பாதிக்கப்பட்ட மக்களுக்கு நிவாரணம் வழங்கும் போது, சமுதாய மேம்பாட்டுக் குழுக்களின் அங்கீகாரத்தைப் பெறுவதற்கு எவ்வித சட்டபூர்வ அறிவிப்பும் விடுக்கப்படவில்லை என இலங்கை கிராம அலுவலர் சங்கம் தெரிவித்துள்ளது.
அனர்த்தங்களை எதிர்கொண்ட மக்களுக்கு நிவாரணம் வழங்கும் போது, கிராம அலுவலர்கள் பல்வேறு அழுத்தங்களுக்கு உள்ளாவதாக அதன் அழைப்பாளர் சுமித் கோடிகார குறிப்பிட்டுள்ளார்.
கண்டி பிரதேசத்தில் ஊடக சந்திப்பை நடத்தியபோது சுமித் கோடிகார இதனைக் குறிப்பிட்டார்.
"இந்த சமுதாயச் சக்தி குழுக்கள் நாட்டின் அபிவிருத்தி நடவடிக்கைகள் மற்றும் வறுமை ஒழிப்பு நடவடிக்கைகள் தொடர்பில் ஸ்தாபிக்கப்பட்டன. அனர்த்தங்கள் தொடர்பில் சமுதாய மேம்பாட்டுச் சக்தி குழுக்களுக்கு அதிகாரம் வழங்கப்பட்டுள்ளதாக எந்த ஒரு சுற்றறிக்கையிலும் நாங்கள் பார்த்ததில்லை.
"குறிப்பாக, வரலாற்றில் அரச அதிகாரிகளாகிய நாங்கள், அனர்த்தம் ஏற்படும்போது அது தொடர்பான பரிந்துரைகளை வழங்கும் விடயத்தில் அரசியல் குழுக்கள் செயற்பட்டதில்லை. கிராமத்தில் உள்ள அரசியல்வாதி எமக்கு ஒத்துழைப்பு வழங்க முடியும். ஆனால் இந்த அனைத்து விடயங்களும் சட்ட ரீதியாகவே செய்யப்பட வேண்டும்.
"தற்போதைய அரசாங்கத்தின் அரசியல்வாதிகள் இப்போது எங்கள் அதிகாரிகளுக்கு கடுமையான அழுத்தங்களைச் செலுத்துகின்றனர். சில இடங்களில் பல்வேறு விண்ணப்பப் படிவங்களை எடுத்துக்கொண்டு அவர்கள் அவற்றைப் பகிர்ந்து அளிக்கின்றனர். கண்டி மாவட்டத்தில் உள்ள ஒரு பிரதேச சபை பிரிவின் உறுப்பினர் ஒருவர் அந்தக் கிராமத்தில் உள்ள அனைவருக்கும் 25,000 ரூபா வழங்குவதற்கான படிவத்தை வழங்கியுள்ளார். அவ்வாறு வழங்க முடியாது. அவ்வாறு விநியோகிக்கும்போது உரிய நியமங்கள் கடைப்பிடிக்கப்படுவதில்லை.
"சுத்தப்படுத்தும் இடத்திற்குத்தான் ஜனாதிபதி 25,000 ரூபா கொடுக்குமாறு கூறுகிறார், அதற்கு அனர்த்தம் ஏற்பட்டிருக்க வேண்டும். அதை விடுத்து, கிராமத்தில் உள்ள அனைவருக்கும், தமது அரசியல் ஆதரவாளர்களுக்கும் வழங்க முடியாது. பிரதேச சபை உறுப்பினர்கள், நகர சபை உறுப்பினர்கள், பல்வேறு தொகுதி சபை தலைவர்கள் ஆகியோர் தமது அதிகாரத்தைக் கையில் எடுத்து அதிகாரிகளுக்கு அழுத்தம் கொடுப்பதை உடனடியாக நிறுத்த வேண்டும். இந்த அழுத்தத்தை நிறுத்துமாறு ஜனாதிபதியிடம் நாங்கள் கடுமையாகக் கோருகிறோம்."