பாடசாலை மாணவர்களுக்கு பாலியல் கல்வி வழங்குவதை விமர்சித்த கார்டினல்!

குறித்து கொழும்பு பேராயர் அதி வணக்கத்துக்குரிய மெல்கம் கார்டினல் ரஞ்சித் ஆண்டகை அவர்கள் கவலை தெரிவித்துள்ளார்.

மீரிகமையில் புனரமைக்கப்பட்ட புனித ஸ்தேவான் தேவாலயத்தை மீண்டும் திறந்து வைக்கும் நிகழ்வில் உரையாற்றிய கார்டினல் ரஞ்சித் ஆண்டகை, திட்டமிடப்பட்ட கல்விச் சீர்திருத்தங்களின் கீழ் ஜனவரியில் தொடங்கப்படவுள்ள இந்தத் திட்டம் சர்வதேச அமைப்புகளின் செல்வாக்கின் கீழ் உருவாக்கப்பட்டு வருவதாகக் கூறினார்.

புதிய பாடத்திட்டத்தின் நோக்கம் 6ஆம் வகுப்பு முதல் பாலியல் கல்வியை அறிமுகப்படுத்துவதும், ஆசிரியர்களுக்குப் பயிற்சி அளிப்பதும், கருத்தரங்குகளை ஏற்பாடு செய்வதுமாகும் என்றும் அவர் கூறினார்.

“இது உண்மையிலேயே கல்விதானா? அத்தகைய விடயங்களை சரியான நேரத்தில் தங்கள் குழந்தைகளுக்குக் கற்பிப்பது பெற்றோரின் பொறுப்பு இல்லையா?” என்று அவர் கேள்வி எழுப்பினார்.

இந்தத் திட்டத்தில் ஓரினச் சேர்க்கை உறவுகள் மற்றும் கருத்தடை பற்றிய பாடங்கள் உள்ளடங்கியுள்ளதாகவும், ஐக்கிய நாடுகள் சபையின் மக்கள் தொகை நிதி (UNFPA) போன்ற வெளிநாட்டு நிறுவனங்களால் இவை ஆதரிக்கப்படுவதாகவும் கார்டினல் ரஞ்சித் ஆண்டகை தெரிவித்தார்.

“அவர்கள் அரசாங்கத்திற்கும் கல்வி அமைச்சுக்கும் பணம் கொடுத்து, புத்தகங்களை அச்சிட்டு, இப்போது எங்கள் குழந்தைகளைத் தவறாக வழிநடத்தும் ஒரு திட்டத்தை அமுல்படுத்தி வருகின்றனர்” என்று அவர் கூறினார்.

ஜனவரி 27ஆம் திகதி தொடங்கவுள்ள இந்தத் திட்டம், நாட்டின் கலாச்சார மற்றும் ஒழுக்க விழுமியங்களுக்குத் தீங்கு விளைவிக்கும் என்று கார்டினல் ரஞ்சித் ஆண்டகை எச்சரித்தார்.

“இது எங்கள் குழந்தைகளை அழிக்கும் முயற்சி. மதம் மற்றும் ஒழுக்கத்தை இழந்த அழுகிய மேற்குலகின் விழுமியங்களை அவர்கள் நம் நாட்டிற்குள் கொண்டு வர முயற்சிக்கின்றனர்” என்று அவர் கூறினார்.

திட்டமிடப்பட்டுள்ள இந்த பாடங்களைத் தடுத்து நிறுத்துமாறு கார்டினல் ரஞ்சித் ஆண்டகை அரசாங்கத்தைக் கேட்டுக்கொண்டதுடன், அமைச்சு அதிகாரிகள் இதுபோன்ற திட்டங்களைத் தொடர்வதைத் தடுக்க நடவடிக்கை எடுக்குமாறும் ஜனாதிபதியைக் கேட்டுக்கொண்டார்.

“கல்வி அமைச்சு அப்பாவி குழந்தைகளைத் தவறாக வழிநடத்தும் வகையில் செயற்பட்டால், நாம் அதை முழுமையாக நிராகரிக்க வேண்டும்” என்றும் அவர் மேலும் கூறினார்.