மாணவர்கள் எத்தனை பேர் என்பது குறித்த சரியான தகவல்கள் இதுவரை இல்லை என்று தெரிவித்துள்ள நாட்டின் பிரதான ஆசிரியர் சங்கம், அரசாங்கமும் ஐக்கிய நாடுகளும் இது தொடர்பாக வழங்கியுள்ள புள்ளிவிவரங்களுக்கு இடையில் இலட்சக்கணக்கில் வித்தியாசம் இருப்பதைச் சுட்டிக்காட்டியுள்ளது.
"இந்த அனர்த்தம் நிகழ்ந்து தற்போது ஒரு வாரம் கடந்துவிட்டது. குறிப்பாகச் சரியான தகவல்கள் இல்லை என்பதை நாங்கள் அறிவோம். குறிப்பாக எத்தனை ஆசிரியர்கள் தங்கள் உயிர்களை இழந்துள்ளனர்? அல்லது எத்தனை குழந்தைகள் [உயிரிழந்துள்ளனர்]? இது இன்னமும் எண்ணப்பட்டு வருகிறது. இதன் இறுதிப் புள்ளிவிவரங்கள் இன்னும் வரவில்லை,” என்று இலங்கை ஆசிரியர் சங்கத்தின் பொதுச் செயலாளர் ஜோசப் ஸ்டாலின் கூறினார்.
அனர்த்தத்தால் பாதிக்கப்பட்ட குழந்தைகளின் எண்ணிக்கை தொடர்பான யுனிசெஃப் (UNICEF) மற்றும் கல்வி அமைச்சகத்தின் புள்ளிவிவரங்களுக்கு இடையில் இலட்சக்கணக்கில் வித்தியாசம் இருப்பதாக இந்தக் கல்வித் தலைவர் கொழும்பில் ஊடகவியலாளர் சந்திப்பில் வலியுறுத்தினார்.
"இந்த சம்பவம் நடந்த உடனேயே, இலங்கையில் 275,000 குழந்தைகள் ஏதாவது ஒரு வகையில் பாதிக்கப்பட்டுள்ளதாக யுனிசெஃப் நிறுவனம் அறிவித்ததை நாங்கள் கண்டோம். ஆனால் ஒரு இலட்சத்திற்கு அருகில் உள்ள குழந்தைகளே பாதிக்கப்பட்டுள்ளதாக கல்வி அமைச்சகத்தின் செயலாளர் ஊடகங்களிடம் தெரிவித்தார்."
அனர்த்தத்தால் பாதிக்கப்பட்ட 1.4 மில்லியன் மக்களில் 275,000க்கும் அதிகமான குழந்தைகள் இருப்பதாக டிசம்பர் மாத தொடக்கத்திலேயே எச்சரிக்கை விடுத்த ஐக்கிய நாடுகளின் குழந்தைகள் நிதியம் (UNICEF), உண்மையான எண்ணிக்கை இதைவிட அதிகமாக இருக்கலாம் என்றும் அச்சம் தெரிவித்திருந்தது.
கல்வி அமைச்சகத்தின் கீழ் செயற்படும் 'சுரக்ஷா' காப்பீட்டுத் திட்டம் மூலம் பாதிக்கப்பட்ட பாடசாலை மாணவர்களுக்கு வழங்கப்படும் நிவாரணங்கள் என்ன என்பதை தெளிவுபடுத்துமாறு சிரேஷ்ட ஆசிரியர் சங்கத் தலைவர் ஜோசப் ஸ்டாலின் கல்வி அதிகாரிகளிடம் இதன்போது கோரிக்கை விடுத்தார்.
"எவ்வாறாயினும், கல்வி அமைச்சகம் தரப்பில், பாதிக்கப்பட்ட குழந்தைகள் தொடர்பில் ஜனாதிபதி நிதியிலிருந்து ரூபா 25,000 வழங்குவதே தற்போது தீர்மானிக்கப்பட்டுள்ளது. இது மொத்த தொகையாகும். இந்தச் சந்தர்ப்பத்தில், குழந்தைகள் தொடர்பில் 'சுரக்ஷா' காப்பீட்டு முறைமை செயற்படுத்தப்பட்டு வருகிறது என்பதை நாங்கள் அறிவோம். 'சுரக்ஷா' காப்பீடு கல்வி அமைச்சின் கீழ் தான் செயற்படுகிறது. இப்போது, இந்த அனர்த்தத்தால் பாதிக்கப்பட்ட குழந்தைகளுக்கு 'சுரக்ஷா' காப்பீட்டின் மூலம் கிடைக்கும் நிவாரணங்கள் குறித்து இன்னும் தெளிவுபடுத்தப்படவில்லை.”
அனர்த்த முகாமைத்துவ நிலையம் 2025 டிசம்பர் 10ஆம் திகதி புதன்கிழமை நண்பகல் 12 மணிக்கு வெளியிட்ட சமீபத்திய நிலைமை அறிக்கையின்படி, 'டிட்வா' சூறாவளியுடன் ஏற்பட்ட வெள்ளம் மற்றும் மண்சரிவுகளில் நாட்டில் உயிரிழந்தவர்களின் எண்ணிக்கை 639 ஆக அதிகரித்துள்ளது. அதிகபட்ச உயிரிழப்புகள் கண்டி மாவட்டத்தில் பதிவாகியுள்ளன (234). குறைந்தது 193 பேர் இன்னமும் காணாமல் போயுள்ளனர்.
இலங்கையின் 25 மாவட்டங்களில் 524,188 குடும்பங்களைச் சேர்ந்த 1,812,311 பேர் பாதிக்கப்பட்டுள்ளனர், மேலும் முழுமையாக அழிக்கப்பட்டதாக இதுவரை பதிவாகியுள்ள வீடுகளின் எண்ணிக்கை 5,336 ஆகும். திருகோணமலை மற்றும் காலி மாவட்டங்களைத் தவிர மற்ற எல்லா மாவட்டங்களிலும் குறைந்தபட்சம் ஒரு வீடாவது முழுமையாக அழிக்கப்பட்டுள்ளது.
அனர்த்த முகாமைத்துவ நிலையம், தற்போது 874 பாதுகாப்பு மையங்களில் 26,814 குடும்பங்களைச் சேர்ந்த 85,333 பேர் தங்கியுள்ளதாகத் தெரிவிக்கிறது.
அதிக மழை காரணமாக கண்டி, கேகாலை, குருநாகல் மற்றும் மாத்தளை ஆகிய நான்கு மாவட்டங்களில் கிட்டத்தட்ட 40 இடங்கள் மண்சரிவு அபாயத்தில் இருப்பதாக தேசிய கட்டிட ஆராய்ச்சி அமைப்பு (NBRO) எச்சரித்துள்ளதுடன், அவ்விடங்களிலிருந்து பாதுகாப்பு மையங்களுக்கு வெளியேறுமாறு செவ்வாயன்று (9) சிவப்பு அறிவித்தலை விடுத்துள்ளது.