தம்புளை விசேட பொருளாதார வர்த்தக நிலையத்தின் மொத்த வியாபாரிகள் தெரிவிக்கின்றனர்.
இதனால், காய்கறிகளுக்கு உரிய விலை கிடைக்கவில்லை என விவசாயிகள் ஆதங்கம் வெளியிடுகின்றனர்.
தினசரி மொத்த விநியோகம் 15 - 20 லட்சம் கிலோகிராம் வரை அதிகரித்துள்ளமையே இவ்வாறு விலை குறைவதற்கான பிரதான காரணம் என தம்புளை விசேட பொருளாதார வர்த்தக நிலையத்தின் வர்த்தக சங்கத்தின் ஆலோசகர் சாந்த ஏக்கநாயக்க தெரிவித்தார்.
காய்கறிகளின் மொத்த விநியோகம் சுமார் 50 சதவீதத்தால் அதிகரித்துள்ளதாகவும், இந்த அதிகப்படியான விநியோகம் தாழ்நில மற்றும் உயர்நிலப் பகுதி காய்கறிகளின் விலை வீழ்ச்சியில் நேரடியாகத் தாக்கம் செலுத்தியுள்ளதாகவும் மொத்த வியாபாரிகள் குறிப்பிட்டனர்.
வழமை போன்று நாடு முழுவதிலும் உள்ள விசேட பொருளாதார வர்த்தக மையங்களுக்கு பிரதான நகரங்கள் மற்றும் உப நகரங்களிலிருந்து மொத்தக் கொள்வனவாளர்கள் வருகை தந்திருந்ததாகவும் வியாபாரிகள் மேலும் தெரிவித்தனர்.
நேற்று (29ஆம் திகதி) போஞ்சி அதிக விலைக்கு விற்பனை செய்யப்பட்டதுடன், நீண்ட பூசணி குறைந்த விலைக்கு விற்பனையானது. ஒரு கிலோ போஞ்சியின் மொத்த விலை 200-300 ரூபாவாக இருந்தது. பச்சை மிளகாய் 150-200, குடை மிளகாய் 150-250, தக்காளி 80-100, வெள்ளரி 30-35, முள்ளங்கி 30-40, பூசணி 35-40 என்ற மொத்த விலையில் விற்பனை செய்யப்பட்டன.
இதேவேளை, உள்ளூர் பெரிய வெங்காயத்தின் ஒரு கிலோ மொத்த விலை 120 ரூபாவாகக் குறைந்துள்ளது.
இறக்குமதி செய்யப்பட்ட பெரிய வெங்காயம், மொத்தச் சந்தையின் தேவைக்கு ஏற்ப குறைந்த விலையில் விநியோகிக்கப்படுவதே, உள்ளூர் பெரிய வெங்காயத்தின் கேள்வி குறைவடையக் காரணம் என வியாபாரிகள் சுட்டிக்காட்டுகின்றனர். ஒரு நாளைக்கு சுமார் 02-03 இலட்சம் கிலோகிராம் உள்ளூர் பெரிய வெங்காயம் மொத்தச் சந்தைக்குக் கிடைப்பதாகவும் தெரிவிக்கப்படுகின்றது.