மையங்களில் தங்கியுள்ளதாக அனர்த்த முகாமைத்துவ நிலையம் தெரிவித்துள்ளது.
அந்த நிலையம் வெளியிட்டுள்ள அறிக்கையில், நாடு முழுவதும் உள்ள 762 பாதுகாப்பு மையங்களில் 22,522 குடும்பங்களைச் சேர்ந்த 70,055 பேர் தற்போது தங்கியுள்ளதாக குறிப்பிடப்பட்டுள்ளது.
இந்த பாதுகாப்பு மையங்களில் அதிகமானவை தற்போது கண்டி மாவட்டத்தில் அமைந்துள்ளன. அங்குள்ள 222 பாதுகாப்பு மையங்களில் 5,427 குடும்பங்களைச் சேர்ந்த 17,437 பேர் தங்கியுள்ளனர்.
அதிக எண்ணிக்கையிலான பாதுகாப்பு மையங்கள் அடுத்தபடியாக நுவரெலியா மற்றும் பதுளை மாவட்டங்களில் அமைந்துள்ளன. நுவரெலியாவில் உள்ள 206 பாதுகாப்பு மையங்களில் 6,487 குடும்பங்களைச் சேர்ந்த 19,750 பேரும், பதுளை மாவட்டத்தில் உள்ள 155 பாதுகாப்பு மையங்களில் 6,026 குடும்பங்களைச் சேர்ந்த 19,409 பேரும் தற்போது தங்கியுள்ளனர்.
இதேவேளை, இந்த பாதுகாப்பு மையங்களில் உள்ள குடும்பங்களை விரைவாக மீளக்குடியேற்ற நடவடிக்கை எடுக்கப்படும் என அத்தியாவசிய சேவைகள் ஆணையாளர் நாயகம் பிரபாத் சந்திரகீர்த்தி தெரிவித்துள்ளார்.
இரண்டு முதல் மூன்று மாதங்களுக்குள் இந்தக் குடும்பங்களை மீளக்குடியேற்ற விரைவான நடவடிக்கைகள் எடுக்கப்படும் என்று அவர் கூறினார்.
இந்த பாதுகாப்பு மையங்களில் தங்கியுள்ள சிலரது வீடுகள் முழுமையாகவும், மற்றவர்களின் வீடுகள் பகுதியளவிலும் சேதமடைந்துள்ளதாகவும், வேறு சிலர் தாம் வசித்த இடத்தில் நிலவும் ஆபத்தான நிலைமைகள் காரணமாக மீண்டும் அங்கு குடியேற விரும்புவதில்லை என்றும் அவர் சுட்டிக்காட்டினார்.
அதன்படி, அரசாங்கத்தால் அறிமுகப்படுத்தப்பட்ட 3 மாத வாடகை கொடுப்பனவை வழங்குவதற்கான நடவடிக்கைகள் தற்போது மேற்கொள்ளப்பட்டு வருவதாகவும் அவர் குறிப்பிட்டார்.
வீடுகள் முழுமையாக சேதமடைந்தவர்களுக்கு வீடுகளை வழங்குவதே இப்போதைய சவாலாக உள்ளது என்றும், அரசாங்கத்தால் முன்மொழியப்பட்ட 50 லட்சம் ரூபாய் தொகையை வழங்குவதற்கான மேலதிக நடவடிக்கைகள் மேற்கொள்ளப்பட்டு வருவதாகவும், அவர்களுக்கான அரச காணிகளை வழங்குவது தொடர்பில் தற்போது ஆராயப்பட்டு வருவதாகவும் அவர் தெரிவித்தார்.
அதற்காக அரசாங்கத்திற்குச் சொந்தமான காணிகள் தொடர்பான தகவல்கள் தற்போது திரட்டப்பட்டு வருவதாகவும் அத்தியாவசிய சேவைகள் ஆணையாளர் நாயகம் பிரபாத் சந்திரகீர்த்தி மேலும் தெரிவித்தார்.