இந்திய நிதியுதவியின் கீழ் இயங்கும் திட்டங்களை விரைவுபடுத்த புதிய நடவடிக்கை!

கண்காணிப்பதற்கும் விசேட பிரிவு நிறுவல்

450 மில்லியன் டொலர் நிதியுதவி மற்றும் கடன் தொகுப்பு உட்பட பல அமைச்சுகளின் கீழ் முடங்கிக் கிடந்த திட்டங்களை மீண்டும் புதுப்பிக்க நடவடிக்கை

இந்தியத் திட்டங்களை மீண்டும் புதுப்பித்தலும் உயர்மட்ட மறுஆய்வும்

இலங்கையின் தற்போதைய பொருளாதார மீட்புச் செயல்பாட்டை வலுப்படுத்துதல், உட்கட்டமைப்பு வசதிகளை விரிவுபடுத்துதல் மற்றும் இரு நாடுகளுக்கும் இடையிலான நீண்டகால முதலீட்டு ஒத்துழைப்பை மேம்படுத்தும் நோக்கில், இந்திய நிதியுதவி மற்றும் கடன் திட்டங்களின் கீழ் செயற்படுத்தப்படும் அபிவிருத்தித் திட்டங்களை விரைவுபடுத்த இலங்கை அரசாங்கம் நடவடிக்கை எடுத்துள்ளது. பல்வேறு துறைகளில் நிலவிய நிர்வாக மற்றும் செயல்பாட்டுத் தடைகளை நீக்கி, திட்டங்களின் முன்னேற்றத்தைச் சீரமைப்பதே இந்நடவடிக்கையின் முக்கிய நோக்கமாகும்.

இது தொடர்பான உயர்மட்ட விசேட மறுஆய்வுக் கலந்துரையாடல், இலங்கை அரசாங்கத்தின் சார்பில் தொழிலாளர் அமைச்சரும் நிதி மற்றும் திட்டமிடல் பிரதி அமைச்சருமான கலாநிதி அனில் ஜெயந்த பெர்னாண்டோ (Dr. Anil Jayantha Fernando) மற்றும் இலங்கைகான இந்திய உயர்ஸ்தானிகர் சந்தோஷ் ஜா (Santosh Jha) ஆகியோருக்கு இடையில் ஜனாதிபதி செயலகத்தில் நடைபெற்றது. இதன்போது, திட்டங்கள் தாமதமாவதற்குக் காரணமான சிவப்பு நாடாக்கள் (Red tape) மற்றும் நிர்வாகச் சிக்கல்களை அகற்றுதல், பழைய ஒப்பந்தங்களைப் புதுப்பித்தல் மற்றும் திட்டங்களை திறம்பட முன்னெடுத்துச் செல்வதற்காகக் கூடுதல் சுறுசுறுப்பான பொறிமுறையொன்றை உருவாக்குவது குறித்தும் விரிவாகக் கலந்துரையாடப்பட்டது.

பொருளாதார முக்கியத்துவமும் அமைச்சுகளின் மட்டத்திலான அவதானிப்பும்

உட்கட்டமைப்பு, போக்குவரத்து, எரிசக்தி, வீடமைப்பு, மீன்பிடி மற்றும் சமூக அபிவிருத்தி போன்ற பிரதான துறைகளில் இலங்கையின் முக்கிய அபிவிருத்திப் பங்காளியாக இந்தியா செயல்பட்டு வருகின்றது. இவ்வாறான பாரிய திட்டங்கள் தாமதமாவதால் திட்டச் செலவுகள் அதிகரித்தல், பொருளாதாரப் பலன்கள் மக்களைச் சென்றடைவதில் தாமதம் ஏற்படுதல், அத்துடன் வேலைவாய்ப்பு உருவாக்கம் மற்றும் பிரதேச அபிவிருத்தியில் ஏற்படும் எதிர்மறையான தாக்கங்கள் குறித்தும் இதன்போது கவனம் செலுத்தப்பட்டது.

போக்குவரத்து, நெடுஞ்சாலைகள் மற்றும் நகர அபிவிருத்தி, துறைமுகங்கள் மற்றும் சிவில் விமானப் போக்குவரத்து, தோட்ட உட்கட்டமைப்பு, வீடமைப்பு மற்றும் நீர் வழங்கல், மீன்பிடி மற்றும் நீரியல் வளங்கள், அறிவியல் மற்றும் தொழில்நுட்பம், அத்துடன் நீதி மற்றும் தேசிய ஒருமைப்பாடு ஆகிய அமைச்சுகளின் கீழ் செயற்படுத்தப்படும் இந்திய நிதியுதவி பெறும் அனைத்துத் திட்டங்கள் குறித்தும் இதன்போது விரிவான மதிப்பீடு மேற்கொள்ளப்பட்டது.

ஜனாதிபதி செயலகக் கண்காணிப்புப் பிரிவும் 450 மில்லியன் டொலர் தொகுப்பும்

திட்டங்களைச் செயற்படுத்தும்போது காணப்படும் சிக்கல்களை விரைவாகக் கண்டறிந்து, அமைச்சுகளுக்கு இடையிலான தொடர்பாடலை மேம்படுத்துவதற்காக ஜனாதிபதி செயலகத்திற்குள்ளேயே பிரத்யேகக் கண்காணிப்புப் பிரிவொன்றை நிறுவுவதற்கு அரசாங்கம் தீர்மானித்துள்ளது. இதன் மூலம் இராஜதந்திர மட்டத்தில் ஒதுக்கீடு செய்யப்படும் நிதிப் பங்களிப்புகள், நடைமுறை சாத்தியமான உட்கட்டமைப்புகளாக மாறுவது உறுதி செய்யப்படும்.

குறிப்பாக, அசம்பாவிதங்கள் மற்றும் பேரிடர்களுக்குப் பின்னரான உட்கட்டமைப்பு மறுசீரமைப்பு மற்றும் பாதிக்கப்பட்ட சமூகங்களை மேம்படுத்துவதற்காக இந்தியாவினால் வழங்கப்பட்டுள்ள 450 மில்லியன் டொலர் மானிய உதவி மற்றும் கடன் உதவித் தொகுப்பின் கீழ் உள்ள திட்டங்களை விரைவுபடுத்துவதற்கு இக்கலந்துரையாடல்களில் முன்னுரிமை அளிக்கப்பட்டது.

வெளிநாட்டு நிதியுதவி பெறும் திட்டங்களை விரைவுபடுத்துவதன் மூலம் உள்நாட்டு கட்டுமானத் துறைக்கு புத்துயிரளித்தல், புதிய வேலைவாய்ப்புகளை உருவாக்குதல், போக்குவரத்து மற்றும் துறைமுகத் துறைகளின் செலவுகளைக் குறைத்தல் மற்றும் சர்வதேச முதலீட்டாளர்களின் நம்பிக்கையை உறுதிப்படுத்துதல் என்பன எதிர்பார்க்கப்படுகின்றன. இலங்கைக்கும் இந்தியாவுக்கும் இடையிலான பொருளாதார ஒத்துழைப்பு வெறுமனே நிதி உதவியைப் பெறுவதற்கும் அப்பால் சென்று நடைமுறைச் சாத்தியமான மற்றும் நிலையான அபிவிருத்தி இலக்குகளை நோக்கிச் செலுத்துவதே இதன் முதன்மை நோக்கமாகும்.