பசறை நீரில் மலம் கலந்த பற்றீரியா!

கலந்த E. coli பற்றீரியா (E. coli bacteria) இருப்பதாக ஒரு பரிசோதனையில் வெளிவந்துள்ளது.

2024 அக்டோபர் முதல் 2025 ஆகஸ்ட் வரையான காலப்பகுதியில் 96 நீர் மாதிரிகளைப் பயன்படுத்தி, பதுளை பிராந்திய சுகாதார சேவைகள் பணிப்பாளர் அலுவலகத்தில் மேற்கொள்ளப்பட்ட பரிசோதனைகளில், 90 சதவீதமான மாதிரிகளில் E. coli பற்றீரியா இருப்பது உறுதி செய்யப்பட்டுள்ளது.

இந்த நீர் விநியோகமானது, பசறை நகர மக்களுக்கு மட்டுமல்லாமல் பாடசாலைகள், வைத்தியசாலை, பொலிஸ் நிலையம் உள்ளிட்ட பல அரச நிறுவனங்களுக்கும் உள்ள ஒரேயொரு நீர் மூலமாகும்.

இந்த நீர் விநியோகத்திற்கான நீர், நமுனுகுல வீதியில் அமைந்துள்ள புகுல்வத்த குளத்திலிருந்தும், மில்லபெத்த உயர் மலைப்பகுதியில் உள்ள ஒரு நீரூற்றிலிருந்தும் பெறப்படுகிறது. புகுல்வத்த நீர்த்தேக்கத்தின் நீர் மட்டம் இந்த நாட்களில் மிகவும் குறைவாகக் காணப்படுவதுடன், தேயிலைத் தோட்டங்களைச் சேர்ந்த கழிவுகளால் நீர் மாசடைவதாகவும் அவதானிக்கப்பட்டுள்ளது. நீர் சேகரிக்கப்படும் மதகுக்கு அருகிலும் நீர் அசுத்தமடைவது காணப்படுகிறது.

பிராந்திய சுகாதார வைத்திய அதிகாரி ஏ.எம்.சமரபந்து குறிப்பிடுகையில், நீர் மூலங்கள் அமைந்துள்ள இடங்களும், அவற்றில் கழிவுகள் கலப்பதும் பிரதான பிரச்சினையாகும் என்றார். குறிப்பாக, தேயிலைத் தோட்டங்கள் சார்ந்த மலசலகூடக் கழிவுகள் நீரில் கலப்பதே முக்கிய காரணமாகும்.

பசறை பிரதேச சபையின் தலைவர் ரொஷான் பியசேன குறிப்பிடுகையில், 4 மாத காலப்பகுதிக்குள் இந்தப் பிரச்சினைகள் அடையாளம் காணப்பட்டுள்ளதாகவும், இதற்கு ஒரு நிரந்தரத் தீர்வை வழங்க நடவடிக்கை எடுப்பதாகவும் தெரிவித்தார். அவருடைய கூற்றுப்படி, நகரில் சுமார் 1,400 நீர் பாவனையாளர்கள் உள்ளதுடன், மாதாந்தக் கட்டணம் 400 ரூபாவாக இருந்தபோதிலும், நிலுவைத் தொகை சுமார் 40 இலட்சம் ரூபாவாக உள்ளது.

தூய்மையான நீரை வழங்குவதற்காக, இந்தத் திட்டத்தை தேசிய நீர் வழங்கல் மற்றும் வடிகாலமைப்புச் சபையிடம் ஒப்படைப்பது குறித்து பரிசீலிக்கப்படுவதாக தலைவர் மேலும் கூறினார். இருப்பினும், அதற்கு சபையின் ஏகமனதான அங்கீகாரம் தேவைப்படுவதுடன், நீர் வழங்கல் சபையிடம் ஒப்படைத்தால் நீர்க் கட்டணம் அதிகரிக்கக்கூடும் எனவும் அவர் சுட்டிக்காட்டினார்.

முன்னாள் நகரத் தந்தையும் தற்போதைய எதிர்க்கட்சித் தலைவருமான எம்.ஏ.காதர் கூறுகையில், 3 ஆண்டுகளில் முடிக்கப்பட வேண்டியிருந்த திட்டம், கொவிட் மற்றும் பிற பிரச்சினைகளால் 5 ஆண்டுகள் ஆகியுள்ளது என்றார். திட்டம் இறுதி கட்டத்தில் இருப்பதாகவும், பயிற்சி பெற்ற ஊழியர்கள் ஆட்சேர்ப்பு செய்யப்படாத காரணத்தினால் நீர் சுத்திகரிப்பு நிலையம் செயலிழந்துள்ளதாகவும் அவர் குறிப்பிட்டார்.