ஜெனரல் ஸ்ரீ கடந்த ஜான் கொத்தலாவல பாதுகாப்புப் பல்கலைக்கழகமானது (KDU) நாட்டின் பாதுகாப்புப் பிரிவுகளின் தொழில்சார் தேவைகளைப் பூர்த்தி செய்வதற்காக உருவாக்கப்பட்ட ஒரு சிறந்த நிறுவனமாகும். எனினும், முறையான சட்டக் கட்டமைப்பு மற்றும் நிர்வாகச் சிக்கல்கள் காரணமாக இன்று மாணவர்களின் எதிர்காலமும், நோயாளிகளின் உயிர்களும் கடுமையான அச்சுறுத்தலுக்கு உள்ளாகியுள்ளன.
ஜெனரல் ஸ்ரீ கடந்த ஜான் கொத்தலாவல பாதுகாப்புப் பல்கலைக்கழகமானது (KDU) நாட்டின் பாதுகாப்புப் பிரிவுகளின் தொழில்சார் தேவைகளைப் பூர்த்தி செய்வதற்காக உருவாக்கப்பட்ட ஒரு சிறந்த நிறுவனமாகும்.
எனினும், காலப்போக்கில் சிவில் கல்விக்கும் திறக்கப்பட்ட இந் நிறுவனம், தற்போது சட்ட அடிப்படை, வள மேலாண்மை மற்றும் தணிக்கை வெளிப்படைத்தன்மை என்பனவற்றில் பலத்த சவால்களை எதிர்கொண்டுள்ளது.
இத்தகைய நிர்வாகச் சிக்கல்கள் வெறும் ஆவணங்களுக்குள் மட்டும் சுருங்கிவிடாமல், நாட்டின் மாணவர்களின் எதிர்காலத்திற்கும், சிகிச்சை பெறும் நோயாளிகளின் உயிர்களுக்கும் நேரடியாகத் தாக்கங்களை ஏற்படுத்தி வருகின்றன.
1981இன் சட்டமும் 2012க்குப் பின்னர் தோன்றிய நெருக்கடியும்
1981 ஆம் ஆண்டின் 68 ஆம் இலக்கச் சட்டத்தின் கீழ் இந்தப் பாதுகாப்பு அகாடமியை நிறுவிய வேளையில், கட்டண அடிப்படையில் சாதாரண சிவில் மாணவர்களை (Day Scholars) உள்வாங்குவதற்கான தெளிவான சட்ட ஏற்பாடுகள் வழங்கப்பட்டிருக்கவில்லை.
எனினும், 2012 ஆம் ஆண்டு முதல் தொடர்ச்சியாகக் கட்டணங்களைப் பெற்றுக்கொண்டு சிவில் மாணவர்களை மருத்துவ பீடத்தில் இணைத்துக்கொள்ளும் நடவடிக்கைகள் ஆரம்பிக்கப்பட்டன.
12 ஆண்டுகளுக்கு மேல் சட்டக் கட்டமைப்பைத் திருத்தாமல் பேணிவந்த இந்த முறைமையானது, 2025/2026ஆம் ஆண்டுக்கான உள்நாட்டு சிவில் மாணவர்களுக்கு திடீரென இல்லாமல் செய்யப்பட்டது.
அந்த வாய்ப்பினை இராணுவக் கேடட் அதிகாரிகளுக்கும் வெளிநாட்டு மாணவர்களுக்கும் மாத்திரம் மட்டுப்படுத்துவதற்கு நடவடிக்கை எடுக்கப்பட்டமையால் உள்நாட்டு மாணவர்களின் கல்வி வழி அடைபட்டுப் போயுள்ளது.
சட்டரீதியான சிக்கல் தீர்க்கப்படும் வரை இதுவொரு "தற்காலிகப் படிமுறை" எனத் தெரிவிக்கப்பட்ட போதிலும், குறிப்பிட்ட தீர்வுக்கான கால அட்டவணையோ அல்லது இடைக்காலத் திட்டமோ இல்லாமை குடும்பங்களை நடுக்கடலில் தள்ளியுள்ளது.
உள்நாட்டில் வாய்ப்பை இழக்கும் பிள்ளைகள் அதிக செலவைச் சுமந்து கொண்டு வெளிநாடுகளுக்குச் செல்ல வேண்டிய நிலை ஏற்படுவதால், தனிந்பர் பொருளாதாரமும் நாட்டின் வெளிநாட்டு நாணயச் சேமிப்பும் நெருக்கடிக்குள்ளாகின்றன.
மருத்துவமனையின் சட்ட நிலையும் உபகரணங்கள் வீணடிக்கப்படுவதும்
பல்கலைக்கழகப் போதனா மருத்துவமனை (UHKDU) அரசாங்க மருத்துவமனை மாதிரி ஒன்றின் கீழ் இயங்க வேண்டுமா, அல்லது தனியார் கட்டண மாதிரி ஒன்றின் கீழ் இயங்க வேண்டுமா என்பது குறித்துப் பொது நிறுவனங்கள் பற்றிய குழு (COPE) கேள்விகளை எழுப்பியுள்ளது.
சேவைக் கட்டடங்கள், பணியாளர்களை இணைத்துக் கொள்ளுதல் மற்றும் பொதுமக்களுக்குச் சுகாதார சேவைகளை வழங்குவதற்கான பொறுப்பு என்பன இந்தச் சட்ட நிலைப்பாட்டின் மீதே சரியாகத் தீர்மானிக்கப்படுகின்றன.
மருத்துவமனையின் மின்னல் பாதுகாப்பு அமைப்பில் 8.44 மில்லியன் ரூபா பெறுமதியான 2,199 மீட்டர் செப்புக் பட்டைகள் திருடப்பட்டமை குறித்தும் தணிக்கை அறிக்கைகளின் அவதானம் திரும்பியுள்ளது. குறிப்பாக, காணாமல் போனதாகக் கூறப்படும் தொகைகளுக்கும் பொலிஸார் கண்டுபிடித்த அளவுகளுக்கும் இடையில் தெளிவான முரண்பாடுகள் காணப்படுவது, உள்நாட்டு இருப்புப் பட்டியல் (Inventory) மற்றும் பாதுகாப்பு மேற்பார்வையில் நிலவும் பலவீனங்களை வெளிப்படுத்துவதாகும்.
மறுபுறம், கோடிக்கணக்கில் பெறுமதியான அதிநவீன மருத்துவ உபகரணங்கள் பயன்பாட்டுக்கு எடுக்கப்படாமல் வீணாகப் பாழடைந்து போவதும், பயிற்சிபெற்ற பணியாளர்களின் பற்றாக்குறையினால் தீவிர சிகிச்சைப் பிரிவுகள் (ICU) மட்டுப்படுத்தப்பட்டிருப்பதும் கடுமையான ஒரு விடயமாகும்.
விலைமதிப்பற்ற இயந்திரங்கள் கொள்வனவு செய்யப்பட்ட போதிலும், அவற்றைப் பராமரிப்பதற்கும் இயக்குவதற்கும் முறையான மேலாண்மை இன்மை காரணமாகப் பாதிக்கப்படுவது நோயாளர்களாவர்.
வணிக நிறுவனங்களும் வெளிப்படைத்தன்மைச் சவாலும்
பல்கலைக்கழக வளாகத்துடன் தொடர்புடைய CARE Technology Lanka மற்றும் CUE Technologies Lanka போன்ற வணிக நிறுவனங்களின் கொடுக்கல் வாங்கல்களும் சுயாதீனமான மேற்பார்வைக்கு உட்படுத்தப்பட வேண்டும் என நாடாளுமன்றக் குழுக்கள் வலியுறுத்துகின்றன.
அரச வளங்களும் பொது நிதிகளும் தனியார் நிறுவனக் கட்டமைப்புகளுடன் சந்திக்கும் இடங்களில் முழுமையான நிதி வெளிப்படைத்தன்மை என்பது அவசியமான காரணியாகும்.
புதிய துணைவேந்தர் எயர் வைஸ் மார்ஷல் இந்திக விக்ரமசிங்கவின் முன்னால் உள்ள பிரதான பொறுப்பு நிறுவனத்தை மீளமைப்பதாகும்.
மாணவர்களை உள்வாங்குவதற்கான தெளிவான வழிவரைபடத்தை வெளியிடுதல், மருத்துவமனையின் செயற்பாட்டு மாதிரியைச் சீரமைத்தல் மற்றும் பொதுச் சொத்துகள் சரியாகப் பயன்படுத்தப்படுவதை உறுதிப்படுத்துதல் என்பன இந்தச் சீர்திருத்தங்களின் உண்மையான வெற்றியை அளவிடும் சரியான அளவுகோல்களாக அமையும்.