காலியில் பல வீதிகள் நீரில் மூழ்கின

காலி - பத்தேகம பிரதான வீதி, தலாபிட்டிய, பெலிகஹ மற்றும் கஹதுவவத்த ஆகிய பகுதிகளில் முழுமையாக நீரில் மூழ்கியுள்ளன.

காலி - கிதுலம்பிட்டிய வீதியில், மொரகொட வாவி பெருக்கெடுத்துப் பாய்வதால் மொரகொட பகுதியும் நீரில் மூழ்கியுள்ளது.

முறையற்ற அபிவிருத்திச் செயன்முறைகள், அனுமதியற்ற நிர்மாணங்கள் மற்றும் வடிகால் அமைப்புகளை முறையாக சுத்திகரிக்காமை ஆகியவையே இந்த நிலைமைக்கு காரணம் என பிரதேசவாசிகள் தெரிவிக்கின்றனர்.

இது தொடர்பில் அதிகாரிகளுக்கு பலமுறை அறிவித்தும் எவ்வித தீர்வும் கிடைக்கப்பெறவில்லை எனவும், சிறிய மழை பெய்தால்கூட இப்பகுதிகள் நீரில் மூழ்குவதாகவும் மக்கள் குறிப்பிடுகின்றனர்.

கொழும்பின் பல வீதிகளில் கடும் போக்குவரத்து நெரிசல் ஏற்பட்டுள்ளதாக தகவல்கள் தெரிவிக்கின்றன.

தொடர்ந்தும் பதிவாகி வரும் கனமழை காரணமாக இந்த போக்குவரத்து நெரிசல் ஏற்பட்டுள்ளதாக அத தெரண செய்தியாளர் தெரிவித்தார்.

அத்துடன் சில வீதிகள் நீரில் மூழ்கியுள்ளதாகவும் கூறப்படுகின்றது.

இலங்கைக்கு கிழக்காக விருத்தியடைந்த கீழ் வளிமண்டலத் தளம்பல் நிலை எதிர்வரும் மணித்தியாலங்களில் ஒரு குறைந்த அழுத்தப் பிரதேசமாக விருத்தியடையக் கூடிய சாத்தியம் காணப்படுகின்றது.

இத் தொகுதியின் தாக்கம் காரணமாக நாட்டின் பெரும்பாலான பிரதேசங்களில் மேகமூட்டமான வானம் காணப்படும் என எதிர்பார்க்கப்படுகின்றது. மேல், சப்ரகமுவ, மத்திய, வடமேல், தென் மற்றும் வடக்கு மாகாணங்களில் இடியுடன் கூடிய மழை பெய்யக் கூடிய சாத்தியம் காணப்படுகின்றது.

இந்தப் பிரதேசங்களில் சில இடங்களில் 100 மில்லிமீற்றருக்கும் அதிகமான பலத்த மழைவீழ்ச்சி எதிர்பார்க்கப்படுகின்றது. பிற்பகல் 1 மணிக்கு பின்னர் நாட்டின் பெரும்பாலான பகுதிகளில் இடியுடன் கூடிய மழை பெய்யக்கூடும் என அந்த திணைக்களம் குறிப்பிட்டுள்ளது.

இடியுடன் கூடிய மழை பெய்யும் வேளைகளில், தற்காலிகமாக அதிகரித்து வீசக் கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக் கொள்ளுமாறு பொதுமக்களை வளிமண்டலவியல் திணைக்களம் அறிவுறுத்தியுள்ளது.