உலகளவில் தீவிரமடைந்து வரும் 'எல் நினோ' (El Niño) காலநிலை மாற்றம் காரணமாக, எதிர்வரும் மாதங்களில் இலங்கை உட்பட ஆசிய பசிபிக் பிராந்தியத்தைச் சேர்ந்த பல நாடுகள் காலநிலை மற்றும் உணவுப் பாதுகாப்பு அபாயங்களை எதிர்கொள்ளக்கூடும் என ஐக்கிய நாடுகள் சபையின் புதிய மதிப்பீட்டு அறிக்கை சுட்டிக்காட்டியுள்ளது.
இவ்வறிக்கையில் இலங்கை "அதிக கவனம் செலுத்தப்பட வேண்டிய நாடு" (Elevated Concern) என வகைப்படுத்தப்பட்டுள்ளது.
மழைவீழ்ச்சி மாற்றமும் விவசாயச் சவால்களும்
ஐக்கிய நாடுகளின் உணவு மற்றும் விவசாய அமைப்பு (FAO), உலக உணவுத் திட்டம் (WFP), உலக வானிலை அமைப்பு (WMO) உள்ளிட்ட பல நிறுவனங்கள் இணைந்து தயாரித்துள்ள இவ்வறிக்கையின்படி, எதிர்வரும் ஒக்டோபர் மாதம் ஆரம்பமாகும் இரண்டாவது இடை-பருவமழை காலப்பகுதியில் இலங்கையில் வழக்கத்தை விட அதிக மழைவீழ்ச்சி பதிவாக வாய்ப்புள்ளது.
இந்த மேலதிக மழை நீர்த்தேக்கங்கள் நிறைவதற்கு உதவியாக இருக்கும் போதிலும், எதிர்வரும் 'மகா' பயிர்ச்செய்கை பருவம் ஆரம்பிக்கும் போதே கனமழை பெய்யக்கூடும் என்பதால் வெள்ளப்பெருக்கு, விவசாய நிலங்கள் நீரில் மூழ்கிப் போதல் மற்றும் விவசாய நடவடிக்கைகள் தாமதமடைதல் போன்ற பிரச்சினைகள் உருவாகலாம் எனத் தெரிவிக்கப்பட்டுள்ளது.
அத்துடன், உலகளாவிய சந்தை காரணிகளால் எரிபொருள் மற்றும் உரங்களின் விலைகள் உயர் மட்டத்தில் காணப்படுவதும் உள்நாட்டு உணவு உற்பத்திக்கு மேலதிக அழுத்தத்தை ஏற்படுத்தும் காரணியாக அடையாளப்படுத்தப்பட்டுள்ளது.
தற்போது நிலவும் வறட்சியும் அரசாங்கத்தின் தலையீடும்
எதிர்கால வானிலை முன்னறிவிப்புகள் இவ்வாறு இருக்கையில், தற்போது நிலவும் வறட்சியான காலநிலை காரணமாக அனுராதபுரம் உள்ளிட்ட பல பகுதிகளில் நீர்த்தேக்கங்கள் வற்றிப்போய் குடிநீர் விநியோகம் மற்றும் விவசாய நடவடிக்கைகளுக்குப் பாதிப்பு ஏற்பட்டுள்ளதாக அனுராதபுரம் மாவட்ட செயலாளர் ரஞ்சித் விமலசூரிய தெரிவித்துள்ளார்.
இதற்கிடையில், நிலவும் பாதகமான காலநிலையால் பாதிக்கப்பட்ட விவசாயிகளுக்கு நஷ்டஈடு வழங்க நடவடிக்கை எடுக்கப்படும் என விவசாய பிரதி அமைச்சர் நாமல் கருணாரத்ன குறிப்பிட்டுள்ளார். எதிர்வரும் பயிர்ச்செய்கை பருவங்களில் ஏற்படக்கூடிய சேதங்களைக் குறைப்பதற்காக விசேட மேலாண்மை திட்டமொன்றும் நடைமுறைப்படுத்தப்பட்டு வருவதாகத் தெரிவிக்கப்படுகிறது.
ஒருங்கிணைந்த முன்ஆயத்தத்தின் முக்கியத்துவம் குறித்து எதிர்க்கட்சி அவதானம்
காலநிலை மாற்றத்தால் ஏற்படும் சவால்கள் குறித்துக் கருத்துத் தெரிவித்துள்ள எதிர்க்கட்சித் தலைவர் சஜித் பிரேமதாச, வறட்சியைத் தொடர்ந்து ஏற்படக்கூடிய வெள்ளப்பெருக்கு மற்றும் நிலச்சரிவு போன்ற இரட்டை பேரரிடர்களைக் கையாள்வதற்கு அனைத்துத் துறைகளும் இணைந்து செயற்பட வேண்டும் எனச் சுட்டிக்காட்டியுள்ளார்.
கொழும்பில் சிவில் அமைப்புகளின் பிரதிநிதிகளைச் சந்தித்த போதும், தனது உத்தியோகபூர்வ 'X' சமூக வலைத்தளப் பக்கத்திலும் கருத்துப் பகிர்ந்துள்ள அவர், இவ்வாறான உயர் அபாயகரமான சூழலில் உயிர் மற்றும் உடைமைகளைப் பாதுகாக்க விரிவான அவசரகால திட்டமொன்றும் (Contingency Plan) முன்ஆயத்தங்களும் அவசியம் எனத் தெரிவித்துள்ளார்.
சஜித் பிரேமதாச தனது 'X' பக்கத்தில் பதிவிட்டுள்ளதாவது:
"எல் நினோ காரணமாக ஒன்று அல்ல, இரண்டு பேரழிவுகள் ஏற்பட அதிக வாய்ப்புள்ளது. ஆண்டின் இறுதி வரை வறட்சி இருக்கும் என எதிர்பார்க்கப்படுகிறது. பின்னர் மழை திரும்பும்போது வெள்ளமும் நிலச்சரிவும் ஏற்படும். உயிர் மற்றும் உடைமைகளைப் பாதுகாக்க அரசாங்கத்திடம் எந்தவொரு அவசரகால திட்டமும் இல்லை. இவ்வளவு பெரிய எச்சரிக்கை விடுக்கப்பட்ட பின்னரும் ஆயத்தமின்றி இருப்பது முற்றிலும் அலட்சியப் போக்காகும்."
எப்படியிருப்பினும், இந்த காலநிலை அபாய நிலைமை இன்னும் முழுமையான சமூக அல்லது பொருளாதார நெருக்கடியாக உருவெடுக்கவில்லை என்பதால், அரசாங்க பொறிமுறை, சிவில் அமைப்புகள் மற்றும் தொடர்புடைய தரப்பினர் இணைந்து பேரழிவு முன்ஆயத்த நடவடிக்கைகளைப் பலப்படுத்துவதற்கு இன்னும் அவகாசம் உள்ளதாக ஐக்கிய நாடுகளின் அறிக்கை வலியுறுத்துகிறது.