இஸ்ரேலிற்குப் பணியாளர்களை அனுப்பும் செயற்பாடுகள் 2026 ஆம் ஆண்டின் இறுதியுடன் தனியார் முகவர் நிலையங்களிடமிருந்து முழுமையாக நீக்கப்படும். எந்தவொரு தரப்பினருக்கும் பணத்தை வழங்க வேண்டாம் என வெளிநாட்டு வேலைவாய்ப்புப் பணியகம் வேலைவாய்ப்பை எதிர்பார்ப்போருக்குக் கடுமையான எச்சரிக்கை விடுத்துள்ளது.
தனியார் முகவர் நிலையங்களின் சகாப்தம் முடிவுக்கு வருகிறது
இலங்கைப் பணியாளர்களை இஸ்ரேலில் வேலைவாய்ப்புகளுக்காக அனுப்பி வைக்கும் ஒட்டுமொத்தச் செயற்பாடுகளையும் எதிர்வரும் 2027 ஜனவரி 01 ஆம் திகதி முதல் நடைமுறைக்கு வரும் வகையில் அரசுகளுக்கிடையிலான நேரடி ஒப்பந்த (G-to-G) அடிப்படையின் கீழ் மாத்திரம் கொண்டுவருவதற்கு இஸ்ரேலிய அரசாங்கம் தீர்மானித்துள்ளது.
இஸ்ரேலிலுள்ள இலங்கைத் தூதரகம் ஊடாக இந் உத்தியோகபூர்வத் தீர்மானம் வெளிநாட்டு வேலைவாய்ப்புப் பணியகத்திற்கு அறிவிக்கப்பட்டுள்ளது.
இதற்கமைய, உரிமம் பெற்ற தனியார் வேலைவாய்ப்பு முகவர் நிலையங்கள் ஊடாக இதுவரை முன்னெடுக்கப்பட்டு வந்த ஆட்சேர்ப்பு நடவடிக்கைகள் 2026 திசம்பர் 31 ஆம் திகதியுடன் உத்தியோகபூர்வமாக நிறைவடையும்.
தரகர்களுக்குப் பணம் வழங்குவதைத் தவிருங்கள்
கட்டுமானம், கைத்தொழில், வர்த்தகம் மற்றும் சேவைத் துறைகளின் வேலைவாய்ப்புகளுக்காக இதுவரை தனியார் நிறுவனங்கள் தலையீடு செய்திருந்த போதிலும், புதிய அரசாங்க ஒப்பந்த முறைமையின் கீழ் கிடைக்கும் ஒதுக்கீடுகள் (Quotas) அல்லது தெரிவு நடைமுறைகள் இதுவரை பிரகடனப்படுத்தப்படவில்லை.
புதிய வேலைவாய்ப்புகளைப் பெற்றுத் தருவதாகக் கூறும் எந்தவொரு நபருக்கோ அல்லது முகவர் நிலையத்திற்கோ பணத்தை வழங்குவதைத் தவிர்க்குமாறு அதிகாரிகளினால் எச்சரிக்கப்பட்டுள்ளது.
பணியகத்தினால் உத்தியோகபூர்வ அறிவித்தல் வெளியிடப்படும் வரை தனியார் துறையினரால் நடாத்தப்படும் நேர்முகத் தேர்வுகள், செய்முறைப் பரிசோதனைகள் அல்லது ஆட்சேர்ப்புத் திட்டங்களில் ஏமாற வேண்டாம் எனவும் அறிவிக்கப்பட்டுள்ளது.
ஏற்கனவே பணம் செலுத்தியவர்களுக்கு என்ன நடக்கும்?
சட்டப்பூர்வ அடிப்படையின் கீழ் ஏற்கனவே கொடுப்பனவுகளை மேற்கொண்டுள்ள விண்ணப்பதாரர்கள் பதற்றமடையத் தேவையில்லை எனப் பணியகம் தெரிவிக்கிறது. அவர்கள் தொடர்பாக எடுக்கப்படவுள்ள மேலதிக நடவடிக்கைகள் விரைவில் அறிவிக்கப்படவுள்ளன.
அத்தகைய விண்ணப்பதாரர்களின் ஆவணங்களை உடனடியாகப் பணியகத்திடம் ஒப்படைக்குமாறு தனியார் நிறுவனங்களுக்கு அறிவிக்கப்பட்டுள்ளதால், தனிப்பட்ட ரீதியில் தனித்தனியாகக் கோரிக்கைகளைச் சமர்ப்பிக்க வேண்டிய அவசியமில்லை.
வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலா அமைச்சு மற்றும் பணியகம் என்பன வெளியிடும் உத்தியோகபூர்வ அறிவிப்புகளை மாத்திரமே நம்பியிருக்குமாறு பொதுமக்களிடம் கோரப்பட்டுள்ளதுடன், ஏதேனும் மோசடிகள் அல்லது முறைகேடுகள் பற்றிப் புகாரளிக்க வேண்டுமாயின் பணியகத்தின் முறைப்பாட்டுப் பிரிவைத் தொடர்புகொள்ளுமாறு அறிவிக்கப்பட்டுள்ளது.
மேலதிகத் தகவல் மூல இணைப்புகள்: