அடிப்படையில், மத்திய மற்றும் பெரிய அளவிலான 1,241 மண்சரிவுகள் நிகழ்ந்திருப்பது அடையாளம் காணப்பட்டுள்ளதாக அமைச்சரவை பேச்சாளரும் அமைச்சருமான நளிந்த ஜயதிஸ்ஸ நேற்று அறிவித்தார்.
அமைச்சரவைத் தீர்மானங்களைத் தெரிவிக்கும் கூட்டத்தில் கலந்துகொண்டு அவர் இதனைக் குறிப்பிட்டார்.
அனர்த்த நிலைமைகள் காரணமாகப் பாதிக்கப்பட்ட நுண்ணிய, சிறிய மற்றும் நடுத்தர அளவிலான தொழில் முயற்சியாளர்களை (MSME) மீண்டும் கட்டியெழுப்ப சலுகைக் கடன் திட்டத்தை நடைமுறைப்படுத்துவதற்கு அமைச்சரவை ஒப்புதல் அளித்துள்ளதாகவும் அவர் மேலும் தெரிவித்தார்.
'டிட்வா' சூறாவளியுடன் ஏற்பட்ட அனர்த்த நிலைமை குறைந்து ஏறக்குறைய ஒரு வாரம் ஆகியும், இன்னும் சில பகுதிகளில் மண்சரிவுகள் செயலில் இருக்கும் சம்பவங்கள் பதிவாகின்றன.
சுற்றுலாப் பயணிகளை அதிகம் ஈர்க்கும் தெமோதர வியூ பாயிண்ட் (Demodara View Point) அமைந்திருக்கும் மலை மண்சரிவு அபாயத்துக்கு உள்ளாகியுள்ளதுடன், மலையேற்றத்திற்குப் பிரபலமான ஹாலிஎல - நாரங்கல போன்ற பகுதிகளிலும் நிலச்சரிவு ஏற்பட்டுள்ளது.
தெமோதர வியூ பாயிண்ட் மலையைத் தவிர, பதுளை மாவட்டத்தில் மட்டும் 4 புதிய மண்சரிவு இடங்கள் அடையாளம் காணப்பட்டுள்ளதாக தேசிய கட்டிட ஆராய்ச்சி நிறுவனம் தெரிவித்துள்ளது.
அதேபோல், கித்துல்கல - தெபுவத்த கிராமத்தில் ஏற்பட்டிருந்த ஒரு மண்சரிவும் மீண்டும் செயல்படத் தொடங்கியுள்ளது.
அந்த மலையில் இருந்து இன்னும் மண் சரிந்து விழுவதைக் காண முடிவதாக பிராந்திய செய்தியாளர்கள் தெரிவிக்கின்றனர்.
நாரங்கல பிரதேசத்தில் ஏற்பட்ட நிலச்சரிவால் தோட்டத் தொழிலாளர் குடியிருப்புகள் சேதமடைந்துள்ளன. அங்கு வசித்த மக்கள் தற்போது பாதுகாப்பு மையங்களில் தங்க வைக்கப்பட்டுள்ளனர்.
அந்த இடத்தில் இன்னும் மண்சரிவு முடிவடையாததால், தங்களுக்கு உரிய நிரந்தர இடம் வழங்கப்பட வேண்டும் என்று பிரதேசவாசிகள் கோரிக்கை விடுத்துள்ளனர்.
ஹாலிஎல - போகஹமலித்த பிரதேசத்தின் பல கிராமங்களில் மண்சரிவு அபாயம் ஏற்பட்டுள்ளதுடன், சில இடங்களில் நிலம் தாழ்ந்து சென்று நீர் ஊற்றுகள் வெளிவந்துள்ளன.
மேலும், ஹாலிஎல - அளுவ்கொல்ல மலையின் உச்சியில் கல் குவாரி ஒன்று நடத்தப்படுவதால் மலை விரிசல் அடைந்துள்ளது. இந்த மலையைப் பார்வையிட அமைச்சர் சமந்த வித்தியாரத்னவும் சென்றிருந்தார்.
இதற்கிடையில், மண்சரிவால் பாதிக்கப்பட்ட யட்டியந்தோட்ட பிரதேச செயலாளர் பிரிவுக்குட்பட்ட சீ போத், பெரன்னாவ, பெலம்பிட்டிய, மில்லகல ஆகிய பிரதேசங்களில் உள்ள சில வீடுகளிலும் விரிசல்கள் ஏற்பட்டுள்ளதாக பிரதேசவாசிகள் தெரிவிக்கின்றனர்.
கண்டி, மாத்தளை, குருணாகலை மற்றும் கேகாலை மாவட்டங்களின் பல பிரதேச செயலாளர் பிரிவுகளுக்கு விடுக்கப்பட்ட மண்சரிவுக்கான சிவப்பு எச்சரிக்கை இன்று (டிசம்பர் 12) மாலை 4 மணி வரை நீட்டிக்கப்பட்டுள்ளது.
வடகிழக்கு பருவமழை நிலை தற்போது தீவு முழுவதும் நிறுவப்பட்ட நிலையில், தீவின் பல பகுதிகளிலும் தற்போது மழை பெய்து வருகிறது.
நேற்று பிற்பகலிலும் பொலன்னறுவை, மிஹிந்தலை, பதுளை உள்ளிட்ட பல பகுதிகளில் மழை கூடிய காலநிலை நிலவியது.