ஒருமைப்பாட்டுக் குழு (National Joint Committee) கவலை வெளியிட்டுள்ளது.
தான் ஆட்சிக்கு வந்தால் அரசியலமைப்பின் சர்ச்சைக்குரிய 13 ஆவது திருத்தத்தை முழுமையாக அமுல்படுத்துவதாக சஜித் பிரேமதாச வெளியிட்ட கருத்து தொடர்பில் தேசிய ஒருமைப்பாட்டுக் குழு கவலையடைந்துள்ளது.
தேசிய ஒருமைப்பாட்டுக் குழுவின் இணைத் தலைவர்களான ஓய்வுபெற்ற லெப்டினன்ட் ஜெனரல் ஜகத் டயஸ் மற்றும் கலாநிதி அனுலா விஜேசுந்தர ஆகியோர் வெளியிட்டுள்ள அறிக்கையில், இந்தியப் பயணத்தின்போது எதிர்க்கட்சித் தலைவர் வெளியிட்ட கருத்து குறித்து தாங்கள் ‘அதிர்ச்சி, ஏமாற்றம் மற்றும் வெறுப்படைந்துள்ளதாக’ தெரிவித்துள்ளனர்.
பிரேமதாசவின் இந்தக் கருத்துக்களை தேசத்துரோகம் என்றும், நாட்டுக்கு அவமானம் என்றும், பிரதான எதிர்க்கட்சியைப் பிரதிநிதித்துவப்படுத்தும் ஒரு பாராளுமன்ற உறுப்பினருக்கு மிகவும் பொருத்தமற்றது என்றும் தாம் கருதுவதாக தேசிய ஒருமைப்பாட்டுக் குழு தெரிவித்துள்ளது.
"13வது திருத்தம் காலாவதியானது என தேசிய ஒருமைப்பாட்டுக் குழு கருதுகிறது," என்று அவர்களின் அறிக்கையில் குறிப்பிடப்பட்டுள்ளது.
இந்தத் திருத்தம் நிறைவேற்றப்பட காரணமான இந்தியா-இலங்கை ஒப்பந்தம் பலவந்தமாக கைச்சாத்திடப்பட்டுள்ளது என்பதே அந்தக் குழுவின் கருத்தாகும்.
எல்.ரீ.ரீ.ஈ அமைப்பைக் நிராயுதபாணியாக்குவதற்கான ஒப்பந்தத்தில் இந்தியா தனது பகுதியை மதிக்கத் தவறிவிட்டதாகவும், அதன் விளைவாக, மோதல் மூன்று தசாப்தங்களுக்கும் மேலாக நீடித்ததாகவும், அதன் காரணமாக பல்லாயிரக்கணக்கான பாதுகாப்புப் படை அதிகாரிகள் மற்றும் பொதுமக்கள் உயிரிழந்ததாகவும் அதில் குறிப்பிடப்பட்டுள்ளது.
எதிர்க்கட்சித் தலைவரின் நன்மைக்காக 13 ஆவது திருத்தம் தொடர்பான சில விடயங்களை தெளிவுபடுத்துவதாகவும் தேசிய ஒருமைப்பாட்டுக் குழு தெரிவித்துள்ளது.
அந்த விடயங்களில்:
- காணி, பொலிஸ் மற்றும் நிர்வாக அதிகாரங்கள் பகிரப்பட்டால், இந்தத் திருத்தம் தேசிய ஒற்றுமைக்கும் அரசின் ஒற்றை ஆட்சித் தன்மைக்கும் (அரசியலமைப்பின் 2வது சரத்து) அச்சுறுத்தலாகும்.
- அப்போதைய வடக்கு-கிழக்கு மாகாண முதலமைச்சர் 1990 இல் ஒருதலைப்பட்ச சுதந்திரப் பிரகடனம் செய்தார்.
- குறித்த விடயங்கள் பகிர்ந்தளிக்கப்பட்டு அல்லது பிராந்திய அதிகாரத்தின் கீழ் கொண்டுவரப்பட்டால், பௌத்த சாசனத்தைப் பாதுகாத்து வளர்க்கும் அரசின் கடமையை (9வது சரத்து) உறுதி செய்வது அரசுக்கு மிகவும் கடினமாக இருக்கும்.
- பல உயர்நீதிமன்றத் தீர்ப்புகள் இறையாண்மையை பிரிக்க முடியாது என்று அறிவித்துள்ளன, மேலும் அரசின் அடிப்படை அதிகாரங்களை அற்பமான அலகுகளுக்கு ஒப்படைப்பது பாராளுமன்றத்தின் அரசியலமைப்பு மேலாதிக்கத்திற்கும் தேசிய பாதுகாப்பிற்கும் நேரடியாக அச்சுறுத்தலாக அமையும்.
- 13 ஆவது திருத்தத்தின் அரசியலமைப்புத் தன்மை உயர்நீதிமன்றத்தில் கேள்விக்குட்படுத்தப்பட்டபோது, நீதிபதிகள் குழாமில் இருந்த ஒன்பது நீதிபதிகளில் ஐந்து பேர், நிறைவேற்று ஜனாதிபதிக்கு வரம்பற்ற அதிகாரம் இருப்பதால், அது அரசியலமைப்பின் ஒற்றை ஆட்சித் தன்மையைப் பாதிக்காது என்று குறிப்பிட்டனர்.
எவ்வாறாயினும், பின்னர் அரசியலமைப்பில் செய்யப்பட்ட திருத்தங்கள் நிறைவேற்று ஜனாதிபதியின் அதிகாரத்தை ஓரளவுக்குக் குறைத்தன. எனவே, 13வது திருத்தத்தை அமுல்படுத்த முடியாது.
எதிர்க்கட்சித் தலைவர் பிரேமதாச இந்தியாவில் வெளியிட்ட கருத்துக்கள் அவரது தனிப்பட்ட கருத்தா, அல்லது சஜித் ஐன பலத்தின் கருத்தா, அல்லது அவரது கூட்டு கட்சி உறுப்பினர்களின் கருத்தா என்பதை தெளிவுபடுத்துமாறு தேசிய ஒருமைப்பாட்டுக் குழு தெரிவித்துள்ளது.
அனைத்து அரசியல் தலைவர்களுக்கும் தேசிய ஒருமைப்பாட்டுக் குழு வேண்டுகோள் விடுத்துள்ளதாவது:
உள்நாட்டிலோ அல்லது வெளிநாட்டிலோ நாட்டைப் பிரதிநிதித்துவப்படுத்தும் போது, தாய்நாட்டின் இறையாண்மைக்கு அச்சுறுத்தலாக அமையும் எந்தவொரு வெளிப்புற அழுத்தத்திற்கும் அடிபணியாமல், தேசத்தின் நன்மைக்காக பொறுப்புடனும், தேசப்பற்றுடனும், நாட்டுக்கும் அதன் மக்களுக்கும் உள்ள அன்புடன் செயற்பட வேண்டும்.