எதிர்காலத்தில் மிகக் கடுமையான கடன் விளைவுகளை எதிர்கொள்ள நேரிடும் என மூடிஸ் ரேட்டிங்ஸ் (Moody’s Ratings) நிறுவனம் டிசம்பர் 5ஆம் திகதி வெளியிட்ட அறிக்கையில் எச்சரித்துள்ளது.
கடனைத் திருப்பிச் செலுத்தத் தவறிய பின்னர் இலங்கை எதிர்பார்த்த நிதி ஒருங்கிணைப்புச் செயல்முறை, 'டிட்வா' சூறாவளியால் ஏற்பட்ட சேதங்களுக்கான கூடுதல் செலவுகள் காரணமாக சவாலுக்கு உள்ளாகும் என மூடிஸ் நிறுவனம் தெரிவித்துள்ளது.
"அரசாங்கத்தின் தற்போதைய சர்வதேச நாணய நிதியத்தின் (IMF) திட்டத்திற்கும் அதனுடன் தொடர்புடைய சீர்திருத்தங்களுக்கான அர்ப்பணிப்புக்கும் எந்தவொரு பின்னடைவையும் நாங்கள் எதிர்பார்க்கவில்லை என்றாலும், சூறாவளியின் பொருளாதாரத் தாக்கம் மற்றும் அதன் பின்னரான நிலைமையை நிர்வகிப்பதற்கான செலவுகள், கடனைத் திருப்பிச் செலுத்தத் தவறிய பின்னர் எதிர்பார்க்கப்பட்ட நிதி ஒருங்கிணைப்பைக் குறைமதிப்பிற்கு உட்படுத்தும்" என்று மூடிஸ் நிறுவனம் கருத்துத் தெரிவித்துள்ளது.
'டிட்வா' காரணமாக வீதிகள், பாலங்கள், ரயில் வலையமைப்புகள் மற்றும் மின் விநியோக அமைப்புகள் உள்ளிட்ட முக்கியமான அடிப்படை வசதிகள் கடுமையாக சேதமடைந்துள்ளன. இது நாடு முழுவதும் விநியோகச் சங்கிலிகள் மற்றும் ஒட்டுமொத்த பொருளாதார நடவடிக்கைகளுக்கு இடையூறு ஏற்படுத்தியுள்ளது.
"இலங்கையின் பொருளாதாரத்தின் முக்கிய உந்துசக்தியாகவும், நாட்டின் பெரும்பாலான வேலைவாய்ப்புகளை வழங்குபவையாகவும் இருக்கும் சுற்றுலாத் துறை, விவசாயம் மற்றும் உற்பத்தித் துறை உள்ளிட்டவை மிகக் கடுமையாகப் பாதிக்கப்பட்ட துறைகளில் அடங்கும்" என்று அந்த தரப்படுத்தல் நிறுவனம் மேலும் கூறியுள்ளது.
இலங்கையைப் போலவே இந்தோனேசியா, பிலிப்பைன்ஸ் மற்றும் வியட்நாம் ஆகிய அனைத்து நாடுகளும் பௌதிக காலநிலை அபாயங்களுக்கு (Physical Climate Risks) அதிக கடன் வெளிப்பாட்டைக் கொண்டுள்ளன.
இருப்பினும், "இலங்கையின் அண்டை நாடுகளுடன் ஒப்பிடுகையில், மீளெழுவதற்கான அதன் நிதித் திறன் மிகவும் பலவீனமாக உள்ளது" என்று மூடிஸ் சுட்டிக் காட்டுகிறது.
இத்தகைய அபாயங்களைக் குறைப்பதற்கு திறமையான நிர்வாகம் அத்தியாவசியமானது, இது அதிக வெளிப்பாடு உள்ள பகுதிகளில் உள்ள பௌதிக காலநிலை அபாயங்களைக் குறைப்பதோடு பெரும்பாலும் இணைக்கப்பட்டுள்ளது.