இலங்கையின் வெளிநாட்டு நாணய இறைமைக் கடன் தரப்படுத்தல்கள் உயர்வு!

கடன்தவறல்) என்பதிலிருந்து 'CCC+/C' ஆக உயர்த்தப்பட்டுள்ளதாக S&P குளோபல் ரேட்டிங்ஸ் (S&P Global Ratings) அறிவித்துள்ளது.

இந்த உயர்வானது, இலங்கையின் கடனைத் தீர்க்கும் திறனின் எதிர்கால நோக்கை சிறந்த முறையில் பிரதிபலிப்பதாக அந்த நிறுவனம் சுட்டிக்காட்டுகிறது.

அதேவேளை, நீண்டகால மற்றும் குறுகியகால உள்நாட்டு நாணயத் தரப்படுத்தல்கள் 'CCC+/C'ஆக மாறியுள்ளதால், தரப்படுத்தல்களின் எதிர்காலக் கண்ணோட்டம் நிலையானதாக (stable) உள்ளதாக S&P குளோபல் ரேட்டிங்ஸ் குறிப்பிடுகிறது.

'CCC+' தரப்படுத்தல் என்பது, இலங்கையின் கடனைத் தீர்க்கும் திறன் பாதிப்புக்கு உள்ளாகியுள்ளதுடன், அது சாதகமான நிதி மற்றும் பொருளாதார நிலைமைகளிலேயே தங்கியுள்ளது என்பதைக் குறிக்கிறது. இருப்பினும், அரசாங்கம் காலத்தில் கொடுப்பனவு நெருக்கடியை எதிர்கொள்ளாது எனவும் நம்பப்படுவதாக அந்த நிறுவனம் வலியுறுத்தியுள்ளது.

இந்தத் தரப்படுத்தல் உயர்வுக்கு வழிவகுத்த பல முக்கிய காரணிகளை S&P குளோபல் ரேட்டிங்ஸ் நிறுவனம் சுட்டிக்காட்டியது.

கடன் மறுசீரமைப்பு முயற்சி: இந்த உயர்வானது, 2024 டிசம்பரில் அதன் பெரும்பாலான யூரோ முறிகளைப் பரிமாற்றம் செய்ததன் பின்னர், அரசாங்கத்தால் உத்தரவாதம் அளிக்கப்பட்ட ஸ்ரீலங்கன் ஏர்லைன்ஸ் (SLA) முறிகள் உட்பட மீதமுள்ள வர்த்தகக் கடனை மறுசீரமைப்பதற்கான சமீபத்திய முயற்சிகளைப் பிரதிபலிக்கிறது. SLA கடன் மறுசீரமைப்பு தொடர்பான பேச்சுவார்த்தைகள் இந்த ஆண்டு தொடக்கத்தில் ஆரம்பிக்கப்பட்டதுடன், ஏனைய வெளிநாட்டுக் கடன் வழங்குநர்களை சமமாக நடத்தும் கொள்கையின் அடிப்படையில் விமான நிறுவனம் மற்றும் அரசாங்கத்தால் ஒரு முன்மொழிவு சமர்ப்பிக்கப்பட்டுள்ளது.

பொருளாதார மீட்சி மற்றும் சீர்திருத்தம்: இலங்கையின் பொருளாதாரம் 2022 நெருக்கடிக்குப் பிறகு ஸ்திரமாக மீண்டு வருகிறது. சில பேரியப் பொருளாதாரக் குறியீடுகள் ஏற்கனவே நெருக்கடிக்கு முந்தைய மட்டங்களைத் தாண்டியுள்ளதாக அந்த நிறுவனம் குறிப்பிடுகிறது.

ஆதரவான காரணிகள்: வலுவான பொருளாதார மீட்சி, விரைவான நிதிக் கொள்கை ஒருங்கிணைப்பு, தொடர்ச்சியான IMF ஆதரவுடன் கூடிய சீர்திருத்தங்கள், வெளிநாட்டு செலாவணி கையிருப்பு அதிகரிப்பு, மேம்பட்ட வெளிநாட்டு நிலைமை மற்றும் அரச நிறுவனங்களால் (SOE) ஏற்படும் நிதி அபாயங்களைக் குறைப்பதில் தொடர்ச்சியான முன்னேற்றம் ஆகியவை இந்தத் தரப்படுத்தல்களுக்கு ஆதரவளிப்பதாக அந்த நிறுவனம் சுட்டிக்காட்டியது.

அரசியல் ஸ்திரத்தன்மை: 2024ஆம் ஆண்டின் இறுதியில் நடைபெற்ற ஜனாதிபதி மற்றும் நாடாளுமன்றத் தேர்தல்களில் தேசிய மக்கள் சக்தி (NPP) கட்சி பெற்ற வலுவான மக்கள் ஆணைக்குப் பிறகு, அரசியல் ஸ்திரத்தன்மை மற்றும் கொள்கை முன்கணிப்புத் தன்மை மேம்பட்டுள்ளதாக அந்த நிறுவனம் வெளியிட்ட அறிக்கையில் குறிப்பிடப்பட்டுள்ளது.

துறை வளர்ச்சி: சமூக ஸ்திரத்தன்மை மீண்டதன் பின்னர், தொடர்ச்சியாக மீண்டு வரும் உற்பத்தி மற்றும் சேவைத் துறைகளில் தொடர்ச்சியான வளர்ச்சி எதிர்பார்க்கப்படுகிறது.

இலங்கையின் பலங்களுக்கு எதிராக சில பாதகமான காரணிகளையும் அந்த நிறுவனம் சுட்டிக்காட்டுகிறது.

அதிக கடன் சுமை: பெரும்பாலான வெளிநாட்டுக் கடன்கள் மறுசீரமைக்கப்பட்ட பின்னரும், இலங்கையின் கடன் சுமை அதிகமாகவே உள்ளது. குறிப்பாக, அதிக வருமானம் தரும் உள்நாட்டு வர்த்தகக் கடன்களில் பெரும்பாலானவை கடன் மறுசீரமைப்புச் செயல்பாட்டில் இருந்து விலக்கப்பட்டதால், நாட்டின் கடன் சுமை அதிகமாக உள்ளது.

அதிக வட்டிச் சுமை: அரசாங்கத்தின் மொத்த வருமானத்தில் சுமார் 50% அளவிலான மிக அதிக வட்டிச் சுமையை நாடு கொண்டிருப்பதாக அந்த அறிக்கையில் குறிப்பிடப்பட்டுள்ளது.

நீண்ட கால கட்டமைப்பு ரீதியான பலவீனங்கள்: இந்தக் கட்டமைப்பு ரீதியான பலவீனங்களைக் குறைப்பதற்கு காலம் எடுக்கும் எனவும், குறிப்பாக 2029 ஆம் ஆண்டில் வெளிநாட்டுக் கடன் சேவை மீண்டும் அதிகரிக்கத் தொடங்கும் எனவும் அதில் மேலும் குறிப்பிடப்பட்டுள்ளது.

தரப்படுத்தல் குறைக்கப்படுவதற்கான அபாயங்கள் என, புதிய நிதி மற்றும் பணப்புழக்க அழுத்தங்கள் (funding and liquidity stresses) தொடர்பான அறிகுறிகள் தென்பட்டால் தரப்படுத்தல்கள் குறைக்கப்படலாம்.

இத்தகைய அறிகுறிகளுக்கு முன்னர் ஏற்படக்கூடிய நிகழ்வுகளில், பணவீக்கத்தில் ஏற்படும் துரித அதிகரிப்பு, அரசாங்கத்தின் வட்டிச் சுமையில் மேலும் ஏற்படும் உயர்வு அல்லது அரசின் நிதிச் செயல்திறனில் குறிப்பிடத்தக்க பலவீனம் ஆகியவை அடங்கும். இவை நிதி அழுத்தங்களுக்கு வழிவகுக்கக்கூடும்.