சட்ட நிறுவனம் மூலம் கடிதம் அனுப்பியுள்ளார் என்றும், சிலர் உத்தியோகபூர்வ இல்லங்களிலிருந்து வெளியேறிய போதிலும், இன்னும் பொருட்களை ஒப்படைக்கவில்லை என்றும் அமைச்சரவை ஊடகப் பேச்சாளரும், சுகாதாரம் மற்றும் வெகுஜன ஊடக அமைச்சருமான வைத்தியர் நலிந்த ஜயதிஸ்ஸ தெரிவித்தார்.
அரசாங்க தகவல் திணைக்களத்தில் நேற்று (16) நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில் ஊடகவியலாளர்கள் எழுப்பிய கேள்விகளுக்கு பதிலளிக்கும் போதே அமைச்சர் இவ்வாறு கூறினார்.
ஊடகவியலாளர்; முன்னாள் ஜனாதிபதிகளின் உத்தியோகபூர்வ இல்லங்களுக்கு என்ன நடக்கிறது? முன்னாள் ஜனாதிபதி மஹிந்த ராஜபக்ஷ தங்காலையில் உள்ள தனது கார்ல்டன் இல்லத்திற்கு குடியேறினார். அவர் தங்கியிருந்த விஜேராம உத்தியோகபூர்வ இல்லத்தின் மதிப்பிடப்பட்ட வாடகை 46 இலட்சம் ரூபாய் என்று நீங்கள் கடந்த பெப்ரவரி மாதம் கூறினீர்கள். அந்தப் பணத்தை அரசாங்கத்தால் ஈட்ட முடியுமா?
அமைச்சர்; இந்த உத்தியோகபூர்வ இல்லங்களில் இருந்த சிலர் 1994இல் அமைச்சராகி அன்று முதல் அரசாங்க இல்லத்தில் தங்கியிருக்கிறார்கள். அதன்பிறகு பிரதமராக அரசாங்க இல்லத்தில் இருந்திருக்கிறார்கள். மீண்டும் சிறிது காலம் எதிர்க்கட்சித் தலைவராக அரசாங்க இல்லத்தில் இருந்திருக்கிறார்கள். ஜனாதிபதியாக அரசாங்க இல்லத்தில் இருந்திருக்கிறார்கள்.
10 ஆண்டுகள் ஜனாதிபதியாக இருந்து, முன்னாள் ஜனாதிபதியாக அரசாங்க இல்லத்தில் இருக்கிறார்கள். ஆக, 31 ஆண்டுகளாக அரசாங்க உத்தியோகபூர்வ இல்லங்களில் இவ்வாறு தங்கியிருக்கிறார்கள். இந்த வீடுகளில் இருந்து வெளியேற முடியாது என்று சொல்பவர்கள் இவர்கள்தான். இவர்கள் அனைவருக்கும் அரசாங்க வீடுகள் இருப்பதாக நான் நினைக்கிறேன்.
இவர்களின் பிள்ளைகள், பிள்ளைகளின் பிள்ளைகள் கூட இந்த வீடுகளில்தான் பிறந்திருக்கிறார்கள். இது ஒரு பழக்கமாகிவிட்டது. இந்த அரசியல் கலாச்சாரத்தை மாற்றுவதற்காகவே மக்கள் எங்களுக்கு ஆணை வழங்கியுள்ளனர். பொதுவான சட்டத்தின்படி, தற்போதைய ஜனாதிபதிக்கும் அந்த விடயங்கள் இல்லாமல் போகும்.
ஊடகவியலாளர்; இந்த வீடுகள் மூலம் எப்படி பணம் சம்பாதிப்பது? ஏதேனும் திட்டம் உள்ளதா?
அமைச்சர்; இந்த உத்தியோகபூர்வ இல்லங்களை பொருளாதார ரீதியாக பயனுள்ள நடவடிக்கைகளுக்கு எவ்வாறு பயன்படுத்துவது என்பது குறித்து அரசாங்கம் கவனம் செலுத்தி வருகிறது. ஏற்கனவே பெரிய தொகையை செலுத்தும் அரச நிறுவனங்கள் இந்த சொத்துக்களைப் பயன்படுத்துவதற்குத் தருமாறு கோரியுள்ளன. நாங்கள் அதுபற்றி இன்னும் முடிவு எடுக்கவில்லை. திறைசேரிக்கு நன்மை பயக்கும் ஒரு முடிவை எடுக்கத் தயாராக இருக்கிறோம்.