சப்புகஸ்கந்த வாகன விபத்து: அசோக ரன்வல போதையில் இருந்தாரா?

அபாயகரமாக வாகனம் ஓட்டியது மற்றும் விபத்தைத் தவிர்க்கத் தவறியது ஆகிய குற்றச்சாட்டுகளின் பேரில் சப்புகஸ்கந்த பொலிஸாரால் அவர் கைது செய்யப்பட்டுள்ளார்.

பாராளுமன்ற உறுப்பினர் அசோக ரன்வள, தற்போது கொழும்பு தேசிய மருத்துவமனையில் பொலிஸ் பாதுகாப்பின் கீழ் உள்நோயாளியாக சிகிச்சை பெற்று வருவதாக பொலிஸார் தெரிவித்தனர்.

நேற்று முன்தினம் (டிசம்பர் 11) அவர் பயணித்த ஜீப் வண்டி மற்றுமொரு கார் மீது மோதிய விபத்து தொடர்பில் இந்தக் கைது நடவடிக்கை மேற்கொள்ளப்பட்டுள்ளது. சப்புகஸ்கந்த, தெனிமல்ல பிரதேசத்தில் இந்த விபத்து இடம்பெற்றதாக பொலிஸார் தெரிவித்தனர்.

இந்த விபத்தில் காரில் பயணித்த 25 வயதுடைய பெண், அவரது சுமார் 6 மாத குழந்தை மற்றும் 55 வயதுடைய பாட்டி ஆகியோர் காயமடைந்து மருத்துவமனையில் அனுமதிக்கப்பட்டனர். விபத்தில் காயமடைந்த குழந்தையை மேலதிக சிகிச்சைக்காக லேடி ரிட்ஜ்வே சிறுவர் மருத்துவமனையில் அனுமதித்துள்ளதாகவும் பொலிஸார் மேலும் தெரிவித்தனர்.

கைது செய்யப்பட்ட பாராளுமன்ற உறுப்பினருக்கு எதிரான அடுத்த சட்ட நடவடிக்கை, அவர் மருத்துவமனையில் சிகிச்சை பெற்று முடித்த பின்னர் மேற்கொள்ளப்பட உள்ளது.

குடிபோதையில் இருக்கவில்லை என அரசாங்க ஊடகம் தெரிவிப்பு

இந்த விபத்து நடந்தபோது அசோக ரன்வள குடிபோதையில் இருந்ததாக சமூக ஊடகங்களில் பல்வேறு செய்திகள் பரவினாலும், இது தொடர்பாக மேற்கொள்ளப்பட்ட விசாரணைகளில் பாராளுமன்ற உறுப்பினர் குடிபோதையில் இருக்கவில்லை என்பது தெரியவந்துள்ளதாக அரசாங்க ஊடகங்கள் செய்தி வெளியிட்டுள்ளன.