மழை பெய்யாவிட்டால் மின் கட்டணம் உயரும் அபாயம்!

• எதிர்காலத்தில் எதிர்பார்த்தபடி மழை பெய்யாவிட்டால் மின்சாரக் கட்டணம் உயரும் அபாயம் உள்ளதாக ஸ்ரீலங்கா பொதுஜன பெரமுனவின் தேசிய அமைப்பாளர் டி.வி. சானக்க தெரிவிப்பு.

• மின்சாரக் கட்டணத்தை மூன்றில் ஒரு பங்காகக் குறைப்பதாக உறுதியளித்த தற்போதைய அரசாங்கம், நிலவிய கட்டணத்தை விட மூன்றில் ஒரு பங்கு வரை உயர்த்தியுள்ளதாகக் குற்றச்சாட்டு.

எதிர்காலத்தில் எதிர்பார்க்கப்படும் மழைவீழ்ச்சி கிடைக்காவிட்டால் மின்சாரக் கட்டணம் உயரும் அபாயம் உள்ளதாக ஸ்ரீலங்கா பொதுஜன பெரமுனவின் தேசிய அமைப்பாளரும் நாடாளுமன்ற உறுப்பினருமான டி.வி. சானக்க தெரிவித்துள்ளார்.

தனியார் தொலைக்காட்சி நிகழ்ச்சி ஒன்றில் கலந்துகொண்டு கருத்துத் தெரிவிக்கும் போதே அவர் இதனைக் குறிப்பிட்டார்.

மின்சாரக் கட்டணத்தை மூன்றில் ஒரு பங்காகக் குறைப்பதாக இந்த அரசாங்கம் அறிவித்த போதிலும், தற்போது நிலவிய மட்டத்தை விட மூன்றில் ஒரு பங்கினால் கட்டணம் உயர்த்தப்பட்டுள்ளதாக நாடாளுமன்ற உறுப்பினர் சுட்டிக்காட்டினார். அத்துடன், இனிவரும் காலங்களில் மீண்டும் கட்டணம் உயர்ந்தால் பொதுமக்கள் மட்டுமன்றி, வரவிருக்கும் சுற்றுலாப் பருவத்தைக் கருத்திற் கொண்டு சுற்றுலாத் துறையினாலும் அதனைத் தாங்கிக் கொள்ள முடியாமல் போகும் என அவர் வலியுறுத்தினார்.

கடந்த காலங்களில் கிடைத்த மழைவீழ்ச்சி மூலம் நீர்மின் உற்பத்தியைச் ஓரளவுக்குப் பெற்றுக்கொள்ள முடிந்ததாகவும், பகல் வேளையில் சூரிய சக்தியைப் பயன்படுத்தி அமைப்பை ஸ்திரப்படுத்த முடிந்ததாகவும் அவர் குறிப்பிட்டார்.

மேலும், கடந்த மின்சாரக் கட்டணத் திருத்தத்தின் போது நிலக்கரி நஷ்டத்தில் 10 சதவீதமே உள்ளடக்கப்பட்டதாகவும், எதிர்காலத்தில் புதிய நிலக்கரி கப்பல்கள் வருகை தந்து மின் உற்பத்தி செய்யப்படும் வரை இந்த நஷ்டத்திலிருந்து தப்பிக்க முடியாது என்றும், அந்த நஷ்டத்தை வரிப்பணம் மூலமாகவோ அல்லது நுகர்வோரிடமிருந்தோ அறவிட வேண்டியிருக்கும் என்றும் அவர் மேலும் தெரிவித்தார்.

நாடாளுமன்ற உறுப்பினர் டி.வி. சானக்க மேலும் தெரிவித்ததாவது:

"இந்த நேரத்தில் வழக்கத்திற்கு மாறான ஒரு சாதகமான நிலை இருந்தது. நீர்மின்சாரம் வழக்கமாகப் பெற முடியாத காலத்தில், அதாவது எல் நினோ நிலவும் சூழலில் வழக்கத்திற்கு மாறாக இருமுறை நல்ல மழை பெய்தது. அதனால் நீர்மின்சாரம் மூலம் அமைப்பை ஓரளவுக்கு ஸ்திரப்படுத்த முடிந்தது. பகல் நேரத்தை சூரிய சக்தி மூலம் சமாளித்தோம்.

நிலக்கரி மோசடியினால் ஏற்பட்ட நஷ்டத்தில் 10 சதவீதம் மட்டுமே முந்தைய மின்கட்டண உயர்வில் சேர்க்கப்பட்டது. ஆனால் அடுத்த கட்டணத் திருத்தத்தில் நிலக்கரி மோசடியின் நஷ்டத்தை மின்கட்டணத்தில் சேர்க்க வேண்டும் அல்லது அரசாங்கம் வரிப்பணத்தில் இருந்து செலுத்த வேண்டும். புதிய கப்பல்கள் வரத் தொடங்கி மின் உற்பத்தி செய்யும் வரை, அதாவது இன்னும் 2 அல்லது 3 வாரங்களுக்கு இந்த மோசடி நஷ்டத்தை மக்கள் மீது சுமத்துவதைத் தடுக்க முடியாது.

இந்த ஊழல் நடந்திருக்காவிட்டால், தற்போதைய மழையுடன் பகலில் சூரிய சக்தியையும் பயன்படுத்தி சமாளித்திருக்கலாம். நுரைச்சோலை மின்நிலையத்தில் தற்போது 300 மெகாவாட் குறைந்துள்ளது. அதுவும் இருந்திருந்தால் டீசல், பர்னஸ் எண்ணெயைப் பயன்படுத்த வேண்டிய அவசியமே வந்திருக்காது.

நிச்சயமாக மின்சாரக் கட்டண உயர்வை நோக்கி நகர வேண்டியிருக்கும். இல்லையெனில் வரவிருக்கும் காலத்தில் விசேடமாக மழை பெய்து ஆசீர்வாதமாக அமைய வேண்டும். கடந்த கால நிலக்கரி நஷ்டமும் இணையவுள்ளதால் கட்டணம் உயர்வது உறுதி. சுற்றுலாப் பருவம் தொடங்கவுள்ள நிலையில் இக்கட்டண உயர்வை யாராலும் தாங்க முடியாது."