ரணில் கைது செய்யப்பட்ட போது நடந்த திடுக்கிடும் சம்பவம்!

கொழும்பு நீதிவான் நீதிமன்றத்தில் அவரை விளக்க மறியலில் வைக்க வேண்டும் என்று அரசுத் தரப்பில் தனியனாக நின்று சட்டப் போராட்டம் நடத்தியவர் அரசுத் தரப்பில் ஆஜரான மேலதிக சொலிஸிட்டர் ஜெனரல் திலீபா பீரிஸ்.

அத்துணை முயற்சி எடுத்த அவர் நேற்று ரணில் விக்கிரமசிங்கவுக்கு பிணை வழங்கலாமா என்பது குறித்து நீதிவான் விசாரணை நடத்திய போது ஒரு விடயத்தை ஆதங்கத்தோடு சுட்டிக்காட்டினார்.

‘’இந்த நீதிமன்றம் கடந்த வெள்ளியன்று ரணில் விக்கிரமசிங்கவை விளக்கமறியலில் வைக்கும்படி உத்தரவிட்டது. ஆனால் சந்தேகநபரான ரணில் விக்கிரமசிங்க விளக்கமறியல்சாலையில் ஒரு மணித்தியாலம்கூட இருக்கவில்லை’’ என்று விசனத்துடன் தெரிவித்தார்.

விளக்கமறியலுக்கு அழைத்துச் செல்லப்பட்ட ரணில் விக்கிரமசிங்க, அங்கிருந்து நேரடியாக சிறை வைத்தியசாலைக்கும், பின்னர் தேசிய வைத்தியசாலைக்கும் கூட்டிச் செல்லப்பட்டு விட்டார் என்பது தெரிந்த விடயம்தான்.

தாம் விளக்கமறியல் உத்தரவை நீதிமன்றத்தில் இருந்து பெற்றுக்கொடுத்தும், முன்னாள் ஜனாதிபதியை ஒரு மணி நேரம் கூட விளக்கமறியல் சாலையில் வைத்திருக்க முடியவில்லை என்ற பெரும் ஆதங்கம் போலும் அவருக்கு.

நேற்று வழக்கு விசாரணை நடைபெற்ற போது ரணில் விக்கிரமசிங்க சார்பில் ஜனாதிபதி சட்டத்தரணி திலக் மாரப்பன முன்னிலையானார். இவர் முன்னர் வெளிவிவகார அமைச்சர், சட்டம் – ஒழுங்கு மற்றும் சிறைச்சாலைத் துறை அமைச்சர், போக்குவரத்து, நெடுஞ்சாலைகள் மற்றும் விமான சேவை அமைச்சர், பாதுகாப்பு அமைச்சர் ஆகிய பதவிகளையும் சட்டமா அதிபர் பதவியையும் வகித்தவர் என்பது குறிப்பிடத்தக்கது.

அவர் நேற்றைய வழக்கு விசாரணையின் போது திடுக்கிடும் சம்பவம் ஒன்றை வெளியிட்டு இருக்கிறார். முன்னாள் ஜனாதிபதி ரணில் கைது செய்யப்பட்ட பின்னர் பிரிட்டனில் மெரிலேபோனின் மதிப்புக்குரிய போல் பிரபு திடீரென காலமானார் என்ற இந்த தகவல்தான் அது.

ஜனாதிபதி ரணில் விக்கிரமசிங்க வோல்வர்ஹம்டன் பல்கலைக்கழகத்தின் அழைப்பை ஏற்றுத்தான் மேற்படி பிரிட்டிஷ் விஜயத்தை மேற்கொண்டு இருந்தார். அந்தப் பயணமே இப்போது சர்ச்சைக்குரியதாக மாறி இருக்கின்றது. அந்தப் பயணத்திற்கான அழைப்பை மேற்படி பல்கலைக்கழகத்தின் வேந்தராக 1999 முதல் பணியாற்றி வந்தவரான மதிப்புக்குரிய போல் பிரபுதான் ஜனாதிபதி ரணில் விக்கிரமசிங்கவுக்கு வழங்கி இருந்தார் அந்த அழைப்பின் பெயரில்தான் ஜனாதிபதி ரணில் விக்கிரமசிங்க பிரிட்டனுக்குச் சென்று இருந்தார். இப்போது ரணில் கைது செய்யப்பட்டமையின் பின் போல் பிரபு திடீரெனக் காலமாகி உள்ளார்.

தமது அழைப்பை ஏற்று லண்டனுக்கு வந்தவர் அந்தக் காரணத்துக்காக கைது செய்யப்பட்டார் என்ற அதிர்ச்சி கூட போல் பிரபுவின் மரணத்திற்கு காரணமாக இருக்கலாம் என்று நேற்று நீதிமன்றத்தில் ஒரு குண்டைத் தூக்கிப் போட்டார் திலக் மாரப்பன.

கொழும்பு தேசிய வைத்தியசாலையில் ஆறு விசேட வைத்திய நிபுணர்களைக் கொண்ட மருத்துவக் குழு ஒன்று ரணில் விக்கிரமசிங்கவின் உடல்நிலை தொடர்பில் பரிசீலனை செய்து மருத்துவ அறிக்கை ஒன்றை நீதிமன்றுக்கு நேற்று சமர்ப்பித்திருந்தது.

ரணில் விக்கிரமசிங்கவின் உடல் நிலை மிக மோசமான நிலையில் உள்ளது. தேர்ந்த வைத்தியர் குழுவினால் அவருக்கு சிகிச்சை அளிக்கப்படா விட்டால் அவரது உயிருக்கு ஆபத்து நிகழலாம் என்று அந்த அறிக்கையில் சுட்டிக்காட்டப்பட்டிருந்தது.

அந்த அறிக்கையின் முன்னிலையில் சந்தேகநபரான ரணில் விக்கிரமசிங்கவை பிணையில் செல்ல அனுமதிப்பதை தவிர நீதிமன்றத்திற்கு வேறு மாற்று வழி இருக்கவில்லை என்று நீதிமன்ற செய்தியாளர்கள் கூறுகின்றனர்.

அவரது மருத்துவ அறிக்கை பற்றி யாழ்ப்பாணத்தில் என் நண்பரான மருத்துவர் ஒருவர் ஒரு கருத்துச் சொன்னார். வெளியிடப்பட்ட மருத்துவ அறிக்கையில் ரணிலுக்குள்ள மருத்துவ குறைபாடுகளில் ஒன்றாக அவருடைய உடலில் சோடியம் சத்து குறைந்து இருப்பதாக குறிப்பிடப்பட்டிருக்கின்றது.

அத்தகைய நிலைமை வயதில் மூத்தவர்களுக்கு நேரும் போது அவர்கள் குழப்பமாக பிதற்றும் விதத்தில் நடந்துகொள்வார்கள் என்று அந்த வைத்தியர் கூறினார். ஆனால் கைது சமயத்தின் போது கூட நீதிமன்றத்தில் மிகத் திடமாகவும் உறுதியாகவும் ரணில் விக்கிரமசிங்க நடந்து கொண்டார் என்று தெரிகின்றது. சோடியம் குறைபாட்டுடன்கூட அவர் அவ்வளவு தூரம் மதிநுட்பத்தோடும் உற்சாகத்தோடும் தெளிவாகவும் செயல்பட்டார் என்றால் அது அவரது விசேட மன தைரியத்தின் உறுதியின் விளைவாக மட்டும்தான் இருக்கும் என்றார் அந்த மருத்துவர்.

வைத்தியர்களின் இந்த அறிக்கைப்படி பார்த்தால் இவ்வளவு பின்னடைவுகளுக்கு மத்தியிலும் ரணில் விக்கிரமசிங்க தினசரி முழு உறுதியோடும் திடசங்கற்பத்தோடும் செயற்பட்டமை என்பது பாராட்டுக்குரியது என்றார் அந்த மருத்துவர்.

பிணையில் விடுவிக்கப்பட்ட ரணில் விக்கிரமசிங்க தமது உடல்நிலை மற்றும் மருத்துவ ஆலோசனைகளின் அடிப்படையில் தொடர்ந்தும் சில தினங்களுக்கு வைத்தியசாலையில் தங்கியிருந்து சிகிச்சை பெறுவார் எனக் கூறப்பட்டது.

உடல்நிலை சுமுகமானதும் அவர் மக்களுக்கு உரையாற்றுவார் என்று அவரது ஐக்கிய தேசியக் கட்சியின் செய்திக் குறிப்பு ஒன்று தெரிவித்தது.

-காலைமுரசு