இலங்கைக்கு அடுத்தடுத்து விழப்போகும் பேரிடிகள்!

ஏற்கனவே பொருளாதார நெருக்கடியால் துவண்டு, நிமிர முடியாமல் போராடிக் கொண்டிருக்கும் இலங்கைக்கு இது போதாத காலம் போலும். அடுத்து மிக மோசமான காலநிலைப்பாதிப்பை இலங்கை எதிர்கொள்ள
இருப்பதாக வளிமண்டலவியல் நிபுணர்கள் கூறுகின்றனர்.

அடுத்த இரண்டு அல்லது மூன்று மாதங்களுக்கு பெருமளவில் தொடர் மழை இருப்பதாகத் தெரிவிக்கப்படுகின்றது. குறைந்தது ஆறு தாழமுக்கங்களை இலங்கை பிரதேசம் அடுத்த பெப்ரவரி
வரையில் எதிர்கொள்ளக் கூடிய வாய்ப்பு இருப்பதாகவும் கூறப்படுகின்றது.

அண்மைக் காலம் வரை வரட்சியை எதிர்கொண்ட நாடு இப்போது பெருமழையை எதிர்கொண்டு வருகின்றது.
ஏற்கனவே எலுமிச்சம்பழம் விலை கிலோ 3,000 ரூபாவைத் தாண்டி விட்டது.

மழை வெள்ள நிலைமை மோசமடைந்த பின்னர் மரக்கறிகளின் விலை எக்கச்சக்கமாக எகிறும் ஆபத்து உள்ளது. இப்போது பெய்கின்ற மழை விட்டுத்தராவிட்டால் இம்முறை வேளாண்மையும் பெரும் அளவில் பாதிக்கப்பட்டு அரிசி இறக்குமதி மீண்டும் நெருக்கடியைத் தரும் விவகாரமாக மாறும்.

ஏற்கனவே வறட்சியால் தென்னைச் செய்கை மோசமாக பாதிக்கப்பட்டிருக்கின்றது. காலம் பிந்திய மழை உடனடி விளைச்சலுக்கு உதவப்போவதில்லை. அதனால் தேங்காய் தட்டுப்பாடும் அடுத்து வரும் வாரங்களில் ஏற்படும் சாத்தியம் இருப்பதாகத் தெரிவிக்கப்படுகிறது.

ஏற்படப் போகும் காலைநிலை மாற்றம் தன் பங்குக்கு நாட்டுக்கு பெரும் நெருக்கடி கொடுத்துவிட்டுப் போகும்
என்றுதான் கருதப்படுகிறது. பொருளாதார நெருக்கடியிலிருந்து நாடு மீளுவது என்பது சிக்கலாகத்தான்
இருக்கப் போகின்றது.

• காலை முரசு