உலக உணவு மாநாட்டில் பங்கேற்கச் சென்ற பிரதமர் ஹரிணியை வரவேற்க பூட்டான் பிரதமர் வருகை!

• நிலையான உணவுப் பாதுகாப்பு மற்றும் பலதரப்பட்ட நெருக்கடிகளை எதிர்கொள்வது குறித்த இலங்கையின் நிலைப்பாடு இன்று உலகிற்கு வெளிப்படுத்தப்படும்.

• பூட்டான் தலைவர்கள் மற்றும் ஐ.நா. பிரதிநிதிகளுடன் உயர்மட்ட இருதரப்பு பேச்சுவார்த்தைகள்.

பூட்டானில் நடைபெறும் விழிப்புணர்வு உணவு முறைமைகள் பற்றிய உலகளாவிய மாநாட்டில் (Global Conscious Food Systems Summit - GCFSS 2026) பங்கேற்பதற்காகத் தீவிலிருந்து புறப்பட்ட இலங்கை பிரதமர் கலாநிதி ஹரிணி அமரசூரிய நேற்று (ஆகஸ்ட் 31) பிற்பகல் பூட்டானின் பாரோ சர்வதேச விமான நிலையத்தைச் சென்றடைந்தார்.

அங்குப் பிரதமரை வரவேற்பதற்காகப் பூட்டான் பிரதமர் ஷெரிங் தோப்கே (Tshering Tobgay) தலைமையிலான அந்நாட்டு அரசாங்கத்தின் உயர்மட்ட இராஜதந்திரக் குழுவினர் விமான நிலையத்திற்கு வருகை தந்திருந்தமை விசேட அம்சமாகும். பூட்டானின் வெளி விவகார மற்றும் வெளிநாட்டு வர்த்தக அமைச்சர், கல்வி மற்றும் திறன் மேம்பாட்டு அமைச்சர், வங்காளதேசத்திற்கான இலங்கைத் தூதர், இலங்கைகளுக்கான பூட்டான் தூதர் மற்றும் ஐக்கிய நாடுகள் அபிவிருத்தித் திட்டத்தின் (UNDP) சிரேஷ்ட அதிகாரிகள் பலரும் இந்நிகழ்வில் கலந்துகொண்டனர்.

விழிப்புணர்வு உணவு முறைமைகள் குறித்த உலகளாவிய அவதானம்

பூட்டான் அரசாங்கம், விழிப்புணர்வு உணவு முறைமைகள் கூட்டணி (CoFSA) மற்றும் ஐக்கிய நாடுகள் அபிவிருத்தித் திட்டம் (UNDP) ஆகியன இணைந்து ஏற்பாடு செய்துள்ள இம்மாநாடு ஆகஸ்ட் 31 முதல் செப்டம்பர் 04 வரை ஐந்து நாட்கள் நடைபெறுகிறது.

"உணவு முறைமைகளின் மாற்றத்தின் மையத்தை இயக்குதல்" (Activating the Heart of Food Systems Transformation) என்பது இம்முறை மாநாட்டின் பிரதான தீமாக அமையும் அதேவேளையில், வெறும் உற்பத்தி இலக்குகளுக்கு அப்பாற்பட்டு நிலைத்தன்மை, மீளுருவாக்கம் செய்யும் உணவு முறைமைகள், மனித விழுமியங்கள், கலாச்சார பின்னணி மற்றும் உளவியல் அணுகுமுறை மாற்றங்கள் மூலம் உலக உணவு நெருக்கடிக்குத் தீர்வு காண்பதே இதன் முதன்மை நோக்கமாகும்.

இலங்கை பிரதமரின் பிரதான உரை

மாநாட்டின் தொடக்க அமர்வு இன்று (செப்டம்பர் 01) டுங்கார் சொங்கில் (Dungkar Dzong) நடைபெறும் நிலையில், இலங்கை பிரதமர் கலாநிதி ஹரிணி அமரசூரிய அதில் பிரதான உரை ஆற்றவுள்ளார்.

"நெருக்கடிகளை எதிர்கொள்ள விழிப்புணர்வுடன் எழுச்சி பெறுதல்" (Rising to the Moment: Igniting Consciousness to Address the Polycrisis) என்ற தலைப்பில் அவர் உரையாற்றவுள்ளதுடன், தற்போதைய உலகம் எதிர்கொள்ளும் காலநிலை மாற்றம், பொருளாதார அழுத்தங்கள் மற்றும் வளப் பற்றாக்குறைக்கு மத்தியில் மக்கள் மைய மற்றும் சுற்றாடல் நட்புடனான உணவுப் பாதுகாப்பைக் கட்டியெழுப்புவது தொடர்பான இலங்கையின் அனுபவங்களையும் தொலைநோக்கையும் சர்வதேச சமூகத்தின் முன் வைக்கவுள்ளார்.

உயர்மட்ட இராஜதந்திர சந்திப்புகள்

மாநாட்டிற்கு சமாந்தரமாகப் பிரதமர் பல இருதரப்பு இராஜதந்திர பேச்சுவார்த்தைகளிலும் ஈடுபடவுள்ளார்.

அதற்கமைய, பூட்டான் பிரதமர், அந்நாட்டின் கல்வி மற்றும் திறன் மேம்பாட்டு அமைச்சர் மற்றும் மாநாட்டில் கலந்துகொள்ளும் ஐக்கிய நாடுகளின் முன்னாள் பொதுச்செயலாளர் உட்பட சர்வதேச நிபுணர்கள் மற்றும் உயர்மட்டப் பிரதிநிதிகளுடன் விசேட கலந்துரையாடல்களை நடத்தத் திட்டமிடப்பட்டுள்ளது.

தெற்காசிய பிராந்தியத்தில் சுற்றாடல் பாதுகாப்பு மற்றும் மொத்த தேசிய மகிழ்ச்சிக் குறியீட்டை (Gross National Happiness) முன்நிறுத்திய அபிவிருத்தி தொடர்பில் உலகக் கவனத்தை ஈர்த்த பூட்டானுடன் இலங்கை பேணி வரும் நீண்டகால நட்புறவையும் ஒத்துழைப்பையும் புதிய துறைகளில் மேலும் விரிவுபடுத்துவதற்கு இப்பயணம் ஒரு முக்கிய மைல்கல்லாக அமையும் என எதிர்பார்க்கப்படுகிறது.