அநுர ஜனாதிபதியாகி ஒரு வருடம் பூர்த்தி!

கடந்த வருடம் செப்டம்பர் 21ஆம் திகதி நடைபெற்ற ஜனாதிபதித் தேர்தலில் 56 இலட்சத்து 34,915 வாக்குகளைப் பெற்று அவர் வெற்றி பெற்றார்.

ஜனாதிபதி அநுரகுமார திசாநாயக்க தனது புதிய பதவியில் கடந்த ஆண்டு செப்டம்பர் 23ஆம் திகதி பதவிப் பிரமாணம் செய்தார்.

2021ஆம் ஆண்டு டிசம்பர் 20ஆம் திகதி தேசிய மக்கள் சக்தியின் தலைமைப் பதவிக்கு வந்த ஜனாதிபதி, அதன் வேட்பாளராகவே ஜனாதிபதித் தேர்தலில் போட்டியிட்டார்.

கடந்து சென்ற ஒரு வருட காலப்பகுதியில் வருமானத்திற்கும் செலவிற்கும் இடையிலான இடைவெளி குறைந்ததாகவும், முதல் 06 மாதங்களில் மட்டும் அரச வருமானம் 3221 பில்லியன் ரூபாவாக இருந்தது எனவும் அரசாங்கம் அறிவிக்கின்றது.

சுற்றுலா வருமானம், வெளிநாட்டு முதலீடுகள், வெளிநாட்டுச் செலாவணி, ஏற்றுமதி மற்றும் சுங்க வருமானம் ஆகிய துறைகளிலும் குறித்த காலப்பகுதியில் அதிகரிப்பு ஏற்பட்டுள்ளதாகக் குறிப்பிடப்பட்டுள்ளது.

அரசுக்குச் சொந்தமான நிறுவனங்களைப் பலப்படுத்தி சட்டத்தின் ஆட்சியை உறுதிப்படுத்த நடவடிக்கை எடுக்கப்பட்டுள்ளதோடு, தேசிய நல்லிணக்கத்தையும் சகவாழ்வையும் ஏற்படுத்துவதற்காக பல வேலைத்திட்டங்கள் முன்னெடுக்கப்பட்டுள்ளதாகவும் அரசாங்கம் குறிப்பிடுகின்றது.

போதைப்பொருள் மற்றும் பாதாள உலகக் கோஷ்டிகளை ஒழித்தல் உள்ளிட்ட நடவடிக்கைகளுக்கு மேலதிகமாகவே இவை மேற்கொள்ளப்பட்டுள்ளதாகத் தெரிவிக்கப்படுகிறது.