இந்தத் தேனீ ஒரு பிசாசை ஒத்த கொம்புகளைக் கொண்டிருப்பதால், அது 'லூசிஃபர்' தேனீ என அடையாளம் காணப்பட்டுள்ளது.
மேற்கு அவுஸ்திரேலியாவின் கோல்ட்ஃபீல்ட்ஸ் (Goldfields) பகுதியில், பேர்த் (Perth) நகரில் இருந்து கிழக்கே 470 கி.மீ தொலைவில் உள்ள பிரெமர் ரேஞ்ச் (Bremer Range) மலைத்தொடரில் மட்டுமே வளரும் ஒரு அரிய காட்டுப் பூவை ஆராய்ச்சியாளர்கள் அவதானித்துக் கொண்டிருந்தபோது, $Megachile (Hackeriapis) lucifer$ என்று பெயரிடப்பட்ட இந்தத் தேனீ இனத்தைக் கண்டறிந்துள்ளனர்.
இந்த தனித்துவமான கொம்பு போன்ற பகுதிகள் பெண் தேனீக்களுக்கு மட்டுமே உள்ளன. இவை ஒரு பாதுகாப்பு அமைப்பாகவும், மகரந்தம் அல்லது தேன் சேகரிக்கவும் பயன்படுத்தப்படுகின்றன.
இந்த ஆய்வுக் குழுவின் தலைமை விஞ்ஞானியான கிட் பிரெண்டர்காஸ்ட் (Kit Prendergast) இந்த கண்டுபிடிப்பைச் செய்தபோது 'நெட்ஃபிக்ஸ்' (Netflix) தளத்தில் அதே பெயரிலான நிகழ்ச்சியைப் பார்த்துக் கொண்டிருந்ததால், 'லூசிஃபர்' என்ற பெயரைப் பயன்படுத்தத் தூண்டப்பட்டதாகத் தெரிவிக்கிறார்.
இந்தத் தேனீ வகையிலிருந்து 20 ஆண்டுகளுக்குப் பிறகு கண்டுபிடிக்கப்பட்ட முதல் புதிய உறுப்பினர் இதுதான் என்றும் அவர் மேலும் கூறுகிறார்.
லத்தீன் மொழியில் 'லூசிஃபர்' என்பதன் பொருள் 'ஒளியைக் கொண்டுவருபவர்' (Light Bringer) என்பதாகும்.