யுவதி மீது அதிக கவனம் செலுத்தப்பட்டுள்ளது.
பேலியகொட குற்றப் பிரிவின் பணிப்பாளரும் உதவிப் பொலிஸ் அத்தியட்சகருமான ரொஹான் ஓலுக்கல மற்றும் குற்றப் புலனாய்வுத் திணைக்களத்தின் பொலிஸ் பரிசோதகர் கிஹான் டீ சில்வா ஆகியோரால் நேபாளத்தில் மூன்று நாட்களாக மேற்கொள்ளப்பட்ட சுற்றிவளைப்பின் போதே இந்த பாதாள உலகக் கும்பலைப் பிடிக்க முடிந்தது.
நேபாள பொலிஸார் மற்றும் சர்வதேச பொலிஸாரின் உதவியுடன் அதிகாரிகளுடன் சென்ற ரொஹான் ஓலுக்கல, நேற்று முன்தினம் இரவு இந்த சந்தேகநபர்களை கைது செய்திருந்தார்.
பொலிஸ் மா அதிபர் பிரியந்த வீரசூரிய, குற்றப் புலனாய்வுத் திணைக்களத்தின் சிரேஷ்ட பிரதிப் பொலிஸ் மா அதிபர் அசங்க கரவிட்ட ஆகியோரின் முழுமையான மேற்பார்வையின் கீழ், பேலியகொட குற்றப் பிரிவின் பணிப்பாளரும் உதவிப் பொலிஸ் அத்தியட்சகருமான ரொஹான் ஓலுக்கல மற்றும் பொலிஸ் பரிசோதகர் கிஹான் த சில்வா ஆகியோர் கடந்த சனிக்கிழமை (11ஆம் திகதி) முதல் இந்த நடவடிக்கையை மேற்கொண்டனர்.
கெஹெல்பத்தர பத்மேயிடம் மேற்கொள்ளப்பட்ட விசாரணைகளின் போது, இஷாரா செவ்வந்தி மறைந்திருக்கும் இடத்தை பொலிஸாரால் அடையாளம் காண முடிந்தது. இதனையடுத்து, ரொஹான் ஓலுக்கலவின் தலைமையில் இந்த நடவடிக்கை ஆரம்பிக்கப்பட்டது.
இதில், இஷாரா செவ்வந்தியுடன் கைது செய்யப்பட்டுள்ள, இஷாராவின் உருவத்தைப் போன்ற தோற்றமுடைய மற்றைய யுவதி மீதே அதிக கவனம் செலுத்தப்பட்டுள்ளது.
இஷாராவின் தற்போதைய தோற்றம், ஊடகங்களில் வெளியிடப்பட்ட அவரது புகைப்படங்களிலிருந்து வேறுபட்டுள்ள அதேவேளை, கைது செய்யப்பட்டுள்ள மற்றைய யுவதி, இஷாராவின் தற்போதைய தோற்றத்தை விடவும் அவரைப் போலவே இருக்கிறார். (தகவல் - திவயின)