மலையக மக்கள் சார்பில் அரசாங்கத்திடம் சில அவசர கோரிக்கைகள்!

பெற்றுக்கொள்வதில் பாரிய சிக்கல்களையும் சவால்களையும் எதிர்நோக்கி வருவதாக மலையக சிவில் சமூகக் கூட்டமைப்பு தெரிவித்துள்ளது.

பொதுவாக அரசாங்க அதிகாரிகளிடையே, மலையகத் தமிழ் மக்கள் எதிர்நோக்கும் பிரச்சினைகள் குறித்த புரிதல் இல்லாமை மற்றும் குறிப்பாக காணி உரிமைகள் தொடர்பான தெளிவின்மை ஆகியவையே இதற்கு பிரதான காரணங்களாகும் என அந்த கூட்டமைப்பு சுட்டிக்காட்டியுள்ளது.

இந்த நிலைமை சரியாகக் கையாளப்படாவிட்டால், இன்னும் சில வாரங்களுக்குள் இவை பெரும் சிக்கல்களாக உருவெடுக்கும் அபாயம் இருப்பதாகவும் அக்கூட்டமைப்பு குறிப்பிட்டுள்ளது.

எனவே, இந்த மக்கள் முறையாக மீண்டெழுவதற்கும், பாதுகாப்பான சமூகமாக வாழ்வதற்கும் ஏதுவாக பின்வரும் விடயங்களில் கவனம் செலுத்துமாறு மலையக சிவில் சமூகக் கூட்டமைப்பு அரசாங்கத்திடம் கோரிக்கை விடுத்துள்ளது.

அரசாங்கத்திடம் முன்வைக்கப்பட்டுள்ள முன்மொழிவுகள் வருமாறு:

தகவல் தொடர்பாடல் மற்றும் மொழி உரிமை

நிவாரணங்கள், அவற்றை வழங்கும் திட்டங்கள் மற்றும் எதிர்கால நடவடிக்கைகள் குறித்த தெளிவான, உத்தியோகபூர்வ தகவல்களைப் பரிமாறிக்கொள்வது அவசியமாகும். இவை எப்போதும் தமிழ் மொழியிலும் முன்னெடுக்கப்பட வேண்டும்.

பேரிடரினால் பாதிக்கப்பட்ட ஆண்கள், பெண்கள் மற்றும் குழந்தைகள் இடம்பெயர்ந்தோர் முகாம்கள், பாடசாலைகள், உறவினர்களின் வீடுகள் மற்றும் பகுதியளவில் சேதமடைந்த வீடுகளில் தங்கியுள்ளனர். இவர்களில் பெரும்பான்மையானோர் மலையகத் தமிழர்களாவர். வரும் வாரங்களிலும் மாதங்களிலும் அவர்களின் மறுவாழ்வு நடவடிக்கைகள் என்ன என்பது குறித்து தெளிவான புரிதல் இல்லை.

பாதிக்கப்பட்ட மலையக மக்கள் தமது வாழ்க்கையை மீண்டும் கட்டியெழுப்புவதற்கு அரசாங்கம் வழங்கும் உதவிகளை எவ்வாறு பெற்றுக்கொள்வது? அதற்கான நடைமுறைகள் என்ன? அரசாங்கத்தின் தீர்மானங்களின்படி தங்களது வீடுகளுக்குத் திரும்ப முடியாவிட்டால், அவர்களுக்கான மாற்று வழிமுறைகள் என்ன? தற்காலிக தீர்வுகள் மற்றும் நிரந்தர தீர்வு கிடைக்கும் வரையிலான இடைக்காலத் திட்டங்கள் என்ன என்பது குறித்து பெரும் நிச்சயமற்ற தன்மை நிலவுகிறது.

இவ்வாறான நிலைமைகள் மக்களை மேலும் கவலைக்குள்ளாக்குவதுடன், ஒட்டுமொத்த சமூகத்தையும் குழந்தைகளையும் உளவியல் ரீதியான பாதிப்புகளுக்கும் அதன் விளைவுகளுக்கும் இட்டுச் செல்கிறது. இந்தச் சூழலில், அவர்களின் மனநலத்தைப் பேணுவதற்கும் எதிர்காலம் குறித்த நம்பிக்கையை ஏற்படுத்துவதற்கும் தெளிவான மற்றும் துல்லியமான தகவல்கள் அவசியமாகும். இதற்காக அரசாங்கம் பின்வரும் நடவடிக்கைகளை எடுக்க வேண்டும்.

அரசாங்கம் எடுக்க வேண்டிய நடவடிக்கைகள்

01. தகவல் தொடர்பாடல் மற்றும் மொழி அமுலாக்கம்

1. 1. அனைத்து நிவாரண மற்றும் மறுசீரமைப்பு பணிகள் தொடர்பான தகவல்கள் மற்றும் அறிவிப்புகள் தற்போது பெரும்பாலும் சிங்கள மொழியில் மட்டுமே வெளியிடப்படுவதைக் காணமுடிகிறது. அவை உடனடியாக தமிழ் மொழியிலும் வெளியிடப்பட வேண்டும். அத்துடன் மலையக மக்களைச் சென்றடையும் வகையில் பொருத்தமான ஊடகங்கள் ஊடாக அவை பகிரப்பட வேண்டும்.

1. 2. நிவாரண மற்றும் மறுவாழ்வுப் பணிகள் ஒரு நிலையான நிலையை அடையும் வரை, பேரிடர் நிவாரணம் மற்றும் மறுசீரமைப்பு தொடர்பான முடிவுகளை விளக்குவதற்கு தமிழ் பேசும் அமைச்சர் அல்லது பிரதி அமைச்சர் ஒருவர் வாராந்த அமைச்சரவை தீர்மானங்களை அறிவிக்கும் ஊடகவியலாளர் சந்திப்பில் கலந்துகொள்ள வேண்டும். இதன்போது உடனடி மொழிபெயர்ப்பு (Simultaneous Translation) வழங்கப்படுவது மிகவும் அவசியமாகும்.

1. 3. பேரிடர் மேலாண்மைக்காக நியமிக்கப்பட்டுள்ள அத்தியாவசிய சேவைகள் ஆணையாளர் நாயகத்தினால் நடத்தப்படும் ஊடக சந்திப்புகள் மற்றும் பொதுக் கூட்டங்களில் தமிழ் மொழிபெயர்ப்பு கட்டாயம் வழங்கப்பட வேண்டும்.

1. 4. தேசிய பேரிடர் மேலாண்மை சபை, பேரிடர் மேலாண்மை நிலையம் மற்றும் ஏனைய அமைச்சகங்களினால் வெளியிடப்படும் அனைத்து சுற்றறிக்கைகளும் தமிழ் மொழியில் வெளியிடப்பட வேண்டும். இதனை உறுதிப்படுத்தவும், தேவையான ஆதரவை வழங்கவும் ஜனாதிபதி செயலகத்தில் ஒரு தற்காலிகப் பிரிவு (Unit) நிறுவப்பட வேண்டும்.

1. 5. பிரதேச செயலகங்கள் மற்றும் கிராம உத்தியோகத்தர் மட்டத்திலான கலந்துரையாடல்கள் அரசியலமைப்பில் உள்ளவாறு அரச கரும மொழி கொள்கைக்கு அமைவாக நடத்தப்பட வேண்டும். பாதிக்கப்பட்டவர்கள் தமது சொந்த மொழியில் சேவைகளைப் பெற்றுக்கொள்ள ஜனாதிபதி மீண்டும் வலியுறுத்த வேண்டும்.

02. மேலதிக அரச ஊழியர்களை நியமித்தல்

மலையகப் பகுதிகளில் நிலவும் அதிக மழை மற்றும் மண்சரிவு காரணமாக போக்குவரத்து மிகவும் கடினமாகியுள்ளது. சாதாரண கிராமங்களுடன் ஒப்பிடுகையில், மலையக கிராம உத்தியோகத்தர் பிரிவுகளில் மக்கள்தொகை மிக அதிகமாக உள்ளது (உதாரணமாக நுவரெலியா மாவட்டத்தில் ஒரு பிரிவில் சராசரியாக கிராமங்களை விட 3 மடங்கு அதிக மக்கள் வாழ்கின்றனர்). 13,000 க்கும் அதிகமான மக்கள் வாழும் பிரிவுகளும் உள்ளன.

நிவாரண விண்ணப்பங்களை விநியோகித்தல், சேத மதிப்பீடு செய்தல் போன்ற பணிகளை ஒரு கிராம உத்தியோகத்தர் மாத்திரம் கையாள்வது கடினமாகியுள்ளது. எனவே:

1. 1. தோட்ட சமூக தொடர்பாடல் அதிகாரிகள் மற்றும் தமிழ் பேசும் அபிவிருத்தி உத்தியோகத்தர்களை கிராம உத்தியோகத்தர்களுடன் இணைந்து பணியாற்ற நியமிக்க வேண்டும். தேவையேற்படின் தகுதியுள்ள தன்னார்வலர்களையும் இணைத்துக்கொள்ள வேண்டும். இல்லையெனில், 25,000/- அல்லது 50,000/- ரூபாய் போன்ற உடனடி நிவாரணங்கள் கூட மக்களைச் சென்றடைய மாதக்கணக்கில் தாமதமாகலாம்.

1. 2. பல வருடங்களாக மலையக மக்களின் நலன்புரிப் பொறுப்புகளைத் தோட்ட நிர்வாகத்திடம் ஒப்படைத்துவிட்டு அரசாங்கம் ஒதுங்கியிருந்ததன் விளைவே தற்போதைய நிலைமையாகும். எனவே, இந்த நிவாரணப் பணிகளில் எந்தவொரு இடைத்தரகர்களும் இன்றி அரச இயந்திரம் நேரடியாகச் சேவை வழங்க வேண்டும். 'தோட்டத்தில் வேலை செய்பவர்', 'வேலை செய்யாதவர்' என்ற பாகுபாடு இன்றி அனைவரும் சமமாக நடத்தப்பட வேண்டும்.

1. 3. மலையகப் பகுதிகளில் இதுவரை நியமிக்கப்படாத பேரிடர் மேலாண்மைக் குழுக்கள் (Disaster Management Committees) உடனடியாக நியமிக்கப்பட வேண்டும்.

1. 4. மலையகத்தில் பல பகுதிகளில் கிராம அபிவிருத்திச் சங்கங்கள் (RDS) இல்லாததால், மறுசீரமைப்புப் பணிகள் குறித்த மக்கள் ஆலோசனைகளுக்கு விசேட ஏற்பாடுகள் செய்யப்பட வேண்டும். இதில் பெண்கள் மற்றும் இளைஞர்களின் பங்களிப்பு மற்றும் கருத்துக்கள் உள்வாங்கப்படுவதை உறுதி செய்ய வேண்டும்.

03. நிவாரணத் திட்டங்களை நடைமுறைப்படுத்துவதில் நெகிழ்வுத்தன்மை

மலையகப் பகுதிகளில் நிலவும் சட்ட மற்றும் நிர்வாகச் சூழல் காரணமாக, அங்கு வாழும் மக்களுக்குக் காணி உரிமை இல்லாத நிலை காணப்படுகிறது. இதனால் அவர்கள் தமது விவசாயம், கால்நடை வளர்ப்பு மற்றும் சிறு வணிகங்களைப் பதிவு செய்ய முடியாமல் உள்ளனர். எனவே, தற்போதுள்ள அரசாங்கச் சுற்றறிக்கைகளின் அடிப்படையில் நட்டஈடு பெறுவதற்கான தகுதிகளைப் பூர்த்தி செய்வது மலையக மக்களுக்குப் பெரும் சவாலாக உள்ளது.

1. 1. பயிர்ச் சேதங்கள், கால்நடை இழப்புகள் மற்றும் சிறு தொழில்துறை பாதிப்புகளுக்கு அரசாங்கம் வழங்கும் நட்டஈடு மலையக மக்களைச் சென்றடைவதை உறுதி செய்ய, தகுதிகளை உறுதிப்படுத்தும் நடைமுறைகளில் நெகிழ்வுத்தன்மை (Flexibility) பேணப்பட வேண்டும். இதற்காகப் பாதிக்கப்பட்ட மலையக மக்களை மையப்படுத்திய விசேட சுற்றறிக்கைகள் மற்றும் நடைமுறைகள் அத்தியாவசிய சேவை ஆணையாளர் நாயகம் மற்றும் ஏனைய அமைச்சகங்கள் ஊடாக முன்னெடுக்கப்பட வேண்டும்.

1. 2. அரச சேவைகளைப் பெறுவதில் மலையக மக்கள் எதிர்நோக்கும் நடைமுறைச் சிக்கல்களைத் தீர்க்க, குறைந்தபட்சம் தற்காலிகமாகவேனும் சிரேஷ்ட நிர்வாக சேவை அதிகாரி (SLAS) ஒருவரை உதவி அத்தியாவசிய சேவைகள் ஆணையாளராக நியமிக்க வேண்டும். அவர் மலையகப் பகுதிகளில் அனுபவமுள்ள மற்றும் தமிழ் மொழி பேசும் அதிகாரியாக இருத்தல் வேண்டும்.

1. 3. பேரிடர் மேலாண்மை நிலையத்தினால் முன்னெடுக்கப்படும் சேத மதிப்பீடுகள் மற்றும் தேவைகளை இனங்காணும் பணிகளில் மலையக சமூகம் மற்றும் மலையகப் பகுதிகள் தொடர்பான தரவுகள் குறித்து விசேட கவனம் செலுத்தப்பட வேண்டும். ஐக்கிய நாடுகள் சபை மற்றும் உலக வங்கி ஆகியவை இலங்கை அரசாங்கத்துடன் இணைந்து முன்னெடுக்கும் மதிப்பீடுகளில் மலையக மக்களின் பிரச்சினைகள் முறையாக உள்வாங்கப்படுவதை உறுதி செய்ய வேண்டும்.

04. தோட்ட உட்கட்டமைப்பு வசதிகளை மீளமைத்தல்

பேரிடர் காரணமாக வீதி அபிவிருத்தி அதிகாரசபை அல்லது மாகாண வீதி அபிவிருத்தி அதிகாரசபைக்குச் சொந்தமில்லாத நூற்றுக்கணக்கான கிலோமீட்டர் நீளமான தோட்ட வீதிகள் சேதமடைந்துள்ளன. அத்துடன் பாலங்கள், வாய்க்கால்கள், முன்பள்ளிகள், தோட்ட வைத்தியசாலைகள் மற்றும் சமூக மண்டபங்களும் அழிந்துள்ளன.

இவை பெரும்பாலும் தோட்ட நிர்வாகங்களினால் நிர்வகிக்கப்பட்ட கட்டிடங்களாகும். இவற்றை மீளமைக்க அரசாங்கம் பொறுப்பேற்று பின்வரும் நடவடிக்கைகளை எடுக்க வேண்டும்:

1. 1. 2018 ஆம் ஆண்டின் பிரதேச சபைகள் சட்டத் திருத்தத்தின்படி, மலையகப் பகுதிகளில் இவ்வாறான உட்கட்டமைப்பு பணிகளை முன்னெடுக்க பிரதேச சபைகளுக்கு அதிகாரம் உள்ளதென்பதை விளக்கி, உரிய அமைச்சினால் அனைத்து பிரதேச சபை ஆணையாளர்களுக்கும் பணிப்புரை விடுக்கப்பட வேண்டும். இதற்காக மத்திய அரசாங்கத்தின் வரவுசெலவுத் திட்டத்திலிருந்து மேலதிக நிதி ஒதுக்கப்பட வேண்டும்.
2. 2. 13வது அரசியலமைப்புத் திருத்தத்தின்படி, மலையகப் பகுதிகளின் உட்கட்டமைப்பு அபிவிருத்தி மாகாண சபைகளுக்குரிய விடயமாகும். எனவே, மறுசீரமைப்புப் பணிகளுக்காக உரிய மாகாண சபைகளுக்கு மேலதிக நிதி ஒதுக்கப்பட வேண்டும்.
3. 3. தோட்ட உட்கட்டமைப்பு அமைச்சு மற்றும் அதன் கீழ் இயங்கும் புதிய கிராமங்கள் அதிகாரசபை (NEVIDA) ஆகியவற்றின் நிதியொதுக்கீடுகள் அதிகரிக்கப்பட்டு, அவற்றின் செயற்பாட்டுத் திறன் வலுப்படுத்தப்பட வேண்டும். தோட்டக் குடியிருப்புகளை அனைத்து வசதிகளையும் கொண்ட கிராமங்களாக மாற்றும் அதன் முக்கிய நோக்கம், இந்த மறுசீரமைப்புக் காலப்பகுதியில் தீவிரமாக முன்னெடுக்கப்பட வேண்டும்.
4. 4. கல்வி மற்றும் சுகாதார அமைச்சுகள், மின்சார சபை மற்றும் நீர் வழங்கல் சபை ஆகியன மலையகப் பகுதிகளில் தமது பணிகளை முன்னெடுக்கத் தேவையான நிதி ஒதுக்கீடுகளைச் செய்து, அப்பணிகளை விரைவாகச் செய்து முடிக்க வேண்டும்.

05. மலையக மக்களின் வீடமைப்பு மற்றும் காணி உரிமைகள் குறித்த தெளிவான கொள்கை மற்றும் உத்தியோகபூர்வ அங்கீகாரம்

பிராந்திய தோட்டக் கம்பனிகள் மற்றும் தனியார் தோட்டங்களில் வாழும் மலையக மக்களுக்குக் காணி உரிமை இல்லாமை, அவர்களது வாழ்க்கையை மீண்டும் கட்டியெழுப்புவதில் உள்ள அடிப்படைப் பிரச்சினையாகும். முழுமையாகச் சேதமடைந்த வீடுகளுக்கு 50 இலட்சம் ரூபாயும், பகுதியளவு சேதமடைந்த வீடுகளுக்கு 25 இலட்சம் ரூபாயும், காணி கொள்வனவுக்காக 50 இலட்சம் ரூபாயும் நட்டஈடாக வழங்க அரசாங்கம் தீர்மானித்திருந்தாலும், காணி உரிமை இல்லாத மலையக மக்களுக்கு இந்த நிதி கிடைக்குமா என்பது பெரும் கேள்விக்குறியாக உள்ளது.

தற்போதுள்ள நடைமுறைப்படி, இந்த நட்டஈட்டைப் பெற காணி உறுதிப்பத்திரங்களை (Deeds) சமர்ப்பிப்பது அவசியமாகும். உதாரணமாக, ஒரு 'லயன்' குடியிருப்பில் நான்கு அறைகள் அழிந்திருந்தால், அந்த நட்டஈடு அங்கு வாழும் குடும்பங்களுக்குக் கிடைக்குமா அல்லது காணி உரிமையாளரான தோட்ட உரிமையாளருக்குக் கிடைக்குமா என்ற சிக்கல் உள்ளது.

1. 1. மலையக மக்களின் காணி மற்றும் வீடமைப்பு உரிமைகள் தொடர்பாக அரசாங்கம் இனியும் தாமதிக்காமல் தெளிவான கொள்கை முடிவுகளை எடுக்க வேண்டும். நாட்டின் ஏனைய குடிமக்களுக்கு வழங்கப்படும் காணி தீர்வுகளுக்கு இணையாக மலையக மக்களின் உரிமைகளும் உறுதிப்படுத்தப்பட்டு பகிரங்கப்படுத்தப்பட வேண்டும்.
2. 2. இந்தக் கொள்கையை வகுப்பதற்கும், பாதிக்கப்பட்ட மலையக மக்களுக்குப் பரிந்துரைகளை வழங்குவதற்கும் அரசியல், நிர்வாக, தோட்டக் கம்பனிகள் மற்றும் சிவில் சமூகப் பிரதிநிதிகளை உள்ளடக்கிய கமிட்டி ஒன்று நிறுவப்பட வேண்டும்.
3. 3. பாதிக்கப்பட்ட மக்களுக்கான தீர்வுகளை வழங்கும் போது, அவர்களின் வாழ்வாதாரம் மற்றும் சமூக உறவுகளுக்குப் பாதிப்பு ஏற்படாத வகையில் அவை அமைய வேண்டும். வீடுகளை மீளக் கட்டியெழுப்பும் போதும், மக்களை மீள்குடியேற்றும் போதும் இவ்விடயம் கவனத்தில் கொள்ளப்பட வேண்டும்.
4. 4. அரசாங்கத்தின் கீழ் உள்ள தோட்டங்களில் (JEDB, SLSPC, எல்கடுவ போன்றவை) உள்ள காணிகளின் அளவு மற்றும் பயன்பாடு குறித்த தகவல்களை உடனடியாகப் பெற்று, ஜனாதிபதியின் தலையீட்டுடன் அந்தத் தோட்டங்களிலேயே பாதுகாப்பான இடங்களில் மக்களுக்கு மாற்று காணிகள் வழங்கப்பட வேண்டும்.
5. 5. தோட்டக் கம்பனிகளின் கீழ் உள்ள நிலங்களில் வாழும் மக்களுக்கும், அதே தோட்டங்களில் உள்ள அபாயமற்ற பகுதிகளை இனங்கண்டு மீள்குடியேற்ற நடவடிக்கைகளை முன்னெடுக்க ஜனாதிபதி உத்தரவிட வேண்டும். தேவையேற்படின் தோட்டக் கம்பனிகளுடனான குத்தகை ஒப்பந்தங்கள் (Lease Agreements) மறுபரிசீலனை செய்யப்பட வேண்டும்.
6. 6. இந்த மீள்குடியேற்ற நடவடிக்கைகள் இலங்கை ஏற்றுக்கொண்டுள்ள சர்வதேச தரத்திலான 'மீள்குடியேற்றக் கொள்கைக்கு' (Resettlement Policy) அமைவாக இருப்பதை உறுதி செய்ய வேண்டும். இதனை மீறுவது இலங்கைக்குக் கிடைக்கக்கூடிய சர்வதேச கடன் மற்றும் உதவிகளைப் பாதிக்கலாம். மலையக மக்கள் மீண்டும் வறுமைக்கும் ஓரங்கட்டப்படுதலுக்கும் ஆளாகாமல் இருப்பதை உறுதி செய்ய இந்த அணுகுமுறை அவசியமாகும்.
7. 7. நட்டஈடு வழங்குதல் மற்றும் மீள்குடியேற்றம் போன்ற பணிகளில், பாதிக்கப்பட்ட மலையகத் தமிழ் மக்களுக்கும் அருகிலுள்ள கிராமங்களில் வாழும் மக்களுக்கும் இடையில் எவ்விதப் பாகுபாடும் காட்டப்படக்கூடாது. பிரதேச செயலக மட்டத்தில் அனைவருக்கும் ஒரே மாதிரியான சட்டங்களும் கொள்கைகளும் நடைமுறைப்படுத்தப்பட வேண்டும்.

பேரிடர் நிவாரணப் பணிகளில் ஈடுபட்டுள்ள அமைப்புகள், சிவில் செயற்பாட்டாளர்கள் மற்றும் களப்பணியில் ஈடுபட்டுள்ள அரச அதிகாரிகள், பாதிக்கப்பட்ட மலையகத் தமிழ் மக்களுடன் நடத்திய கலந்துரையாடல்களின் அடிப்படையில், 'மலையகத்தை மீளக் கட்டியெழுப்புவதற்கான சிவில் அமைப்பு' இந்த அடிப்படை கோரிக்கைகளை முன்வைக்கிறது.

பேரிடருக்குப் பின்னரான மறுசீரமைப்புத் திட்டமானது, மலையக மக்கள் தமது தோட்டக் குடியிருப்புகளை முறையான கிராமங்களாக மாற்றுவதற்காக முன்னெடுத்து வரும் நீண்டகாலப் போராட்டத்தை வெற்றிகொள்வதற்கான ஒரு செயன்முறையாக அமைய வேண்டும் என நாங்கள் நம்புகிறோம். இந்தக் கோரிக்கைகளை நிறைவேற்றுவதற்காக, எமது கோரிக்கைகளை ஏற்றுக்கொண்ட அனைத்துத் தரப்பினருடனும் இணைந்து செயற்படத் தீர்மானித்துள்ளோம்.

இங்கு உள்ளடக்கப்பட்டுள்ள விடயங்கள், பிரதி அமைச்சர் பிரதீப் சுந்தரலிங்கம் அவர்களுடனும், எதிர்க்கட்சியின் மலையகத் தமிழ் பிரதிநிதிகளான பாராளுமன்ற உறுப்பினர்கள் மனோ கணேசன், ராதாகிருஷ்ணன் மற்றும் ஜீவன் தொண்டமான் ஆகியோருடனும் கலந்துரையாடப்பட்டு முன்வைக்கப்பட்டுள்ளன. இவர்கள் அனைவரும் இந்த முயற்சியை நேர்மறையாகக் கருதுவதுடன், பாதிக்கப்பட்ட மக்களின் நலனுக்காக சாத்தியமான அனைத்து ஒத்துழைப்புகளையும் வழங்குவதாகத் தெரிவித்துள்ளனர். ஆளுங்கட்சியின் ஏனைய மலையகத் தமிழ் பிரதிநிதிகளுடனும் இது குறித்து மிக விரைவில் கலந்துரையாட உத்தேசித்துள்ளோம்.

மேற்குறிப்பிட்ட கோரிக்கைகளின் அடிப்படையில் ஜனாதிபதி அநுர குமார திஸாநாயக்க அவர்களுடன் ஒரு சந்திப்பை ஏற்பாடு செய்து, இந்த விடயங்களை அவரது கவனத்திற்கு கொண்டு செல்ல நடவடிக்கை எடுக்குமாறு நாம் அவர்கள் அனைவரிடமும் கேட்டுக்கொள்கிறோம். தற்போதைய சூழலில், நாட்டின் நிறைவேற்று அதிகாரம் கொண்ட ஜனாதிபதியின் அங்கீகாரம் மற்றும் அறிவிப்பு இருந்தால் மட்டுமே இந்தக் கோரிக்கைகளை நடைமுறைப்படுத்த முடியும்.

மலையகப் பகுதிகளில் வாழும் பாதிக்கப்பட்ட மலையகத் தமிழ் மக்களுக்கு அரசாங்கத்தின் நிவாரணங்கள், மறுவாழ்வு மற்றும் மறுசீரமைப்புப் பணிகளை எவ்வாறு வழங்குவது? அபாயகரமான 'லயன்' குடியிருப்புகளில் இருந்து அவர்களை விடுவித்து, வாழ்வாதாரத்திற்கு அருகாமையிலான காணி உரிமையுடன் கூடிய பாதுகாப்பான இடங்களில் எவ்வாறு குடியேற்றுவது என்பது குறித்த வேலைத்திட்டம் ஜனாதிபதியின் தலைமையின் கீழ் முன்வைக்கப்பட வேண்டும் என்பதே எமது நம்பிக்கையாகும்.

கையெழுத்திட்டவர்கள்:
கௌதமன் பாலச்சந்திரன்,
நடேசன் சுரேஷ்,
அந்தனி ஜேசுதாசன்,
அருணாசலம் சண்முகவடிவு,
செல்வராஜா ராஜசேகர்,
ஜீவரத்தினம் சுரேஷ்,
கமலேஸ்வரி லக்ஷ்மணன்,
ஜெஹான் ஜகதீசன்,
வேலுசாமி வீரசிங்கம்,
சரண்யா அருண்பிரசாத்,
அனித்ரா வரய.


மேலதிக விபரங்களுக்கு:

ஜீவரத்தினம் சுரேஷ் – 077 991 5459
அந்தனி ஜேசுதாசன் - 077 703 4136