உத்தரவு இல்லாமல் ஊடகவியலாளர் கணபதிப்பிள்ளை குமணனிடம் பயங்கரவாதத் தடுப்பு மற்றும் விசாரணைப் பிரிவு விசாரித்தது ஊடகவியலாளருக்கு இழைக்கப்பட்ட துன்புறுத்தலாகும் என்று, மேற்படி ஊடகவியலாளருடன் முல்லைத்தீவு, அளம்பிலில் உள்ள CTID அலுவலகத்திற்குச் சென்ற சட்டத்தரணி நடராஜா காண்டீபன் தெரிவித்துள்ளார்.
பொதுவாக வன்னியிலும், குறிப்பாக போரால் பாதிக்கப்பட்ட மக்களின் தகவல்களை பல ஆண்டுகளாக அறிக்கையிட்டு வரும் சர்வதேச புகழ்பெற்ற தமிழ் ஊடகவியலாளர் ஒருவர், முதன்முறையாக தேசிய மக்கள் சக்தி அரசாங்கத்தின் கீழ் பயங்கரவாதப் பொலிஸாரால் அழைக்கப்பட்டு நீண்ட விசாரணைக்கு உட்படுத்தப்பட்டுள்ளார்.
ஊடகவியலாளர் கணபதிப்பிள்ளை குமணனின் அறிக்கையிடல், பயங்கரவாதத் தடுப்பு மற்றும் விசாரணைப் பிரிவின் (CTID) விசாரணைக்கு இலக்காகியுள்ள பிரதான துறையாகும்.
போரால் பாதிக்கப்பட்ட வடக்கில் புதிதாகக் கண்டுபிடிக்கப்பட்ட செம்மணி மனிதப் புதைகுழி தொடர்பாக இந்த நாட்களில் அறிக்கையிடுவதில் ஈடுபட்டுள்ள முக்கிய ஊடகவியலாளரிடம் பயங்கரவாதப் பொலிஸார் இவ்வாறு விசாரணை நடத்துவது பற்றிய அரசாங்கத்தின் நிலைப்பாடு பற்றி வினவியபோது, அடுத்த அமைச்சரவை ஊடக சந்திப்பில் பதிலளிப்பதாக அமைச்சரவைப் பேச்சாளர் குறிப்பிட்டார்.
ஜெனீவாவில் நடைபெறவுள்ள மனித உரிமைகள் மாநாட்டில் இலங்கை குறித்து விவாதிக்கப்படவுள்ள நிலையில், யாழ்ப்பாணத்தில் கண்டுபிடிக்கப்பட்ட செம்மணி மனிதப் புதைகுழி குறித்து அறிக்கையிடும் ஊடகவியலாளருக்கு இத்தகைய அழுத்தங்கள் கொடுக்கப்படுவது தொடர்பான நிலைப்பாடு என்னவென்று ஊடகவியலாளர் ஒருவர் வினவியபோதே, சுகாதார மற்றும் வெகுசன ஊடக அமைச்சருமான அமைச்சரவைப் பேச்சாளர் வைத்தியர் நலிந்த ஜயதிஸ்ஸ இவ்வாறு குறிப்பிட்டார்.
"மனித உரிமைகள் அமர்வுகளை அடிப்படையாகக் கொண்டு சில சம்பவங்களை பெரிதுபடுத்திக் காட்டும் அல்லது பொய்யான சம்பவங்களை அறிக்கையிடும் ஒரு போக்கும் நமது நாட்டில் பொதுவாக இடம்பெறுகிறது."
ஊடகவியலாளரும் மனித உரிமை ஆர்வலருமான கணபதிப்பிள்ளை குமணனை பயங்கரவாதத் தடுப்புப் பொலிஸார் அழைத்தமைக்கு சர்வதேச அளவில் கண்டனங்கள் எழுந்திருந்த நிலையிலேயே, பயங்கரவாதத் தடுப்பு மற்றும் விசாரணைப் பிரிவினரால் (CTID) அவரிடம் நீண்ட விசாரணை நடத்தப்பட்டுள்ளது.
பயங்கரவாதத் தடுப்பு மற்றும் விசாரணைப் பிரிவின் (CTID) அழைப்பின் பேரில், 2025 ஆகஸ்ட் 17ஆம் திகதி, ஊடகவியலாளர் கணபதிப்பிள்ளை குமணனுடன் முல்லைத்தீவு, அளம்பிலில் உள்ள CTID அலுவலகத்திற்குச் சென்ற சட்டத்தரணி நடராஜா காண்டீபன், பயங்கரவாதத் தடுப்பு மற்றும் விசாரணைப் பிரிவின் தலைவரும் மேலும் மூன்று பொலிஸ் அதிகாரிகளும் அன்று ஊடகவியலாளரிடம் ஆறு மணி நேரத்திற்கும் மேலாக விசாரணை நடத்தியதாகக் கூறுகிறார்.
அந்த நேரத்தில், ஊடகவியலாளரின் தனிப்பட்ட கொடுக்கல் வாங்கல்கள் மற்றும் அவரால் வெளியிடப்பட்ட செய்திகள் குறித்து விசாரிக்கப்பட்டதாக வெளிப்படுத்திய சட்டத்தரணி, விசாரணை குறித்து எந்தத் தகவலையும் வெளியில் பேச வேண்டாம் என பொலிஸ் அதிகாரிகள் ஊடகவியலாளருக்கு அறிவுறுத்தியதாகவும் வலியுறுத்துகிறார்.
"இந்த விசாரணையின் போது, அவரது தகவல்கள், அவரது வங்கிக் கணக்குகள், தொலைபேசித் தொடர்புகள், சமூக ஊடகங்களில் ஒரு ஊடகவியலாளராக அவர் வெளியிட்ட செய்திகள் போன்றவை குறித்து 6 மணி நேரத்திற்கும் மேலாக விசாரணை நடத்தப்பட்டன. இந்த விசாரணை குறித்து எந்தத் தகவலையும் வெளியில் பேச வேண்டாம் என்று அவருக்கு அறிவுறுத்தப்பட்டது. மேலும், மேலதிக விசாரணைகளுக்காக அழைத்தால் வர வேண்டும் என்றும் உத்தரவிடப்பட்டது."
முன்னாள் பாதுகாப்புச் செயலாளர் ஹேமசிறி பெர்னாண்டோவின் வங்கிக் கணக்கு விவரங்களை ஒரு விசாரணைக்காகப் பெறுவதற்கு நீதிமன்ற உத்தரவு பெற வேண்டியிருந்ததை நினைவுகூரும் சட்டத்தரணி நடராஜா காண்டீபன், அத்தகைய நீதிமன்ற உத்தரவு இல்லாமல் ஊடகவியலாளரின் அந்தத் தகவல்களை பயங்கரவாதத் தடுப்பு மற்றும் விசாரணைப் பிரிவு விசாரித்தது ஊடகவியலாளருக்கு இழைக்கப்பட்ட துன்புறுத்தல் என்கிறார்.
"குமணன் ஒவ்வொரு ஊடகவியலாளரும் செய்வதையே செய்துள்ளார். ஹேமசிறி பெர்னாண்டோவின் வங்கிக் கணக்கு விவரங்களைப் பெற நீதிமன்ற உத்தரவு பெற வேண்டியிருந்தது என்பதை நாம் அறிவோம். ஆனால் இந்த விசாரணையில், வங்கிக் கணக்குகள், பணப் பரிவர்த்தனைகள் குறித்த விவரங்கள் கேட்கப்பட்டன. அதனால் இது ஒரு அப்பட்டமான துன்புறுத்தல் என்று நான் நினைக்கிறேன். எதிர்காலத்தில் இது குறித்து நிபுணர்களின் கருத்தைக் கேட்டு தேவையான நடவடிக்கைகளை எடுப்போம்."
பயங்கரவாதத் தடுப்புச் சட்டத்தை நீக்குவதாக உறுதியளித்து ஆட்சிக்கு வந்த தேசிய மக்கள் சக்தி அரசாங்கம், ஊடகவியலாளர்களுக்கு எதிராக அச்சட்டத்தைப் பயன்படுத்துவதை சட்டத்தரணி வன்மையாகக் கண்டித்துள்ளார்.
"ஜனநாயகத்தின் நான்காவது தூண் எனப்படும் ஊடகங்களுக்குத் தடை விதிக்க ஒருபோதும் இடமளிக்க முடியாது. பயங்கரவாதத் தடுப்புச் சட்டத்தை நீக்குவோம் என்று கூறிய அரசாங்கம், மீண்டும் அச்சட்டத்தைப் பயன்படுத்தி இத்தகைய மோசமான மிரட்டல்களையும் அச்சுறுத்தல்களையும் மேற்கொள்வதை நாங்கள் வன்மையாகக் கண்டிக்கிறோம்."
ஊடகவியலாளர் கணபதிப்பிள்ளை குமணனுக்கு எதிராக மேற்கொள்ளப்படும் விசாரணை சட்டவிரோதமானது எனக் கூறும் சட்டத்தரணி, அது அரசியல் தூண்டுதலின் பேரில் நடைபெறுவதாக சந்தேகம் வெளியிட்டுள்ளார்.
"குமணனுக்கு எதிராக செய்யப்படும் இந்த விசாரணை சட்டவிரோதமானது, நீதிக்கு முரணானது, இது ஒரு அரசியல் தூண்டுதலால் செய்யப்பட்டது என்று நாங்கள் நம்புகிறோம்."
முல்லைத்தீவு ஊடக அமையத்தின் தலைவரும் ஊடகவியலாளருமான கணபதிப்பிள்ளை குமணன், போரால் பாதிக்கப்பட்ட வடக்கில் இடம்பெறும் மனித உரிமை மீறல்கள், குற்றங்கள் மற்றும் ஊழல் மோசடிகளை புகைப்படங்கள் மற்றும் எழுத்துக்கள் மூலம் வெளிக்கொண்டு வந்து சர்வதேச கவனத்தை ஈர்த்த ஒரு ஊடகவியலாளர் ஆவார்.
போரால் பாதிக்கப்பட்ட தமிழ் மக்களின் வாழ்க்கையை மட்டுமல்லாது, காலிமுகத்திடல் போராட்டத்தையும் மையமாகக் கொண்டு ஊடகவியலாளர் குமணன் எடுத்த புகைப்படங்கள் டெய்லி டெலிகிராப், வைஸ் வேர்ல்ட் நியூஸ், ஈவினிங் ஸ்டாண்டர்ட், தி கார்டியன், அல் ஜசீரா, பிபிசி உள்ளிட்ட சர்வதேச ஊடகங்களில் வெளியாகியிருந்தமை குறிப்பிடத்தக்கது.