வங்கி அட்டைகள் மூலம் பஸ் கட்டணம் செலுத்தும் சேவை ஆரம்பம்!

போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தலைமையில் ஆரம்பித்து வைக்கப்பட்டது.

இதன்போது, பஸ் சாரதிகள் போதைப்பொருள் பாவித்துள்ளார்களா என்பதை அறியும் சுகாதாரப் பரிசோதனையும் தேசிய போக்குவரத்து மருத்துவ நிறுவனம் மூலம் மேற்கொள்ளப்பட்டது.

இதன்படி, இன்று மாக்கும்புர - மாத்தறை, மாக்கும்புர - காலி, மாக்கும்புர - பதுளை, கொழும்பு - அம்பாறை ஆகிய அதிவேகப் பஸ்களுக்காக வங்கி அட்டைகள் மூலம் பஸ் கட்டணம் செலுத்தும் சேவை அறிமுகப்படுத்தப்பட்டது.

இந்நிகழ்வில் கலந்துகொண்ட அமைச்சர் பிமல் ரத்நாயக்க அவர்கள், இன்று இதற்கு இணையாக, மேல் மாகாண வீதிப் பயணிகள் போக்குவரத்து அதிகாரசபையினால் (Western Provincial Road Passenger Transport Authority) போரளை - கடுவெல வரையிலும், ஊவா மாகாண வீதிப் பயணிகள் போக்குவரத்து அதிகார சபையினால் பதுளை - பண்டாரவளை, தம்புளை - மஹியங்கனை, மொனராகலை - பிபிலை மற்றும் மொனராகலை - வெல்லவாய இடையே இயங்கும் பஸ்களுக்காக வங்கி அட்டைகள் மூலம் பஸ் கட்டணம் செலுத்தும் செயல்முறை ஆரம்பிக்கப்பட்டதாகத் தெரிவித்தார்.

அத்துடன், நாளை (25) கொழும்பு - வவுனியா, கடுவெல - மகரகம, மாக்கும்புர - தங்கல்ல மற்றும் மாக்கும்புர - அநுங்குணகொளபெலஸ்ஸ (Angunukolapelessa) வரை செல்லும் பஸ்களுக்கு இந்தச் செயல்முறை ஆரம்பிக்கப்படவுள்ளதாகவும் அவர் தெரிவித்தார்.

இதற்கிடையில், இன்று இதற்கு இணையாக, மேல் மாகாண வீதிப் பயணிகள் போக்குவரத்து அதிகாரசபையினால் வங்கி அட்டைகள் மூலம் பஸ் கட்டணம் செலுத்தும் வேலைத்திட்டத்தை ஆரம்பிப்பதற்காக தலங்கம கொஸ்வத்த பிரதேசத்தில் நடைபெற்ற நிகழ்வில் கலந்துகொண்ட மேல் மாகாண வீதிப் பயணிகள் போக்குவரத்து அதிகாரசபையின் தலைவர் ஓய்வுபெற்ற கமாண்டர் காமினி ஜாசிங்க அவர்கள், இந்தச் செயல்முறையை வரும் டிசம்பர் மாதத்திற்குள் மேல் மாகாணத்தில் இயங்கும் அனைத்து அதிவேகப் பஸ்களுக்கும் அமுல்படுத்த திட்டமிடப்பட்டுள்ளதாகத் தெரிவித்தார்.

டிசம்பர் மாதத்தில் அந்தச் செயல்முறையை ஆரம்பித்து, பின்னர் வரும் 2026ஆம் ஆண்டு இறுதிக்குள் மேல் மாகாணத்தில் உள்ள அனைத்துப் பஸ்களுக்கும் வங்கி அட்டைகள் மூலம் பஸ் கட்டணம் செலுத்தும் சேவையை ஆரம்பிக்க நடவடிக்கை எடுக்கப்படும் என்றும் தலைவர் இந்நிகழ்வில் கருத்துத் தெரிவித்தார்.

அங்கு மேலும் கருத்துத் தெரிவித்த மேல் மாகாண வீதிப் பயணிகள் போக்குவரத்து அதிகாரசபையின் தலைவர் ஓய்வுபெற்ற கமாண்டர் காமினி ஜாசிங்க அவர்கள்,

"இந்த மாதத்தின் எஞ்சிய சில நாட்களிலும், டிசம்பர் மாதத்திலும் அதிவேகப் பாதையில் இயங்கும் அனைத்துப் பஸ்களுக்கும் இந்த முறையை அறிமுகப்படுத்த நாங்கள் இப்போது எதிர்பார்க்கிறோம். அதற்குப் பிறகு, ஜனவரி மாதத்தில் மேல் மாகாணத்திற்குள் இயங்கும் சொகுசுப் பஸ்களுக்கும், அத்துடன் தேர்ந்தெடுக்கப்பட்ட ஒரு சில சாதாரண பஸ்களுக்கும் இதை அறிமுகப்படுத்துவதற்கு எதிர்பார்க்கிறோம். அத்துடன், அடுத்த ஆண்டு இறுதிக்குள் மேல் மாகாணத்தில் இயங்கும் அனைத்துப் பஸ்களுக்கும் அட்டையைப் பயன்படுத்தி பணம் செலுத்தி, பயணச் சீட்டைப் பெற்றுக்கொள்ளும் சேவையைத் தொடங்குவதற்கும், நிறைவு செய்வதற்கும் நாங்கள் எதிர்பார்க்கிறோம்."