கொரோனா பரவலில் மேல் மற்றும் கம்பஹா முன்னணியில்!

கம்பஹா மாவட்டத்தில் இதுவரை 20,029 கொரோனா நோயாளிகள் அடையாளம் காணப்பட்டுள்ளனர்.

கம்பஹா பிராந்திய சுகாதார சேவைகள் பணிப்பாளரின் கூற்றுப்படி, இது நாட்டின் மொத்த கொவிட் தொற்றில் ஐந்தில் ஒரு பங்காகும்.

தற்போதைய கொரோனா நிலைமையைக் கட்டுப்படுத்த எதிர்காலத்தில் எடுக்க வேண்டிய நடவடிக்கைகள் குறித்து சுற்றுலாத்துறை அமைச்சர் பிரசன்ன ரனதுங்கவின் ஏற்பாட்டின் கீழ் கம்பஹா மாவட்ட செயலகத்தில் நடைபெற்ற கலந்துரையாடலில் அவர் இதனைத் தெரிவித்துள்ளார்.

இலங்கையில் இதுவரை பதிவான மொத்த கொரோனா வைரஸ் தொற்றாளர்களின் எண்ணிக்கை 101,658 என்று ஏப்ரல் 30 வெள்ளிக்கிழமை இரவு அரசாங்கம் அறிவித்தது.

நாட்டில் தற்போதைய கொவிட் அச்சுறுத்தலைச் சமாளிக்க கம்பஹாவில் உள்ள வெரெல்லவத்த பகுதியில் 2000 படுக்கைகள் கொண்ட கொவிட் சிகிச்சை மையம் அமைப்பதாக அரசாங்கம் அறிவித்துள்ளது.

தற்போது மூடப்பட்டிருக்கும் ஒரு ஆடை தொழிற்சாலை இந்த நோக்கத்திற்காக கையகப்படுத்தப்படும் என்று எதிர்பார்க்கப்படுவதாக அரசு தகவல் துறை தெரிவித்துள்ளது.

கட்டுநாயக்க மற்றும் மிரீகம பகுதிகளில் மூடப்பட்ட இரண்டு தொழிற்சாலைகளின் கட்டிடங்களை சிகிச்சை மையங்களுக்காக வாங்கவும் முடிவு செய்துள்ளதாக அரசாங்கம் மேலும் கூறுகிறது.

அதிகரித்து வரும் கொவிட் நிலைமையைச் சமாளிக்க மாவட்டத்தில் பல சிகிச்சை மையங்களை அமைக்க வேண்டியதன் அவசியத்தை கம்பஹா மாவட்ட சுகாதார சேவைகள் பணிப்பாளர் சுட்டிக்காட்டியதோடு, இந்த நோக்கத்திற்காக மூன்று தொழிற்சாலைகள் அடையாளம் காணப்பட்டுள்ளன, அவை வெரெல்லவத்த, மீரிகம மற்றும் கட்டுநாயக்க ஆகிய இடங்களில் உள்ள மூடப்பட்ட தொழிற்சாலைகளாகும்

முன்மொழியப்பட்ட வெரெல்லவத்த கொவிட் சிகிச்சை மையத்தை நிறுவுவதற்கு கடற்படை ஏற்கனவே தனது ஆதரவை வெளிப்படுத்தியுள்ளது என்பதும் தெரியவந்தது.

கூட்டத்தில் இராஜாங்க மாநில அமைச்சர் சுதர்ஷினி பெர்னாண்டோபுல்லே, கம்பஹா மாவட்ட ஒருங்கிணைப்புக் குழுத் தலைவர் சஹான் பிரதீப், கம்பஹா மாவட்டச் செயலாளர் சுனில் ஜெயலத், மாவட்ட சுகாதார அலுவலர்கள், உள்ளூராட்சி நிறுவனங்களின் தலைவர்கள், பிரதேச செயலாளர்கள் மற்றும் பாதுகாப்புப் படைத் தலைவர்கள் ஆகியோர் கலந்து கொண்டனர்.