படுகொலைக்கு இழப்பீடு கோரி, வல்வெட்டித்துறை மக்கள் குழு, இழப்பீடுகளுக்கான அலுவலகத்திடம் ஒரு மேன்முறையீட்டைச் சமர்ப்பித்துள்ளது.
இந்தப் படுகொலை 1989ஆம் ஆண்டு ஆகஸ்ட் 2 முதல் 4 ஆம் திகதி வரை வல்வெட்டித்துறையில் இடம்பெற்றது. இதில் 66 பொதுமக்கள் கொல்லப்பட்டதுடன் 34 பேர் காயமடைந்தனர். மேலும், வீடுகள், கடைகள், மீன்பிடிப் படகுகள், வாகனங்கள் மற்றும் தொழிற்சாலைகள் அழிக்கப்பட்டன. இதன் விளைவாக நூற்றுக்கணக்கான குடும்பங்களின் வாழ்வாதாரங்கள் முற்றிலுமாகச் சிதைந்தன என அந்தக் குழு தெரிவித்துள்ளது.
சரிபார்க்கப்பட்ட சத்தியக்கடதாசிகள் மற்றும் மதிப்பீடுகளின்படி, ஏற்பட்ட சேதத்தின் மதிப்பு சுமார் 4.3 பில்லியன் இலங்கை ரூபாய் (14.6 மில்லியன் அமெரிக்க டொலர்) என அந்தக் குழு கூறியுள்ளது.
குற்றவாளிகள் வெளிநாட்டுப் படையினராக இருந்தபோதிலும், இந்தக் கொடூரங்கள் இலங்கையின் இறையாண்மைக்குட்பட்ட பகுதிக்குள் இடம்பெற்றுள்ளதாகவும், பாதிக்கப்பட்டவர்கள் இலங்கைப் பிரஜைகள் எனவும் அவர்கள் சுட்டிக்காட்டியுள்ளனர்.
அதன்படி, இந்தத் துயரசம்பவத்தில் பாதிக்கப்பட்ட தனது சொந்த மக்களுக்கு அங்கீகாரம் அளித்து, இழப்பீடு வழங்கி, நீதியை நிலைநாட்டுவதற்கான முழுப் பொறுப்பும் இலங்கை அரசாங்கத்திற்கே உள்ளது என அது வாதிடுகிறது.
வல்வெட்டித்துறை மக்கள் குழுவின் செயலாளர் என். ஆனந்தராஜ் 'சண்டே டைம்ஸ்' பத்திரிகையிடம் கூறுகையில், "இலங்கை மண்ணில் தமது படையினரால் செய்யப்பட்ட குற்றங்களுக்கு இழப்பீடு கோரி இந்திய அரசாங்கத்திடமும் இதேபோன்ற மனுவொன்றைச் சமர்ப்பித்ததாகவும், ஆனால் அதற்கு எந்தப் பதிலும் கிடைக்கவில்லை" என்றும் தெரிவித்தார்.
"அமைதியைக் காக்க வந்த இந்திய அமைதிப்படை, இலங்கையில் கொடூரமான குற்றங்களைச் செய்தது. படையினர் கட்டுப்பாட்டை இழந்து வெறிச்செயலில் ஈடுபட்டதால், கிராமம் முழுவதும் ஒரு போர்க்களமாக மாறியது. பல தசாப்தங்களாக நீதி மறுக்கப்பட்டு, எந்தவிதமான உத்தியோகபூர்வ அங்கீகாரமும் இல்லாத நிலையில், காலம் தாழ்த்தப்பட்ட இந்த விடயத்தைக் கவனித்து, தமது அன்புக்குரியவர்களையும் வளங்களையும் இழந்து இன்னும் மீள முடியாமல் தவிக்கும் குடும்பங்களின் உறவினர்களுக்குப் போதுமான இழப்பீட்டை வழங்குமாறு இலங்கையின் இழப்பீடுகளுக்கான அலுவலகத்தை நாங்கள் வலியுறுத்துகிறோம்" என அவர் கூறினார்.