இலங்கையின் தமிழ் மக்கள் மற்றும் இந்து மதத் ஸ்தலங்கள் முகம்கொடுக்கும் சவால்கள் குறித்து இந்தியப் பிரதமரும் உயர்மட்டத் தலைமைகளும் அறிந்துகொள்ளச் செய்வதற்குத் தமது தரப்பிலிருந்து நடவடிக்கை எடுக்கப்படும் என இந்தியாவின் நிதியமைச்சர், வட-கிழக்கின் தமிழ்ப் பிரதிநிதிகளுக்கு உறுதியளித்துள்ளார்.
இந்திய நிதியமைச்சர் நிர்மலா சீதாராமன் இந்த உறுதிமொழியை வழங்கியது, சர்வதேச மாநாடொன்றில் உரையாற்றுவதற்காகப் புதுடெல்லிக்குச் சென்றிருந்த தமிழ் தேசிய மக்கள் முன்னணியின் (TNPF) தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம் மற்றும் இலங்கைத் தமிழரசுக் கட்சியின் (ITAK) மட்டக்களப்பு மாவட்ட நாடாளுமன்ற உறுப்பினர் டாக்டர் இமயதம்பி ஸ்ரீநாத் ஆகியோரைச் சந்தித்த போதேயாகும்.
"இனச்சுத்திகரிப்பின் பின்னணியில் இடைக்கால நீதியும் மனித உரிமைகளும்: காஷ்மீரப் பண்டிதர்களும் இலங்கைத் தமிழ் சமூகத்தின் விம்பங்களும்" எனும் தலைப்பில் நடைபெற்ற மாநாட்டில் உரையாற்றிய பின்னர், குறித்த இரு தமிழ் நாடாளுமன்ற உறுப்பினர்களும் இந்தியாவின் நிதியமைச்சரைச் சந்தித்துத் தமிழ் மக்களின் பிரச்சினைகளுக்குத் தீர்வு காணப்பட்ட திசையில் பிராந்திய வல்லரசின் நேரடியான தலையீடு அவசியமெனக் கோரிக்கை விடுத்திருந்தனர்.
புதிய தொல்பொருளியலுக்கு முகம் கொடுத்துக் கோயில்களை முடக்கும் குற்றச்சாட்டு
வட-கிழக்கில் தொல்பொருளியலின் பெயரால் இந்துக் கோயில்களின் செயற்பாடுகளை முடக்கிவிட்டு அங்கு பௌத்த விகாரைகள் நிர்மாணிக்கப்படுவது குறித்து நிதியமைச்சரிடம் தெளிவுபடுத்தியதாக அவர்கள் குறிப்பிட்டனர்.
"தொல்பொருளியலுக்கு முகம் கொடுத்து இலங்கையில் பல கோயில்களுக்கு ஏற்படுத்தப்பட்டுள்ள தாக்கங்கள், குறிப்பாகத் திருகோணமலை சிவன் கோயிலுக்குத் தொல்பொருள் திணைக்களம் வந்து அதன் அபிவிருத்தி அல்லது புனரமைப்புப் பணிகளை எவ்வாறு பாதிக்கிறது? அக்கோயிலைச் சுற்றி அமைந்துள்ள பெரும்பான்மைச் சமூகத்தினரின் கடைகள் மூலம் அக்கோயிலின் ஆன்மீகத் தன்மை எவ்வாறு சிதைக்கப்படுகிறது? இது போன்ற வட-கிழக்கில் உள்ள கோயில்களின் செயற்பாடுகளைத் தொல்பொருள் திணைக்களம் ஊடாகச் சட்டத்தைச் சூட்சுமமாகப் பயன்படுத்திப் பல வேலைகளைச் செய்து பௌத்த விகாரைகளை எவ்வாறு உருவாக்குகிறார்கள் என்பதை நாம் தெளிவாக எடுத்துரைத்தோம்" என நாடாளுமன்ற உறுப்பினர் இமயதம்பி ஸ்ரீநாத் தெரிவித்தார்.
புதிய அரசாங்கமும் 13ஆவது திருத்தச் சட்டத்தின் நிச்சயமற்ற தன்மையும்
அநுர குமார திசாநாயக்கவின் தலைமையிலான தேசிய மக்கள் சக்தி அரசாங்கம் பதவியேற்று இரண்டு ஆண்டுகள் கடந்துவிட்ட போதிலும், தமிழ் மக்களின் பிரச்சினைகளுக்கு அரசியல் தீர்வு காண்பதற்கான எந்தவொரு நடவடிக்கையும் எடுக்கப்படவில்லை என்பதையும் தமிழ் மக்கள் பிரதிநிதிகள் இந்திய நிதியமைச்சருடன் நடத்திய சந்திப்பில் சுட்டிக்காட்டியுள்ளனர்.
"அதுமட்டுமின்றி, புதிய அரசாங்கமொன்று பதவியேற்று இரண்டு ஆண்டுகள் கடந்த போதிலும் தமிழ் மக்களுக்கு அரசியல் தீர்வு வழங்குவதற்கான எத்தகைய முயற்சியோ அல்லது முன்னெடுப்போ எடுக்கப்படவில்லை என்பதையும், இந்தியாவால் அறிமுகப்படுத்தப்பட்டு, அதன் அழுத்தத்தின் மூலம் உருவாக்கப்பட்ட 13 ஆவது அரசியலமைப்புத் திருத்தச் சட்டத்திற்குரிய மாகாண சபைத் தேர்தல் நிச்சயமற்ற தன்மையாக மாறியுள்ளது என்பதையும் தெளிவாகக் கூறினோம்" என அவர் மேலும் தெரிவித்தார்.
தமிழ் மக்களின் பிரதிநிதிகள் முன்வைத்த கருத்துக்களை மிகவும் அவதானமாகக் செவிமடுத்த இந்திய நிதியமைச்சர் நிர்மலா சீதாராமன், வட-கிழக்கில் வாழும் தமிழ் மக்களின் தற்போதைய நிலைமையை இந்தியப் பிரதமர் நரேந்திர மோடி மற்றும் வெளிவிவகார அமைச்சர் கலாநிதி சுப்பிரமணியம் ஜெய்சங்கர் ஆகியோருக்கு விளக்குவதாகவும் உறுதியளித்துள்ளதாக டாக்டர் இமயதம்பி ஸ்ரீநாத் குறிப்பிட்டார்.
பொறுப்புக்கூறல், அரசியல் தீர்வு மற்றும் 'இந்தியக் கண்ணாடி'
பொறுப்புக்கூறலும் அரசியல் தீர்வும் 'ஒரே நாணயத்தின் இரு பக்கங்கள்' என டெல்லி சர்வதேச மாநாட்டின் முன்னிலையில் சுட்டிக்காட்டிய TNPF தலைவர், இது தொடர்பில் ஆளுங்கட்சியான பாரதிய ஜனதா கட்சி அரசாங்கத்தின் மேலதிக கவனத்தை ஈர்ப்பது சவாலானது என்பதை வலியுறுத்தினார்.
"இலங்கையில் மோதல் என்பது, நாட்டை ஆட்சி செய்யும் சிங்கள - பௌத்த மக்களுக்கும் பெரும்பான்மையாக இந்துக்களாக உள்ள தமிழ் மக்களுக்கும் இடையே நிலவுவதால் இது ஒரு சவாலாக மாறுகிறது" என கஜேந்திரகுமார் பொன்னம்பலம் தெரிவித்தார்.
"நான் நம்பும் வகையில், இவர்கள் இருவரும் ஒன்றுதான் என்ற தோற்றம் இந்தியாவில் - குறிப்பாக வடக்கில் - காணப்படுகிறது. நீங்கள் பார்க்கும் கோணத்தில் இருவரும் கலாச்சார மற்றும் பாரம்பரிய ரீதியில் ஒரே மக்கள் கூட்டத்தைச் சேர்ந்தவர்களாவர். இந்தியக் கண்ணோட்டத்தில் பார்க்கும்போது அது அவ்வாறே தோன்றினாலும், நிதர்சனமான யதார்த்தம் என்னவென்றால், பெரும்பான்மைச் சிங்கள - பௌத்த மக்கள், எண்ணிக்கையில் மிகக் குறைவான தமிழ் - இந்து மக்கள்தொகையிடமிருந்து ஆபத்து இருப்பதாக எண்ணி அவர்களைத் துரத்துவதாகும்."
இந்து மதம் தமிழ் மக்களின் அடையாளத்துடன் மிக நெருக்கமாகப் பிணைந்துள்ளதால் அத்தகைய மதத் ஸ்தலங்கள் தாக்குதல்களுக்கு இலக்காகியுள்ளன எனக் குறிப்பிட்ட TNPF தலைவர், 'இந்தியக் கண்ணாடியின் ஊடாக மட்டும் பிரச்சினையைப் பார்த்தால்' கவனம் திசைதறிந்து பார்வையிலிருந்து விலகிச் செல்லும் அபாயம் உள்ளதாகவும் எச்சரித்தார்.
குறித்த டெல்லி சர்வதேச மாநாடானது அவுஸ்திரேலியத் தமிழ்க் காங்கிரஸ், அமெரிக்கத் தமிழ் செயற்பாட்டுக் குழு, அகில இந்தியச் சட்ட ஆசிரியர்கள் காங்கிரஸ் மற்றும் சர்வதேசச் சட்டத்திற்கான இந்தியச் சங்கம் ஆகியவை இணைந்து ஏற்பாடு செய்திருந்தமை குறிப்பிடத்தக்கது.
