிச்சரிதவியல் அளவை மற்றும் சுரங்கப் பணியகம் (GSMB) மற்றும் இலங்கை கனிம மணல் நிறுவனம் (SLMSA) ஆகியவற்றின் தலைவர்கள் உள்ளிட்டோர் கலந்துகொண்ட இக்கலந்துரையாடலில் கவனத்தில் கொள்ளப்பட்ட விடயங்களைச் செயற்படுத்துவது, வரவிருக்கும் பொருளாதார மறுமலர்ச்சியில் கனிமத் துறையின் பங்களிப்பைத் தீர்மானிக்கும் பிரதான காரணியாக அமையும்.