பாதுகாப்பை உறுதிப்படுத்த தேவையான அனைத்து நடவடிக்கைகளையும் எடுப்பதாக ஜனாதிபதி அநுர குமார திஸாநாயக்க உறுதியளித்துள்ளார்.
பாகிஸ்தானின் இஸ்லாமாபாத் நகரில் குண்டுத் தாக்குதல் நடத்தப்பட்டதையடுத்து, அங்கு நடைபெறும் கிரிக்கெட் போட்டித் தொடரின் பாதுகாப்பு தொடர்பில் கடுமையான கவனம் செலுத்தப்பட்டுள்ளது.
இலங்கை, பாகிஸ்தான் மற்றும் ஜிம்பாப்வே அணிகள் பங்கேற்கும் 20க்கு 20 மூன்று நாடுகளுக்கு இடையேயான கிரிக்கெட் போட்டித் தொடருக்காக இலங்கை கிரிக்கெட் அணி பாகிஸ்தானின் ராவல்பிண்டிக்குச் சென்றுள்ளது.
தற்போது அங்கே ஒரு போட்டி மட்டுமே நடைபெற்றுள்ள நிலையில், மேலும் பல போட்டிகள் விரைவில் நடைபெற உள்ளன.
கிரிக்கெட் கட்டுப்பாட்டு சபையின் தலைவர் மற்றும் இலங்கை தேசிய கிரிக்கெட் அணியின் பிரதான பயிற்றுவிப்பாளர் சனத் ஜெயசூரியவுடன் தனிப்பட்ட முறையில் தொலைபேசியில் பேசிய ஜனாதிபதி, போட்டித் தொடரில் பங்கேற்றுள்ள இலங்கை கிரிக்கெட் அணியின் பாதுகாப்பை உறுதிப்படுத்த தேவையான அனைத்து நடவடிக்கைகளையும் எடுப்பதாக உறுதியளித்துள்ளார்.
பாதுகாப்புச் செயலாளர் சம்பத் துய்யிகோன்தா, பாகிஸ்தானின் பாதுகாப்புத் தலைவர்களுடன் இது தொடர்பாக பேச்சுவார்த்தை நடத்தியுள்ளதுடன், தற்போது இலங்கை கிரிக்கெட் அணிக்கு விசேட பாதுகாப்பு வழங்கப்பட்டுள்ளது. அவர்கள் தங்கியுள்ள ஹோட்டல்களிலும் பாதுகாப்புப் படையினர் ஈடுபடுத்தப்பட்டு அது உறுதிப்படுத்தப்பட்டுள்ளது.
1996 உலகக் கிண்ண கிரிக்கெட் போட்டித் தொடரின் போது இலங்கையில் ஏற்பட்ட குண்டுவெடிப்பு அச்சுறுத்தலால் சில நாடுகளின் கிரிக்கெட் அணிகள் இலங்கைக்கு வருவதற்கு மறுப்புத் தெரிவித்த போது, பாகிஸ்தான் கிரிக்கெட் அணி இலங்கைக்கு வந்து வழங்கிய ஆதரவை நினைவு கூர்ந்த ஜனாதிபதி, அதற்கு நன்றி தெரிவிக்கும் விதமாக, இந்த போட்டித் தொடர் நிறைவடையும் வரை அந்நாட்டில் தங்கியிருக்க கிரிக்கெட் அணிக்கு அறிவுறுத்தியுள்ளார்.
அத்துடன், போட்டி நடைபெறும் காலப்பகுதியில் அவர்களின் பாதுகாப்பை உறுதிப்படுத்த, அந்நாட்டு அரசாங்கத்துடன் இணைந்து தேவையான அனைத்து நடவடிக்கைகளையும் எடுப்பதாகவும் ஜனாதிபதி உறுதியளித்துள்ளார்.
இலங்கை மற்றும் பாகிஸ்தான் அணிகளுக்கு இடையிலான ஒருநாள் சர்வதேச கிரிக்கெட் தொடரின் எஞ்சிய போட்டிகள் பிற்போடப்பட்டுள்ளன.
இதன்படி குறித்த இரண்டு அணிகளுக்கும் இடையே இன்று (13) இடம்பெறவிருந்த இரண்டாவது ஒருநாள் சர்வதேச போட்டி நாளையும், எதிர்வரும் 15ஆம் திகதி இடம்பெறவிருந்த 3ஆவதும் இறுதியுமான ஒருநாள் போட்டி எதிர்வரும் 16ஆம் திகதியும் நடைபெறும் என பாகிஸ்தான் கிரிக்கெட் சபைத் தலைவர் மொஹ்சின் நக்வி தெரிவித்துள்ளார்.
பாகிஸ்தானில் நேற்று முன்தினம் இடம்பெற்ற பயங்கரவாத தற்கொலை குண்டுத் தாக்குதலை அடுத்து அங்கு சுற்றுப் பயணம் மேற்கொண்டுள்ள இலங்கை குழாமின் பெரும்பாலான வீரர்கள் மற்றும் பணிக்குழாமினர் நாடு திரும்புவதற்கு எதிர்பார்த்திருந்தனர்.
இதனால் இன்று நடைபெறவிருந்த போட்டியை திட்டமிட்டவாறு நடத்துவதில் சிக்கல் ஏற்பட்டிருந்தது. இதனை அடுத்து ஶ்ரீ லங்கா கிரிக்கெட் நிர்வாகமும் பாகிஸ்தான் கிரிக்கெட் சபையும் நீண்ட கலந்துரையாடலை நடத்தியிருந்தது.
அதன்பின்னர் இலங்கை அணி வீரர்கள் மற்றும் பணிக்குழாமின் பாதுகாப்பை உறுதி செய்வதற்கு பாகிஸ்தான் கிரிக்கெட் சபை நடவடிக்கை எடுத்துள்ளதாக தெரிவிக்கப்பட்டுள்ளது. இதனை அடுத்து இந்த தொடரை முழுமையாக நிறைவு செய்யுமாறு இலங்கை வீரர்கள் மற்றும் பணிக்குழாமுக்கு ஶ்ரீ லங்கா கிரிக்கெட் பணிப்புரை விடுத்திருந்தது.
அதேநேரம் ஶ்ரீ லங்கா கிரிக்கெட்டின் இந்த பணிப்புரையை மீறும் வீரர்கள் மற்றும் பணிக்குழாமினருக்கு எதிராக ஒழுக்காற்று நடவடிக்கை எடுக்கப்படும் எனவும் எச்சரிக்கை விடுக்கப்பட்டிருந்தது. இதனடிப்படையிலேயே குறித்தப் போட்டிகள் ஒருநாள் பிற்போடப்பட்டு நடத்துவதற்கு தீர்மானிக்கப்பட்டுள்ளது.