இலங்கை மீண்டும் உயர் நடுத்தர வருமான நாடாக முன்னேற்றம்!

நெருக்கடியை எதிர்கொண்டு மூன்று வருடங்களின் பின்னர், இலங்கை தீவு மீண்டும் 'உயர் நடுத்தர வருமான நாடு' (Upper-Middle-Income Status) என்ற அந்தஸ்தைப் பெற்றுள்ளது.

உலக வங்கி நேற்று வெளியிட்ட அதன் புதிய வருமான வகைப்படுத்தல் புதுப்பித்தலில், இலங்கையை 'குறைந்த நடுத்தர வருமான நாடு' என்ற பிரிவிலிருந்து மீண்டும் தரம் உயர்த்தியுள்ளது.

கைத்தொழில்துறைகளின் பரந்த மீட்சி மற்றும் சுற்றுலா மற்றும் நிதிச் சேவைகளின் வளர்ச்சி ஆகியவற்றின் ஆதரவுடன், கடந்த 2025ஆம் ஆண்டில் நாட்டின் பொருளாதாரம் 5 சதவீதத்தால் வளர்ச்சியடைந்ததைத் தொடர்ந்தே இந்த தரம் உயர்த்தல் மேற்கொள்ளப்பட்டுள்ளது.

இது 2022ஆம் ஆண்டின் பொருளாதார சரிவிலிருந்து பெற்ற ஒரு பாராட்டுக்குரிய மீட்சியாகும் அத்துடன், கடினமான சீர்திருத்தத் திட்டத்தின் கீழ் ஸ்திரத்தன்மை மற்றும் வளர்ச்சியை மீட்டெடுப்பதில் இலங்கையின் முன்னேற்றத்திற்கு சர்வதேச ரீதியில் கிடைத்துள்ள புதிய சான்றளிப்பாகவும் இது அமைந்துள்ளது.

இலங்கையை "மீட்சியின் ஒரு கதை" என்று விவரித்துள்ள உலக வங்கி, "2022ஆம் ஆண்டில் கடுமையான பொருளாதார நெருக்கடி நாட்டை வீழ்ச்சியின் விளிம்பிற்கு கொண்டு சென்ற மூன்று வருடங்களின் பின்னர், கைத்தொழில்துறைகளின் மீள் எழுச்சி மற்றும் நிதி மற்றும் சுற்றுலாச் சேவைகளின் வளர்ச்சி காரணமாக 2025இல் உண்மையான மொத்த உள்நாட்டு உற்பத்தி (Real GDP) 5 சதவீதத்தால் வளர்ச்சியடைந்துள்ளது.

இந்த மறுவகைப்படுத்தலானது நாட்டின் நெகிழ்ச்சித்திறனை (Resilience) காட்டுகின்றது, எனினும் நாடு மிகக் குறுகிய எல்லையிலேயே இந்த வரம்பைக் கடந்துள்ளது" என மேலும் தெரிவித்துள்ளது.

பொருளாதார நடவடிக்கைகளை பலவீனப்படுத்தி, தனிநபர் வருமானத்தை வீழ்ச்சியடையச் செய்த தொடர்ச்சியான அதிர்ச்சிகளைத் தொடர்ந்து, உயர் நடுத்தர வருமான அந்தஸ்திலிருந்து நழுவிய இலங்கைக்கு இந்த தரம் உயர்த்தலானது ஒரு முக்கிய திருப்பமாகும்.

2019ஆம் ஆண்டின் உயிர்த்த ஞாயிறு தாக்குதல்கள், கோவிட்-19 உலகளாவிய தொற்றுநோய் மற்றும் அதனைத் தொடர்ந்து ஏற்பட்ட செலுத்தல் சமநிலை (Balance-of-Payments) நெருக்கடி ஆகியவற்றின் உச்சக்கட்டமாக, 2022இல் நாடு தனது இறையாண்மைக் கடன்களை செலுத்த முடியாமல் போனது (Sovereign Default). இது கடந்த தசாப்தங்களில் பொருளாதாரம் சந்தித்த மிக ஆழமான வீழ்ச்சிக்கு வழிவகுத்தது.

நேற்றைய மறுவகைப்படுத்தலானது, சர்வதேச நாணய நிதியத்தின் (IMF) ஆதரவுடன் மேற்கொள்ளப்பட்ட தூරநோக்குடைய பொருளாதார ஸ்திரப்படுத்தல் முயற்சிகள், நிதி ஒருங்குசேரல் (Fiscal Consolidation), நாணய சீர்திருத்தங்கள் மற்றும் வெளிநாட்டுக் கடன் மறுசீரமைப்பு ஆகியவற்றின் கீழ் அன்றிலிருந்து அடைந்துள்ள முன்னேற்றத்தைக் காட்டுகிறது.

சுற்றுலாத்துறையின் புத்துயிர், பலமடைந்துள்ள வெளிநாட்டுப் பணியாளர்களின் பணப்பரிமாற்றம், வெளிநாட்டுத் துறையின் மேம்பட்ட செயல்திறன் மற்றும் இரண்டு வருட பொருளாதார சுருக்கத்திற்குப் பிறகு மீண்டும் பொருளாதார வளர்ச்சிக்குத் திரும்பியமை ஆகியவையே இந்த மீட்சிக்குக் காரணமாக அமைந்துள்ளன.

இலாபங்கள் இலங்கையின் தனிநபர் மொத்த தேசிய வருமானத்தை (GNI per capita) உலக வங்கியின் உயர் நடுத்தர வருமான வரம்பிற்கு மேல் உயர்த்த உதவியுள்ளன.

இந்த தரம் உயர்த்தலானது இலங்கையின் பொருளாதார நற்சான்றுகளை பலப்படுத்துகிறது, இது அரசாங்கத்திற்கு அதிகளவிலான நேரடி வெளிநாட்டு முதலீடுகளை (FDI) ஈர்க்கவும், தனியார் துறை தலைமையிலான வளர்ச்சியை துரிதப்படுத்தவும், மூலதனத்திற்கான மிகவும் போட்டித்தன்மை வாய்ந்த இடமாக நாட்டை மீண்டும் நிலைநிறுத்தவும் உதவும்.

இருப்பினும், உலக வங்கியின் வருமான வகைப்படுத்தல்கள் மக்களின் வாழ்க்கைத்தரம் அல்லது வறுமை நிலைகளை நேரடியாகப் பிரதிபலிக்காது என்பது குறிப்பிடத்தக்கது.

உள்நாட்டு மற்றும் வெளிநாட்டு அழுத்தங்கள் அதிகரித்ததால் பொருளாதார வளர்ச்சி மந்தமடைந்து, வருமான மட்டங்கள் சரிவடைந்ததைத் தொடர்ந்து, குறைந்த நடுத்தர வருமான அந்தஸ்துக்கு வீழ்ச்சியடைவதற்கு முன்னர், இலங்கை முதன்முதலில் 2019ஆம் ஆண்டிலேயே உயர் நடுத்தர வருமானப் பிரிவிற்குள் நுழைந்திருந்தது.

உலக வங்கியின் 2026-27 வகைப்படுத்தல் சுழற்சியில் ஜோர்டான், மைக்ரோனேஷியா, பிலிப்பைன்ஸ் மற்றும் வியட்நாம் ஆகிய நாடுகளுடன் இணைந்து உயர் நடுத்தர வருமான அந்தஸ்துக்கு தரம் உயர்த்தப்பட்ட ஐந்து பொருளாதாரங்களில் இலங்கையும் ஒன்றாகும்.