திருத்தம் செய்வதற்கு ஜனாதிபதி நடவடிக்கை எடுத்துள்ளார்.
ஜனாதிபதி அநுர குமார திஸாநாயக்க அவர்களினால் இது தொடர்பான வர்த்தமானி அறிவித்தல் வெளியிடப்பட்டுள்ளதாக அறியமுடிகின்றது. தற்போதைய அரசாங்கத்தின் அமைச்சரவையில் அண்மையில் இடம்பெற்ற திருத்தத்துடன், இந்த விடயப் பரப்புக்கள் திருத்தப்பட்டுள்ளதாக குறிப்பிடப்பட்டுள்ளது.
அந்த திருத்தங்களுக்கு அமைய, பாதுகாப்பு அமைச்சின் கீழ் இருந்த சிவில் பாதுகாப்புத் திணைக்களமும், நீதி மற்றும் தேசிய ஒருமைப்பாட்டு அமைச்சின் கீழ் இருந்த புனர்வாழ்வுப் பணியகமும், பொதுப் பாதுகாப்பு மற்றும் பாராளுமன்ற விவகார அமைச்சிடம் ஒப்படைக்கப்பட்டுள்ளன.
அத்துடன், சுகாதார அமைச்சின் கீழ் இருந்த வரையறுக்கப்பட்ட ஸ்ரீ லங்கா திரிபோஷா கூட்டுத்தாபனம், வர்த்தக, வாணிப, உணவுப் பாதுகாப்பு மற்றும் கூட்டுறவு அபிவிருத்தி அமைச்சிடமும், புத்தசாசன, சமய மற்றும் கலாசார அலுவல்கள் அமைச்சின் கீழ் இருந்த வரையறுக்கப்பட்ட செலசினே மீடியா சொல்யூஷன்ஸ் தனியார் நிறுவனம், சுகாதார மற்றும் வெகுஜன ஊடக அமைச்சின் கீழும் கொண்டுவரப்பட்டுள்ளதாக அறியமுடிகின்றது.
சுற்றாடல் அமைச்சின் கீழ் இருந்த புவிச்சரிதவியல், அளவை மற்றும் சுரங்கப் பணியகம், கைத்தொழில் மற்றும் தொழில்முயற்சியாண்மை அபிவிருத்தி அமைச்சின் கீழும், விவசாய, கால்நடை, காணி மற்றும் நீர்ப்பாசன அமைச்சின் கீழ் இருந்த கறுவா அபிவிருத்தித் திணைக்களம், பெருந்தோட்ட மற்றும் சமூக உட்கட்டமைப்பு அமைச்சின் கீழும் கொண்டுவர நடவடிக்கை எடுக்கப்பட்டுள்ளது.
இதேவேளை, எரிசக்தி அமைச்சின் கீழ் உள்ள லங்கா விதுலிபல கமகே (Lanka Electricity Company), வரையறுக்கப்பட்ட லங்கா விதுலி தனியார் கம்பனி (Lanka Electricity Private Limited) என திருத்தம் செய்ய நடவடிக்கை எடுக்கப்பட்டுள்ளதுடன், மின்சார சபையை மறுசீரமைக்கும் திட்டத்தின் கீழ் அறிமுகப்படுத்தப்பட்ட 4 புதிய நிறுவனங்களும் இந்த புதிய வர்த்தமானி மூலம் அறிவிக்கப்பட்டுள்ளதாக குறிப்பிடப்பட்டுள்ளது.
அண்மையில் இடம்பெற்ற அமைச்சரவை மாற்றத்தின் போது அறிமுகப்படுத்தப்பட்ட அமைச்சுகளின் விடயப் பரப்புக்களும் இந்த புதிய வர்த்தமானி மூலம் அறிவிக்கப்பட்டுள்ளன.