இலங்கையின் முதலீட்டுக் கொள்கை தொடர்பில் அமெரிக்கா அதிருப்தி!

2025ஆம் ஆண்டுக்கான இலங்கையின் முதலீட்டுச் சூழல் குறித்து அவர்கள் வெளியிட்ட அறிக்கையில், புதிய நிர்வாகத்தின் கீழ் உயர்மட்ட அரசியல் இலஞ்சக் கோரிக்கைகள் குறைவாகத் தோன்றினாலும், குறிப்பாக நிறுவப்பட்ட சலுகை பெற்ற குழுக்களால் பாதுகாக்கப்பட்ட துறைகளில் நிறுவன ஊழல் தொடர்வதாகக் குறிப்பிடப்பட்டுள்ளது.

2025ஆம் ஆண்டுக்கான இலங்கையின் முதலீட்டுச் சூழல் குறித்து அமெரிக்க இராஜாங்கத் திணைக்களம் ஓர் அறிக்கையை வெளியிட்டுள்ளது.

அதில், தேசிய மக்கள் சக்தி அரசாங்கம் சர்வதேச நாணய நிதியத்துடன் ஒத்துழைத்து முதலீட்டாளர்களுக்கு உத்தரவாதம் அளித்தாலும், அவர்களின் மேற்கத்திய எதிர்ப்பு, மார்க்சியத் தாக்கங்கள் கொண்ட சித்தாந்தங்கள் காரணமாக, பல முதலீட்டாளர்கள் இலங்கையில் முதலீடு செய்வது குறித்து நிச்சயமற்ற நிலையில் இருப்பதாகக் குறிப்பிடப்பட்டுள்ளது.

மேலும், இலங்கையின் வெளிநாட்டு முதலீட்டுக் கொள்கைகளைச் செயல்படுத்துவதில் ஒரு முரண்பாடான தன்மை காணப்படுவதாகக் குறிப்பிடும் அமெரிக்க இராஜாங்கத் திணைக்களம், நாட்டின் முதலீட்டு சபை பிரதான முதலீட்டு முகவராக இருந்தாலும், அவர்களுடன் ஒரு நிலையான மற்றும் வெளிப்படையான உரையாடலைப் பேணுவது சவாலாக உள்ளது என்றும் குறிப்பிட்டுள்ளது.

தேவையற்ற ஒழுங்குமுறைகள், சட்ட நிச்சயமற்ற தன்மை மற்றும் அதிகாரிகளின் பதிலளிப்பதில் உள்ள குறைபாடுகள் காணப்படுவதாகவும் அந்த அறிக்கையில் சுட்டிக்காட்டப்பட்டுள்ளது.

இந்தியாவின் அதானி நிறுவனம், நாட்டின் வட மாகாணத்தில் 400 மில்லியன் டொலர் பெறுமதியான புதுப்பிக்கத்தக்க எரிசக்தித் திட்டத்திலிருந்து விலகியதாகவும், இதற்குக் காரணம் முன்னர் வழங்கப்பட்ட ஒப்பந்தத்தை தற்போதைய அரசாங்கம் மீளப் பேச்சுவார்த்தைக்கு உட்படுத்த எடுத்த முயற்சியே எனக் குறிப்பிடப்பட்டுள்ளதாகவும் அந்த அறிக்கையில் மேலும் தெரிவிக்கப்பட்டுள்ளது.

மேலும், தற்போதைய அரசாங்கத்தின் சிரேஷ்ட அரச அதிகாரிகள் தனியார் துறை தலைமையிலான பொருளாதாரத்தை தவறாமல் விமர்சிப்பதாகவும், அரச உடைமையுடனான கூட்டாண்மை நாட்டின் விருப்பமான முதலீட்டு மாதிரியாக பகிரங்கமாக ஊக்குவிக்கப்படுவதாகவும் இதில் குறிப்பிடப்பட்டுள்ளது.

2025 வரவு செலவுத் திட்டத்தின் மூலம் சேவை ஏற்றுமதி நிறுவனங்களுக்கான வரி விலக்குகள் மற்றும் வெளிநாட்டு வருமான மூலங்களுக்கான வரி விலக்குகளை நீக்குவதற்கு முன்மொழிந்தமை, கொழும்பு துறைமுக நகரத் திட்டங்களுக்கு வழங்கப்பட்டுள்ள விரிவான வரி விலக்குகளுக்கு முரணான ஒரு நிலைமையாகும் என்பதும் அதில் குறிப்பிடப்பட்டுள்ள மற்றொரு விடயமாகும்.

புதிய நிர்வாகத்தின் கீழ் உயர்மட்ட அரசியல் இலஞ்சக் கோரிக்கைகள் குறைவாகத் தோன்றினாலும், குறிப்பாக நிறுவப்பட்ட சலுகை பெற்ற குழுக்களால் பாதுகாக்கப்பட்ட துறைகளில் நிறுவன ஊழல் தொடர்வதாகவும் அமெரிக்க இராஜாங்கத் திணைக்களம் வெளியிட்ட அறிக்கையில் மேலும் தெரிவிக்கப்பட்டுள்ளது.