'மாணிக்க கங்கைக்கு அருகிலுள்ள கட்டிடம் எனக்குச் சொந்தமில்லை!'

தவறாக செய்தி வெளியிட்டுள்ளதாக முன்னாள் ஜனாதிபதி கோட்டாபய ராஜபக்ஷ தெரிவித்துள்ளார்.

தனது அதிகாரப்பூர்வ பேஸ்புக் பக்கத்தில் பதிவொன்றை இட்டு அவர் இதனைக் குறிப்பிட்டுள்ளார்.

"கதிர்காமம் மாணிக்க கங்கைக்கு அருகில் மற்றுமொருவரால் கட்டப்பட்டுள்ள கட்டிடம் எனக்குச் சொந்தமானது எனத் தவறாகக் குறிப்பிடும் செய்தியொன்று, அவ்வப்போது ஊடகங்களில் வெளியாவதை நான் அவதானித்துள்ளேன்.

2025 அக்டோபர் 13, திங்கட்கிழமை (நேற்று), சில தொலைக்காட்சி அலைவரிசைகளில் ஒளிபரப்பப்பட்ட செய்தியொன்றில், அந்தக் கட்டிடம் பற்றிக் குறிப்பிடும்போது எனது பெயரும் மீண்டும் குறிப்பிடப்பட்டுள்ளது.

குறித்த கட்டிடத்தின் உரிமை தொடர்பில் கடந்த காலங்களில் சி.ஐ.டி (CID) விசாரணை ஒன்று நடத்தப்பட்டது. அந்த விசாரணை தொடர்பாக நானும் ஒரு வாக்குமூலம் அளித்திருந்தேன்.

அது குறித்து என்னிடம் விசாரணை செய்வதற்கு காரணம், அந்தக் கட்டிடத்திற்கு மின்சார இணைப்பு பெறுவதற்காக "ஜி. ராஜபக்ஷ" என்ற பெயரில் சமர்ப்பிக்கப்பட்டிருந்த ஒரு விண்ணப்பம் மட்டுமேயாகும். அந்த விண்ணப்பத்தில் சரியான கையொப்பம் கூட இடப்பட்டிருக்கவில்லை. கையொப்பம் இடவேண்டிய இடத்தில் ஒரு தெளிவற்ற கிறுக்கல் மாத்திரமே இருந்தது.

இந்தத் தவறான செய்தி மீண்டும் மீண்டும் வெளிவருவதாலும், அனைவரினதும் கவனத்திற்காகவும், கதிர்காமம் மாணிக்க கங்கைக்கு அருகிலுள்ள அந்தக் கட்டிடம் எனக்குச் சொந்தமான சொத்து அல்ல என்பதை நான் உறுதியாகக் கூறுகின்றேன்.

கதிர்காமம் பிரதேசத்தில் எந்தவொரு கட்டிடத்தையும் நிர்மாணிக்கவோ அல்லது பராமரித்துச் செல்லவோ எனக்கு ஒருபோதும் எந்தவொரு காரணமோ அல்லது தேவையோ இருந்ததில்லை என்பதையும் கூற வேண்டும்" என்று அவர் தனது பதிவில் குறிப்பிட்டுள்ளார்.