வெள்ளவத்தையில் உள்ள சொகுசு வீட்டுத் தொகுதியில் கண்டெடுக்கப்பட்ட தங்க முலாம் பூசப்பட்ட T-56 துப்பாக்கியின் உரிமை தொடர்பாக கைது செய்யப்பட்ட முன்னாள் அமைச்சர் துமிந்த திசாநாயக்க, இன்று கல்கிஸை நீதவான் நீதிமன்றத்தில் முன்னிலைப்படுத்தப்பட்டார்.
பயங்கரவாத புலனாய்வுப் பிரிவு, அவரிடமிருந்து வாக்குமூலங்களைப் பதிவு செய்துள்ளதாக கூறப்படுகிறது. பம்பலப்பிட்டி பகுதியில் உள்ள ஒரு வீட்டு வளாகத்தில் தங்கியிருந்தபோது, முன்னாள் அமைச்சர் பயங்கரவாத புலனாய்வுப் பிரிவினரால் நேற்று (23) காலை கைது செய்யப்பட்டார்.
கடந்த செவ்வாய்க்கிழமை, கொழும்பில் உள்ள வீட்டு வளாகத்தில் வசிக்கும் ஒரு பெண்ணிடம் இருந்து தங்க முலாம் பூசப்பட்ட T-56 துப்பாக்கி ஒன்று கண்டெடுக்கப்பட்டது.
அதன்படி, வெள்ளவத்தை பொலிஸார் 69 வயதான அந்தப் பெண்ணையும், அவரது மருமகளையும் நீண்ட நேரம் விசாரித்தனர். மேலும் அவர்கள் சம்பந்தப்பட்ட ஆயுதம் பற்றி தங்களுக்கு எதுவும் தெரியாது என்று பொலிஸாரிடம் கூறியுள்ளனர். பின்னர் பயங்கரவாத புலனாய்வுப் பிரிவால் மேலதிக விசாரணைகள் மேற்கொள்ளப்பட்டன.
இருப்பினும், துப்பாக்கி எப்படி கிடைத்தது என்பது குறித்து விசாரணை நடத்தத் தொடங்கிய பொலிஸார், அது தொடர்பான பல முக்கியமான உண்மைகளைக் கண்டுபிடித்தனர். இதன்போதே முன்னாள் அமைச்சர் துமிந்த திசாநாயக்க இந்த தங்க முலாம் பூசப்பட்ட துப்பாக்கியுடன் நேரடி தொடர்பு வைத்திருப்பது தெரியவந்துள்ளது.
மேலும் அவரைத் தேடுவதற்காக பல பொலிஸ் குழுக்கள் சிறப்பு நடவடிக்கையை மேற்கொண்டன. சந்தேக நபரான முன்னாள் அமைச்சர், ஆறு மாதங்களுக்கு முன்பு தனது சமையல்காரர் மூலம் தனது நண்பரான பெண் ஒருவரின் வீட்டிற்கு இந்த துப்பாக்கியை அனுப்பியதாக பொலிஸார் கண்டுபிடித்துள்ளனர்.
ஆயுதம் அடங்கிய பையில் T-56 துப்பாக்கி இருப்பதை அறியாமலேயே அவர் அதை ஏற்றுக்கொண்டதாக பொலிஸார் தெரிவித்துள்ளனர். மேலும், சம்பந்தப்பட்ட விசாரணைகளில், இந்த T-56 துப்பாக்கி, பாகங்களை ஒன்று சேர்த்து தயாரிக்கப்பட்ட ஆயுதம் என்பது தெரியவந்துள்ளது.
இதற்கிடையில், குறித்த துப்பாக்கி தொடர்பான வழக்கு இன்று கல்கிஸ்ஸை நீதவான் நீதிமன்றத்தில் விசாரணைக்கு எடுத்துக்கொள்ளப்பட்டபோது, இரண்டு பெண் சந்தேக நபர்களையும் ஜூன் 5 ஆம் திகதி வரை விளக்கமறியலில் வைக்க பதில் நீதவான் தரங்க டி சில்வா உத்தரவிட்டார்.
கூடுதலாக, பயங்கரவாத புலனாய்வுப் பிரிவைச் சேர்ந்த நான்கு அதிகாரிகளுக்கு, சிறையில் உள்ள இரண்டு சந்தேக நபர்களிடமிருந்து மேலும் எழுத்துப்பூர்வ வாக்குமூலங்களைப் பதிவு செய்ய அனுமதி வழங்கப்பட்டுள்ளது.
இந்த சம்பவம் தொடர்பாக கைது செய்யப்பட்ட முன்னாள் அமைச்சர் துமிந்த திசாநாயக்கவின் சமையல்காரரும் ஜூன் 5 ஆம் திகதி வரை விளக்கமறியலில் வைக்கப்பட்டுள்ளார்.
இதற்கிடையில், நாடாளுமன்ற உறுப்பினர்களின் பாதுகாப்பிற்காக T-56 ரக துப்பாக்கிகள் வழங்கப்படவில்லை என்று பாதுகாப்பு அமைச்சகம் தெரிவித்துள்ளது.
மேலும், நாடாளுமன்ற உறுப்பினர்களின் பாதுகாப்பிற்காக வழங்கப்பட்ட பதிவு செய்யப்பட்ட துப்பாக்கிகளை திருப்பி அனுப்புவதற்கு பாதுகாப்பு அமைச்சகத்தால் அறிவிக்கப்பட்ட காலக்கெடு தற்போது முடிவடைந்துள்ளது.
மேலும் நாடாளுமன்ற உறுப்பினர்கள், தொழிலதிபர்கள் மற்றும் பிற பிரமுகர்களுக்கு வழங்கப்பட்ட 1,693 துப்பாக்கிகளில் 33 துப்பாக்கிகள் இன்னும் திருப்பி அனுப்பப்படவில்லை என்று தெரிவிக்கப்படுகிறது.